அஜித் குமாரை விடுங்கப்பா.. தமிழ்நாட்டை சேர்ந்த 2 முக்கிய நபருக்கு பத்ம விருது கிடைச்சிருக்கு..!

இந்திய அரசு குடியரசு தினத்திற்கு முன்னதாக, சனிக்கிழமை பத்ம விருதுகளை அறிவித்துள்ளது. இந்த ஆண்டு, வர்த்தகம் மற்றும் தொழில் துறையில் 10 பேருக்கு பத்ம விருதுகளை கொடுத்து கௌரவிக்கப்பட்டுள்ளனர். இந்தியாவின் மிக உயரிய குடிமை விருதான பத்ம விருதுகள், சமூக பொறுப்பு, பொருளாதார மற்றும் கலாச்சார முன்னேற்றத்திற்கு பங்களிப்பு என பல பிரிவில் நாட்டின் வளர்ச்சிக்கும், நாட்டின் நலனுக்கும் பங்களிப்பு செய்துள்ள தனிநபர்களை அங்கீகரிக்கும் வகையில் வழங்கப்படுகின்றன. பத்ம விபூஷன், பத்ம பூஷன் மற்றும் பத்மஸ்ரீ ஆகிய மூன்று பிரிவுகளில் இந்த விருதுகள் வழங்கப்படுகின்றன.

வர்த்தகம் மற்றும் தொழில் துறையில் பத்ம விருதுகளைப் பெற்றவர்களில் தொழில் முனைவோர், தொழிலதிபர்கள், தொழில் நிபுணர்கள் மற்றும் தொழில் வல்லுநர்கள் உள்ளனர். இந்த விருதுகள், அவர்களின் தொழில்முனைவோர் திறன், தொழில் வளர்ச்சி மற்றும் நாட்டின் பொருளாதார வளர்ச்சிக்கான பங்களிப்பை அங்கீகரிக்கின்றன. இந்த வகையில் விருது பெற்ற 10 பேரில் 2 பேர் தமிழ்நாட்டை சேர்ந்தவர்கள் என்பது குறிப்பிடத்தக்கது.

சுசூகி மோட்டார் கார்ப்பரேஷனின் வளர்ச்சிக்கு முக்கிய பொறுப்பு வகித்த ஒசாமு சுசூகி, இந்தியாவின் இரண்டாவது உயரிய குடிமை விருதான பத்ம விபூஷன் விருதுடன் கௌரவிக்கப்பட்டார். இந்திய ஆட்டோமொபைல் சந்தையில் சுசூகியின் ஆதிக்கத்தை நிலைநாட்ட ஒசாமு சுசூகி வகித்த தலைமைப் பங்கு மிகவும் முக்கியமானது. அவரது முயற்சிகள் இந்திய ஆட்டோமொபைல் துறையை மாற்றியமைத்ததுடன், மில்லியன் கணக்கான இந்தியர்களுக்கு மலிவு மற்றும் நம்பகமான போக்குவரத்தை பெற வழிவகுத்துள்ளது. இந்திய அரசுடன் இணைந்து சுசூகி, மாருதி சுசூகி லிமிடெட்டின் உருவாக்கத்திற்கு வழிவகுத்தது, இது மாருதி 800 உட்பட பல கார்களை அறிமுகப்படுத்தி இந்திய கார் ஆட்டோமொபைல் சந்தையில் புரட்சிகரமாக்கியது.

நல்லி குப்புசாமி செட்டி மற்றும் பங்கஜ் படேல் ஆகியோர் இந்தியாவின் மூன்றாவது உயரிய விருதான பத்ம பூஷன் விருதுடன் கௌரவிக்கப்பட்டனர். இந்திய ஜவுளித் துறையில் முக்கியமான நபரான நல்லி குப்புசாமி செட்டி, கஞ்சிபுரம் பட்டு நெசவைப் பாதுகாத்து மேம்படுத்துவதற்காக பல பணிகளை செய்துள்ளார். அவரது முயற்சிகள் இந்த பாரம்பரிய கைவினைத்திறனை மறுமலர்ச்சி அடையச் செய்துள்ளது மட்டுமல்லாமல், எண்ணற்ற நெசவாளர்கள் மற்றும் கைவினைஞர்களுக்கு புதிய வாழ்வாதாரம் அளித்தது.

கடிலா பார்மாசூட்டிகல்ஸின் தலைவர் மற்றும் மேலாண்மை இயக்குநரான பங்கஜ் படேல், இந்திய மருந்துத் துறைக்கு குறிப்பிடத்தக்க பங்களிப்புகளைச் செய்துள்ளார். பார்மா துறையில் ஆராய்ச்சி மற்றும் மேம்பாட்டிற்கான அவரது அர்ப்பணிப்பு, உயிர் காக்கும் மருந்துகளின் வளர்ச்சிக்கு வழிவகுத்துள்ளது, இது இந்தியாவில் பொது சுகாதாரத்தை கணிசமாக பாதித்துள்ளது. இவருக்கு பத்ம பூஷன் விருது அளித்து கௌரவிக்கப்பட்டு உள்ளது.

மூன்றாவது உயரிய குடிமை விருதான பத்மஸ்ரீ, 7 சிறந்த தனிநபர்களுக்கு வழங்கப்பட்டது.

இந்திய வங்கித் துறையில் முக்கியமான நபரான அருந்ததி பட்டாச்சார்யா -வுக்கு பத்மஸ்ரீ விருது கொடுக்கப்பட்டு உள்ளது. ஸ்டேட் வங்கி ஆப் இந்தியாவின் முன்னாள் தலைவராக, அவர் முக்கியமான சீர்திருத்தங்களை மேற்கொண்டு இந்திய வங்கித் துறையை வலுப்படுத்தினார். தற்போது சேல்ஸ்ஃபோர்ஸ், இந்தியாவின் தலைவர் மற்றும் தலைமை நிர்வாக அதிகாரியாக பணியாற்றி வரும் அவர், தொழில்நுட்பத் துறையில் புதிய மாற்றத்தை செய்ய முயற்சி செய்து வருகிறார்.

Avon சைக்கிள்ஸின் நிர்வாக இயக்குநரான ஒங்கார் சிங் பாவா அவர்களுக்கும் பத்மஸ்ரீ விருது கொடுக்கப்பட்டு உள்ளது.

இந்திய ஆட்டோமொபைல் துறையில் தனது சிறப்பான தலைமைத்துவத்திற்காக மகிந்திரா & மகிந்திராவின் முன்னாள் மேலாண்மை இயக்குநரான பவன் கோயங்கா-வுக்கு பத்மஸ்ரீ விருது கொடுக்கப்பட்டு உள்ளது.

இந்தியாவின் வளர்ந்து வரும் டெக் எகோசிஸ்டத்தில் செய்த பங்களிப்புகளுக்காக முன்னணி முதலீட்டாளரான பிரசாந்த் பிரகாஷ் கௌரவிக்கப்பட்டார். அசெல் பார்ட்னர்ஸின் நிறுவன கூட்டாளியாக, அவர் பல வெற்றிகரமான இந்திய ஸ்டார்ட்அப் நிறுவனங்களின் வளர்ச்சிக்கு முக்கிய பங்கு வகித்துள்ளார்.

தமிழ்நாட்டில் மட்டும் அல்லாமல் இந்திய அளவில் புகழ்பெற்ற பால் பண்ணை தொழில்முனைவோரான ஆர்.ஜி.சந்திரமோகன், இந்திய பால் பண்ணைத் துறைக்கு அவர் செய்த பங்களிப்புகளுக்காக பத்ம ஸ்ரீ விருது கொடுத்து அங்கீகரிக்கப்பட்டார். அவர் இந்தியாவின் மிகப்பெரிய தனியார் துறை பால் பண்ணை நிறுவனமான ஹட்சன் அக்ரோ புரொடக்ட்ஸ் லிமிடெட்டின் தலைவர் ஆவார். இந்த நிறுவனத்தின் கீழ் தான் ஆரோக்கியா பால், ஐபேகோ, ஐஸ்கிரீம், HAP சாக்லேட் உள்ளிட்ட பல பிராண்டுகள் இயங்கி வருகிறது.

புகழ்பெற்ற ஹோட்டல் தொழிலதிபர் மற்றும் சமூக தொழில்முனைவோரான சல்லி ஹோல்கர், இந்திய ஹாஸ்பிடாலிட்டி துறைக்கு அவர் செய்த பங்களிப்புகளுக்கும் சமூக காரணங்களுக்கான அவரது அர்ப்பணிப்புக்கும் அங்கீகரிக்கப்பட்டார். அவர் மைஹேஸ்வரி சேலையை திரும்ப பயன்பாட்டுக்கு கொண்டு வருவதில் முக்கிய பங்காற்றியவர் என்று கொண்டாடப்படுகிறார்.