கொங்கு மண்டல மக்களின் 67 ஆண்டு ஏக்கம்.. காமராஜர் துவங்கியது ஸ்டாலின் முடிக்கிறார்..!

தமிழ்நாட்டின் முக்கிய வர்த்தகம், தொழில்துறை பகுதியான கொங்கு மண்டலத்தில் கோயம்புத்தூர், ஈரோடு, திருப்பூர், சேலம், நாமக்கல் பகுதி மக்கள் 67 ஆண்டுகளாக எதிர்பார்த்துக் காத்திருந்த ஒரு திட்டம் தான் அத்திக்காவு-அவிநாசி திட்டம். இத்திட்டம் முதல் முறையாக அறிவிக்கப்பட்டு 67 ஆண்டுகளுக்கு பின்பு இறுதியாக வடிவம் பெற்று தமிழ்நாடு முதல்வர் மு.க.ஸ்டாலின் சனிக்கிழமை (ஆகஸ்ட் 17, 2024) வீடியோ கான்பரன்சிங் மூலம் இந்த திட்டத்தைத் தொடங்கி வைக்க உள்ளார்.

அத்திக்காவு-அவிநாசி திட்டம் என்பது என்ன..?: ஈரோடு மாவட்டம் பவானி ஆற்றின் படுகையில் இருக்கும் காலிங்கராயன் அணைக்கட்டியில் உள்ள 1.5 ஆயிரம் மில்லியன் கன அடி (TMC) உபரி நீரை திசை திருப்பி, ஈரோடு, திருப்பூர் மற்றும் கோவை மாவட்டங்களில் உள்ள 1,045 நீர் நிலைகளை நிரப்பி, 24,468 ஏக்கர் விவசாய நிலத்தைப் பாசனத்திற்கு நீர் ஆதாரத்தை உருவாக்கித் தரும் முக்கியமான திட்டம் இது.

மேற்கு தொடர்ச்சி மலையில் உள்ள நீலகிரியிலிருந்து தோன்றும் பவானி ஆறு கேரளாவுக்குள் புகுந்து மீண்டும் கோவை மாவட்டம் மேட்டுப்பாளையத்தில் உள்ள பிள்ளூர் அணைக்கு அருகில் உள்ள அத்திக்கடவுக்குள் நுழைகிறது. இந்த ஆறு ஈரோடு மாவட்டத்தில் உள்ள பவானிசாகர் அணையை அடைந்து, பின்னர் 75 கிலோமீட்டர் பயணித்து பவானியில் காவிரி ஆற்றில் கலக்கிறது.

இந்த 217 கிலோமீட்டர் நீளமுள்ள ஆறு தென்மேற்கு மற்றும் வடகிழக்கு பருவமழையின் மூலம் நீர் ஆதாரத்தைப் பெறுகிறது. காவிரியில் கலக்கும் உபரி நீரை சிறப்பாகப் பயன்படுத்த, கொங்கு மண்டல விவசாயிகள் 1957-ம் ஆண்டு அன்றைய முதல்வர் கே.காமராஜிடம் திறந்த கால்வாய்கள் மூலம் நீரை திசை திருப்பி, கோவை மாவட்டத்தில் வறண்ட பகுதிகளை நிரப்ப வேண்டும் என்று கோரிக்கை விடுத்தனர்.

இத்திட்டம் அப்போதே தமிழக அரசால் ஏற்கப்பட்டு இத்திட்டத்திற்கு முதலில் மேல் பவானி திட்டம் என்று பெயரிடப்பட்டது. கடந்த 50 ஆண்டுகளில், பல்வேறு அரசுகள் இந்த திட்டத்தைச் செயல்படுத்த நடவடிக்கை எடுத்தன.

2009-ம் ஆண்டு, திட்டத்தின் செயல்பாடு குறித்து ஆய்வு செய்ய நீர்வளத்துறை ஆலோசகர் ஏ.மோகனகிருஷ்ணன் தலைமையில் ஒரு தொழில்நுட்ப நிபுணர் குழு அமைக்கப்பட்டது. வெள்ளப் பெருக்கின் போது 2 டிஎம்சி அடி நீரை திசை திருப்ப முடியும் என்று அந்த அறிக்கை தெரிவித்தது. இதுதான் அத்திக்காவு-அவிநாசி திட்டத்தின் முக்கிய திருப்பு முனையாக அமைந்தது.

இந்த ஆய்வின் முடிவுகளை ஆதாரமாக வைத்து இந்த திட்டத்தைச் செயல்படுத்த வேண்டும் என்று வலியுறுத்தி அரசியல் கட்சிகள், விவசாயிகள், வியாபாரிகள், நல அமைப்புகள் மற்றும் பொதுமக்கள் பல ஆண்டுகளாக பல்வேறு போராட்டங்களை நடத்தி ஆகஸ்ட் 17ஆம் தேதி அத்திக்காவு-அவிநாசி திட்டம் பயன்பாட்டுக்கு வருகிறது.

1972-ம் ஆண்டில் இந்த திட்டத்திற்கு அத்திக்கடவு-அவிநாசி நிலத்தடி நீர் மறுசேர்ப்பு மற்றும் குடிநீர் வழங்கல் திட்டம் என்று பெயர் மாற்றப்பட்டது. அப்போதைய முதல்வர் எடப்பாடி பழனிசாமி 2016-17ல் இந்த திட்டத்தைச் செயல்படுத்துவதாக அறிவித்தார்.

ரூ.1,652 கோடி செலவில் அமைக்க திட்டமிடப்பட்ட அத்திக்கடவு-அவிநாசி திட்டத்திற்கான அடிக்கல் நாட்டும் விழா 2019 பிப்ரவரி 28 அன்று அப்போதைய முதல்வர் எடப்பாடி பழனிசாமி தலைமையில் நடந்தது. 34 மாதங்களில் திட்டத்தை நிறைவு செய்யத் திட்டமிடப்பட்டது.

அத்திக்கடவு-அவிநாசி திட்டம் மூலம் 3 மாவட்டத்தில் 32 பொதுப்பணித்துறை குளங்கள், 42 உழவர் குளங்கள் மற்றும் 971 குளங்களை நிரப்ப முடியும், இத்திட்டத்திற்கு ரூ.1,758.88 கோடியாக மறுமதிப்பீடு செய்யப்பட்டது. சுற்றுச்சூழல் அனுமதி பெற்ற பிறகு, 2019 டிசம்பர் 25 அன்று திட்டத்திற்கான பணி தொடங்கியது.

நிலம் கையகப்படுத்துவதில் ஏற்பட்ட தாமதம், பைப்லைன் அமைக்க விவசாயிகளிடமிருந்து நிலத்தை பயன்படுத்த உரிமை பெறுவதில் ஏற்பட்ட தாமதம் மற்றும் அதிகப்படியான நீர் கிடைக்காதது ஆகியவை திட்டத்தை தாமதப்படுத்தின. 2023 ஜனவரியில் சோதனை ஓட்டம் நிறைவு செய்யப்பட்டு, ஆகஸ்ட் 17 ஆம் தேதி இத்திட்டம் செயல்பாட்டுக்கு வர உள்ளது.

67 ஆண்டுகளுக்கு முன்பு ரூ.134 கோடியில் திட்டமிடப்பட்ட இந்த திட்டம் இறுதியாக ரூ.1,916.41 கோடி செலவில் நிறைவடைந்துள்ளது அனைத்து தரப்பினரும் கவனிக்க வேண்டிய ஒன்று.

அத்திக்கடவு-அவிநாசி திட்டம் வடிவமைப்பு, கட்டுமானம், இயக்கம் மற்றும் மாற்று (DBOT) அடிப்படையில் செயல்படுத்தப்படுகிறது. ஒப்பந்ததாரர், திட்டத்தைச் செயல்பாட்டுக்குக் கொண்டு வந்த பிறகு, 60 மாதங்கள் இயக்கி பராமரிக்க வேண்டும்.