சீனாவில் சிங்கிள் பசங்க அதிகம் போல.. 56 பில்லியன் டாலருக்கு ஷாப்பிங்..!

76 பில்லியன் டாலர் மாயம்

சீன அரசின் ஆன்ட் குரூப்-ன் திடீர் தடையின் காரணமாக அலிபாபா குழுமத்தின் மதிப்பு சீன பங்குச்சந்தையில் சுமார் 76 பில்லியன் டாலர் சரிந்தது. அரசே இந்நிறுவனத்தை எதிர்த்த நிலையில் ரீடைல் முதலீட்டாளர்கள் அரசின் மீது உள்ள பயத்தின் காரணமாகப் பங்குகளை விற்று ஓடினர். இதன் காரணமாகவே அலிபாபா குழுமத்தின் சந்தை மதிப்பு 76 பில்லியன் டாலர் சரிந்தது.

2 சிறப்பு விற்பனை

அலிபாபா தளத்தில் நவம்பர் மாதம் மட்டும் சிங்கிள்ஸ் டே பெயரில் 2 சிறப்பு விற்பனை அறிவிக்கப்பட்டுள்ளது. முதல் விற்பனை நவம்பர் 1 முதல் 3ஆம் தேதி வரையிலும் 2வது விற்பனை நவம்பர் 11ஆம் தேதி மட்டும் அறிவிக்கப்பட்டது.

56 பில்லியன் டாலர்

சீனா நேரத்தின் படி நவம்பர் 11ஆம் தேதி 12.30 மணியளவில் கணக்கிட்ட போது சுமார் 372.3 பில்லியன் யுவான் அதாவது டாலர் மதிப்பில் 56.3 பில்லியன் டாலர் அளவிலான வர்த்தகத்தை அலிபாபா தளம் செய்துள்ளது.

இதுமட்டும் அல்லாமல் ஒரு நொடிக்கு 5,83,000 ஆர்டர்கள் அலிபாபா தளத்தில் வந்து குவிந்து வருவதாக இந்நிறுவனம் தெரிவித்துள்ளது.

20 லட்சம் புதிய பொருட்கள்

இந்தச் சிறப்பு விற்பனைக்காக அலிபாபா புதிதாகத் தனது ஈகாமர்ஸ் தளத்தில் சுமார் 20 லட்சம் பொருட்களைப் புதிதாகப் பட்டியலிட்டு வாடிக்கையாளர்களைக் கவர்ந்துள்ளது.

சராசரியாக ஒரு வாடிக்கையாளர் 1000 யுவான் முதல் 10000 யுவான் வரையில் இந்தச் சிங்கிள்ஸ் டே விற்பனையில் செலவு செய்வதாக ஆய்வுகள் கூறுகிறது.

சோகத்திலும் நன்மை

அலிபாபா குழுமம் ஆன்ட் குரூப்-ன் ஐபிஓ தடையும், அதனால் ஏற்பட்டுள்ள 76 பில்லியன் டாலர் மதிப்பிலான சந்தை மதிப்பு பாதிக்கப்பட்டு உள்ள இந்தச் சூழ்நிலையில், 56 பில்லியன் டாலர் மதிப்பிலான வர்த்தகம் அலிபாபாவை மகிழ்ச்சியில் ஆழ்த்தியுள்ளது தெரிகிறது.