ரூ.2,027 கோடி மதுபான ஊழல் வழக்கால் வந்த வினை! தோல்வி பயத்தில் கெஜ்ரிவால், சிசோடியா, ஜெயின்..!

டெல்லி யூனியன் பிரதேசத்தில் 2017 முதல் 2021ம் ஆண்டு வரையிலான 5 ஆண்டுகளில் மதுபான ஒழுங்குமுறை கொள்கையில் நடந்த முறைகேடுகள் நடந்துள்ளது. முறையற்ற உரிமம், சில்லரை விற்பனையாளர் நியமனங்கள் மற்றும் மேற்பார்வை இல்லாமை போன்றவற்றால் டெல்லி கருவூலத்திற்கு ரூ.2,027 கோடி இழப்பு ஏற்பட்டுள்ளது என்று இந்திய தலைமை கணக்கு தணிக்கையாளர் அறிக்கை வெளிப்படுத்தியது.

இந்த ஊழல் வழக்கில், அப்போது கலால் துறை பொறுப்பாளராக இருந்த மணிஷ் சிசோடியா, அப்போது முதல்வராக இருந்த அரவிந்த் கெஜ்ரிவால் மற்றும் சத்யேந்திர ஜெயின் உள்ளிட்டோர் மீது குற்றம் சாட்டப்பட்டது.

ஊழலை ஒழிப்போம் என்று கூறி ஆட்சிக்கு வந்த ஆம் ஆத்மி தலைவர்கள் ஊழலில் ஈடுபட்டு இருப்பதாக குற்றம் சாட்டப்பட்டது நாடு முழுவதும் பெரும் பரபரப்பை ஏற்படுத்தியது. மேலும், டெல்லி கலால் கொள்கை ஊழலால், ஆம் ஆத்மி அரசாங்கத்தில் பெரும் மாற்றம் ஏற்பட்டது. குறிப்பாக அரவிந்த் கெஜ்ரிவால் தனது முதல்வர் பதவியை துறந்தார், புதிய முதல்வராக ஆம் ஆத்மியின் அதிஷி பொறுப்பேற்றார்.

இந்நிலையில், 70 உறுப்பினர்களை கொண்ட டெல்லி சட்டப்பேரவைக்கு புதிய உறுப்பினர்களை தேர்ந்தெடுப்பதற்கான சட்டப்பேரவை தேர்தல் பிப்ரவரி 5ம் தேதி நடைபெறும் என தேர்தல் ஆணையம் அறிவித்தது. ஆம் ஆத்மி 70 தொகுதிகளிலும் வேட்பாளர்களை நிறுத்தியது.

குறிப்பாக, ஊழல் குற்றச்சாட்டில் சிக்கிய மணிஷ் சிசோடியா, அரவிந்த் கெஜ்ரிவால் மற்றும் சத்யேந்திர ஜெயின் ஆகியோரும் அடங்குவர். மதுபான ஊழல் குற்றச்சாட்டில் சிக்கிய இந்த மூவரையும் மக்கள் ஆதரிப்பார்களா என்று சந்தேகம் ஏற்பட்டது. இந்நிலையில், கடந்த 5ம் தேதி டெல்லி சட்டப்பேரவை தேர்தல் நடைபெற்றது.

தேர்தலில் பதிவான வாக்குகள் இன்று எண்ணப்பட்டு முடிவுகள் அறிவிக்கப்பட உள்ளது. தற்போது தேர்தலில் பதிவான வாக்குகள் எண்ணப்பட்டு வருகிறது. தற்போதைய நிலவரப்படி, பாஜக 42 தொகுதிகளில் முன்னிலையில் உள்ளது. அதேசமயம், ஆளும் கட்சியான ஆம் ஆத்மி 27 தொகுதிகளில் மட்டுமே முன்னிலையில் உள்ளது.

குறிப்பாக, மணிஷ் சிசோடியா, அரவிந்த் கெஜ்ரிவால் மற்றும் சத்யேந்திர ஜெயின் ஆகிய ஆம் ஆத்மி கட்சியின் முக்கிய தலைகள் தங்களது தொகுதியில் பின்னடைவை சந்தித்துள்ளனர். இதற்கு டெல்லி மதுபான ஊழல் வழக்கே காரணம் என கூறப்படுகிறது.