ஆப்பிள் உயர்மட்ட பதவியில் ஒரு இந்தியர்.. மாஸ் காட்டும் கெவின் பாரிக்..!

சென்னை: உலகின் முன்னணி டெக் மற்றும் ஸ்மார்ட்போன் நிறுவனமான ஆப்பிள் தனது தலைமை நிதி அதிகாரியாக இந்திய வம்சாவளியை சேர்ந்த கெவின் பாரிக்கை நியமித்துள்ளது. இதன் மூலம் ஆப்பிளின் உயர்மட்ட பதவியில் இந்தியர் ஒருவர் நுழைந்துள்ளார். ஆப்பிள் நிர்வாகம் அடுத்த சிஎப்ஓ-வாக யாரை நியமிப்பது என்பதில் பெரும் குழப்பத்தில் இருந்த வேளையில் வெளியிலிருந்து ஒருவரைக் கொண்டு வருவது சரியான முடிவாக இருக்காது என்பதை உணர்ந்து நிறுவனத்தில் இருக்கும் உள்நபரையே நியமித்துள்ளது.

கெவின் பாரிக் ஜனவரி 1, 2025 அன்று நிறுவனத்தின் தலைமை நிதி அதிகாரியாகத் தனது பணியைத் துவங்குவார். ஏற்கனவே இப்பதவியில் இருக்கும் லூகா மேஸ்ட்ரி இந்த பதவியிலிருந்து அதே நாளில் நிறுவனத்திற்குள்ளேயே வேறு பதவிக்கு மாற உள்ளார்.

ஆப்பிள் நிறுவனத்தில் இந்த புதிய தலைமை மாற்றம், அடுத்த சில வாரத்தில் ஆப்பிள் ஐபோன் 16 உட்பட பல தயாரிப்புகளை வெளியிடுவதற்கு முன்னதாக நடந்துள்ளது மிகவும் முக்கியமானதாகப் பார்க்கப்படுகிறது. இந்த முறை அறிமுகம் செய்யும் ஆப்பிள் ப்ராடெக்ட்கள் அனைத்திலும் மிகப்பெரிய சாப்ட்வேர் அப்டேட் இருக்கும் என்று சந்தை வல்லுனர்கள் கூறியுள்ளனர்.

உலகமே செயற்கை நுண்ணறிவு தொழில்நுட்பத்தைச் சார்ந்து ஓடிக்கொண்டு இருக்கும் வேளையில் ஆப்பிள் இன்டலிஜென்ஸ் என்ற பெயரில் புதிய AI அம்சங்களைக் கொண்டு வர திட்டமிட்டு உள்ளது ஆப்பிள். ஆப்பிள் சமீப காலமாக அதன் விற்பனையிலும், பங்கு மதிப்பிலும் தொடர்ந்து வீழ்ச்சியைக் கண்டு வரும் வேளையில் கெவின் பாரிக் நியமனம் மற்றும் ஏஐ அப்டேட்கள் இந்த வீழ்ச்சியை தலைகீழாகப் புரட்டிப்போடும் என எதிர்பார்க்கப்படுகிறது.

ஆப்பிள் நிறுவனத்தில் கெவின் பாரிக் 10 வருடத்திற்கும் அதிகமாக பணியாற்றி வருகிறார். புதிய CFO பதவி மூலம் விரைவில் கெவின் பாரிக் ஆப்பிள் நிறுவனத்தின் நிர்வாகக் குழுவில் சேர உள்ளார். இவர் தற்போது நிதி திட்டமிடல் மற்றும் பகுப்பாய்வின் துணைத் தலைவராக பணியாற்றி வருகிறார்.

ஆப்பிளுக்கு முன், பாரிக் தாம்சன் ராய்ட்டர்ஸ் மற்றும் ஜெனரல் மோட்டார்ஸ் ஆகிய நிறுவனங்களில் உயர் மட்ட தலைமைப் பதவிகளை வகித்தார்.

CFO பதவியில் இருந்து வெளியேறும் லூகா மேஸ்ட்ரி, ஜனவரி 1, 2025க்கு பின்பு நிறுவன சேவைகள் குழுக்களைத் தலைமை தாங்குவார் என்று ஆப்பிள் நிர்வாகம் தெரிவித்துள்ளது. இதில் தகவல் அமைப்புகள் மற்றும் தொழில்நுட்பம், தகவல் பாதுகாப்பு மற்றும் நிலம் மற்றும் மேம்பாடு ஆகியவை அடங்கும். இவை தலைமை நிர்வாக அதிகாரி டிம் குக் அறிக்கை செய்யும்.