இந்தியாவில் ஆன்லைன் வர்த்தகச் சந்தை வேகமாக வளர்ச்சி அடைந்து வரும் நிலையில் இத்துறையில் இருக்கும் நிறுவனங்கள் தொடர்ந்து அதிகப்படியான வர்த்தகம் மற்றும் முதலீட்டையும் பெற்று வருகிறது.
இந்நிலையில் நாட்டின் முன்னணி ஈகாமர்ஸ் மற்றும் டிஜிட்டல் சேவை நிறுவனமான பிளிப்கார்ட் 2020-21ஆம் ஆண்டில் மிகப்பெரிய அளவிலான வர்த்தகத்தைப் பதிவு செய்துள்ளது, ஆனால் இதேநேரத்தில் அதிகப்படியான நஷ்டத்தையும் சந்தித்துள்ளது.
பிளிப்கார்ட் நிறுவனம்
அமெரிக்காவின் மிகப்பெரிய ரீடைல் நிறுவனமாக விளங்கும் வால்மார்ட் கட்டுப்பாட்டில் இயங்கும் பிளிப்கார்ட் நிறுவனம் 2020-21ஆம் நிதியாண்டுக்கான வர்த்தகத் தரவுகளை வெளியிட்டுள்ளது. இந்த ஆண்டில் பிளிப்கார்ட் நிறுவனத்தின் வர்த்தகம் சுமார் 25 சதவீதம் வளர்ச்சி அடைந்து 43,357 கோடி ரூபாய் அளவிலான வருமானத்தைப் பெற்றுள்ளது.
விரிவாக்கம்
ஆனால் இதே காலகட்டத்தில் பிளிப்கார்ட் சந்தையில் இருக்கும் போட்டியைச் சமாளிக்க வேண்டும் என்பதற்காக மிகப்பெரிய முதலீட்டில் அதிகப்படியான விரிவாக்கத் திட்டத்தைக் கையில் எடுத்தது. இதன் மூலம் பிளிப்கார்ட் நிறுவனத்தின் மொத்த செலவுகள் 45,801 கோடி ரூபாயாக உயர்ந்துள்ளது.
நஷ்டம்
2020-21ஆம் நிதியாண்டு வர்த்தகத்தில் வருமானத்தை விடவும் செலவுகள் அதிகமாக இருந்த காரணத்தால் வால்மார்ட் கட்டுப்பாட்டில் இருக்கும் பிளிப்கார்ட் நிறுவனத்தின் மொத்த நஷ்டம் 2,445 கோடி ரூபாயாக உள்ளது, இது கடந்த வருடத்தை விடவும் 25 சதவீதம் குறைவாகவும். சமீபத்தில் பிளிப்கார்ட் 2020-21ஆம் ஆண்டு செய்த முதலீட்டின் வாயிலாக B2B வர்த்தகப் பிரிவில் இறங்கியது குறிப்பிடத்தக்கது.
அமேசான் நிறுவனம்
இந்தியாவில் பிளிப்கார்ட்-ம், அமெரிக்காவின் வால்மார்ட் நிறுவனத்தின் சக போட்டி நிறுவனமான அமெரிக்காவின் அமேசான் 2020-21ஆம் நிதியாண்டில் 16,379 கோடி ரூபாய் அளவிலான வருமானத்தைப் பெற்றுள்ளது. இது கடந்த ஆண்டை விடவும் 49 சதவீதம் அதிகமாகும்.
அமேசான் வளர்ச்சி
பிளிப்கார்ட் நிறுவனத்தின் வருமானத்தை விடவும் அமேசான் வருவாய் குறைவாக இருந்தாலும் வளர்ச்சி அளவீடுகள் மிகவும் சிறப்பாகவே உள்ளது. மேலும் அமேசான் நிறுவனத்தின் நஷ்ட அளவீடு 19 சதவீதம் குறைவாக இருந்தாலும் 4,748 கோடி ரூபாய் நஷ்டத்தைப் பதிவு செய்துள்ளது.
கடுமையான போட்டி
லாக்டவுன் துவங்கிய நாள் முதல் ஆன்லைன் வர்த்தகச் சந்தை வேகமாக வளர்ச்சி அடைந்து வரும் நிலையில் பிளிப்கார்ட், அமேசான், ரிலையன்ஸ் ஜியோமார்ட், டாடா பிக்பேஸ்கட் மத்தியில் கடுமையான வர்த்தகப் போட்டி உருவாகியுள்ளது.