திருப்பதி ஏழுமலையானை முந்தும் அயோத்தி ராமர்.. ஒரு மாதத்தில் எவ்வளவு நன்கொடை தெரியுமா..?

உத்தரப் பிரதேச மாநிலம் அயோத்தியில் உள்ள ராமர் ஜென்ம பூமியில் புதிய ராமர் கோயில் கட்டப்பட்டது. ஜனவரி 22 ஆம் தேதியன்று பிரதமர் நரேந்திர மோடியால் இந்தக் கோயில் அதிவிமரிசையாக திறந்து வைக்கப்பட்டது.

இதுவரை இந்தக் கோயிலுக்கு 60 லட்சத்துக்கும் மேலான பக்தர்கள் வந்து தரிசனம் செய்துள்ளனர். கோயிலுக்கு ஆன்லைனிலும் உண்டியல்களிலும் நன்கொடைகள் குவிந்த வண்ணம் இருக்கிறது.

ஜனவரி 22 முதல் பிப்ரவரி 22 வரை ரூ.25 கோடி ரொக்கமும், 10 கிலோ தங்க நகைகளும், 25 கிலோ வெள்ளி நகைகளும் நன்கொடையாக வந்துள்ளதாகவும் கோயிலுக்கு நன்கொடையாகத் தரப்படும் தங்கம் மற்றும் வெள்ளி நகைகளை கோயிலுக்குப் பயன்படுத்த முடியாது.

இருப்பினும் பக்தர்களின் உணர்வுக்கு மதிப்பளித்து அவற்றை ஏற்றுக் கொள்வதாகவும் கோயில் அறங்காவலர் பிரகாஷ் குப்தா தெரிவித்துள்ளார்.

ராம நவமி கொண்டாட்டங்களின் போது இந்த நன்கொடை மேலும் அதிகரிக்கக்கூடும் என ராமர் கோயில் அறக்கட்டளை கூறியுள்ளது.
நன்கொடை வழங்கும் பக்தர்களுக்கு ரசீது வழங்குவதற்காக ராமர் கோயிலில் 20 கம்ப்யூட்டர் மையங்கள் அமைக்கப்பட்டுள்ளன.

உண்டியலில் குவியும் பணத்தை எண்ணுவதற்காக 20க்கும் மேற்பட்ட இயந்திரங்கள் நிறுவப்பட்டுள்ளன. அத்துடன் உண்டியல் வசூலை எண்ணுவதற்காக அதிநவீன வசதிகளுடன் கூடிய அறையை விரைவில் அமைக்கத் திட்டமிடப்பட்டுள்ளது.

ஸ்டேட் பாங்க் ஆப் இந்தியாவுடன் கோயில் அறக்கட்டளை ஒரு ஒப்பந்தம் செய்து கொண்டுள்ளது. அதன்படி வரும் நன்கொடை செக், டிராப்ட், பணத்தை ஸ்டேட் பாங்கில் டெபாசிட் செய்யப்படும். பணத்தை அதன் மதிப்புவாரியாக பிரித்து எடுப்பதற்காக மூன்று மெஷின்களும் அந்தப் பணத்தை எண்ணுவதற்காக நான்கு மெஷின்களும் அமைக்கப்பட்டுள்ளன. எண்ணப்படும் பணம் கட்டுகளாகப் பிரிக்கப்பட்டு வங்கியில் செலுத்தப்படும்.

வாரநாட்களில் பணத்தை எண்ணுவதற்காக ஸ்டேட் பாங்க் ஆப் இந்தியாவின் மையம் ஒன்று கோயில் வளாகத்தில் அமைக்கப்பட்டுள்ளது. தினமும் காலையில் வங்கி அதிகாரிகள் வந்து பணத்தை எண்ணி எடுத்துச் செல்வார்கள். இரண்டு ஷிப்டுகளில் இவர்கள் பணியாற்ற உள்ளனர்.

கோயில் அறக்கட்டளை அதிகாரிகள் கூறுகையில், ஆன்லைன் நன்கொடைகள் தவிர, ஜனவரி 22 முதல் சிறிய மதிப்புள்ள ரூபாய் நோட்டுகளில் ரொக்கப் பிரசாதம் ₹4 கோடியாக மதிப்பிடப்பட்டுள்ளது. மேலும் தினசரி எண்ணிக்கை ₹13 முதல் 14 லட்சம் வரை இருக்கலாம்.

இந்த நன்கொடைகளில் பெரும்பாலானவை ₹10, 20, 50, 100, 200 மற்றும் 500 ரூபாய் மதிப்பில் இருப்பதால், காசுகள் உள்ளிட்ட ரொக்கங்களைக் கணக்கிடுவது மிகப்பெரிய காரியமாக இருக்கிறது என்று ராமர் கோயில் அறக்கட்டளை நிர்வாகிகள் தெரிவித்தனர்.

ராம் லல்லாவுக்கு நன்கொடையாக அளிக்கப்பட்ட தங்கம் மற்றும் வெள்ளி நகைகள் மற்றும் விலைமதிப்பற்ற பொருட்களை மதிப்பிடும் பணி இந்திய அரசின் புதினா நிறுவனத்திடம் ஒப்படைக்கப்பட்டுள்ளது. இக்குழுவினர் அயோத்தியை அடைந்து பணியைத் தொடங்கியுள்ளனர் என்று கோயில் அறக்கட்டளை உறுப்பினர் அனில் மிஸ்ரா தெரிவித்தார்.

Story Written by: I. Jayachandran