ஆண்களுக்கான அழகுசாதன பொருட்கள் நிறுவனத்தில் முதலீடு செய்து லாபம் பார்த்த பாலிவுட் நடிகர்..

மும்பை: பிரபல பாலிவுட் ஸ்டார் ஆயுஷ்மான் குரானா புதிய நிறுவனங்களில் முதலீடு செய்வதில் கவனம் செலுத்தி வருகிறார். அந்த வகையில் அவர் தி மேன் கம்பெனி என்ற நிறுவனத்தில் முதலீடு செய்து 400 சதவீதம் வரை லாபம் கண்டிருப்பது தெரிய வந்துள்ளது.

தி மேன் கம்பெனி என்பது ஆண்களுக்கான ஒரு பிரீமியம் பிராண்ட் ஆகும். ஆண்களுக்கான பாடி ஸ்பிரே, அழகுசாதன பொருட்கள், சிகை அலங்கார பொருட்கள் உள்ளிட்டவற்றை விற்பனை செய்கிறது. இமானி லிமிடெட் நிறுவனம் 400 கோடி ரூபாய் மதிப்பீட்டில் தி மேன் கம்பெனியை வாங்கி உள்ளது.

இதன் மூலம் நடிகர் ஆயுஷ்மான் குரானாவுக்கு தன்னுடைய முதலீட்டில் சுமார் 400 சதவீத லாபம் கிடைத்துள்ளதாம். ஆயுஷ்மான் குரானாவை பொறுத்தவரை நடிப்பு மட்டுமல்லாது புதிய தொழில்களில் முதலீடு செய்வதிலும் கவனம் செலுத்துபவர்.

அந்த வகையில் 2018 ஆம் ஆண்டில் அவர் தி மேன் கம்பெனி என்ற நிறுவனத்தில் முதலீடு செய்தார். குறிப்பாக இந்தியாவில் ஆண்களுக்கான பிரீமியம் முறையிலான அழகுசாதன பொருட்களுக்கான தேவை அதிகரித்திருக்கின்ற நிலையில் தான் தி மேன் கம்பெனி உருவானது.

இந்த நிறுவனம் எதிர்பார்த்ததை விட அதிக வளர்ச்சியடைந்தது. இந்த நிறுவனத்தின் மீது நம்பிக்கை வைத்து ஆயுஷ்மான் குரானா கணிசமான தொகையை முதலீடு செய்திருந்தார். இந்த நிறுவனத்தில் முதலீடு செய்தது மட்டுமில்லாமல் நிறுவனத்தின் விளம்பர தூதராகவும் அவர் செயல்பட்டார்.

அவரது விளம்பரங்கள் மேன் கம்பெனி நிறுவனத்தை மிகப்பெரிய அளவில் மக்களிடம் கொண்டு சேர்த்தது. இந்த நிலையில் மேன் கம்பெனி நிறுவனத்தின் நோக்கம் ஆரம்பத்திலேயே தனக்கு தெளிவாக புரிந்து விட்டது என்றும் நிச்சயமாக இந்த நிறுவனம் வெற்றி பெறும் என்பதை உணர்ந்துதான் அதில் இணைந்ததாகவும் ஆயுஷ்மான் குரானா தெரிவித்துள்ளார். ஒரு முதலீட்டாளராக மட்டுமின்றி இதன் விளம்பர தூதராகவும் செயல்பட்டதில் தனக்கு பல்வேறு அனுபவங்கள் கிடைத்ததாக அவர் கூறியுள்ளார்.

இதனிடையே மேன் கம்பெனி நிறுவனத்தின் நிறுவனரான ஹித்தேஷ் தினரா, ஆயுஷ்மான் குரானா தங்களுடைய நிறுவனத்தில் முதலீட்டாளராக இணைந்த பிறகு தங்களுக்கு பெரிய அளவில் நம்பிக்கை கிடைத்ததாகவும் தங்களுடைய நிறுவன பொருட்களை நவீன இளைஞர்களிடம் கொண்டு சேர்த்ததில் ஆயுஷ்மான் குரானா முக்கிய பங்கு வகித்தார் என்றும் தெரிவித்துள்ளார்.

இதனிடையே தி மேன் கம்பெனி நிறுவனத்தின் வளர்ச்சியையும் இந்தியாவில் ஆண்களுக்கான பிரீமியம் பொருட்களுக்கான தேவை இருப்பதையும் உணர்ந்துள்ள இமாமி லிமிடெட் நிறுவனம் தி மேன் கம்பெனி நிறுவனத்தை வாங்கியுள்ளது.

கடந்த 2024 ஆம் நிதி ஆண்டில் மட்டும் இந்த நிறுவனம் 185 கோடி ரூபாயை வருமானமாக ஈட்டியுள்ளது. இந்த நிறுவனத்தின் பெரும்பாலான வருமானம் இகாமர்ஸ் தளங்கள் மூலமே கிடைத்ததாக தெரிகிறது.

Story written by: Devika