விப்ரோ சிஇஓ வெளியேறியதும்.. புதிய முதலீடு, அதுவும் இந்த நிறுவனத்தில்.. அசிம் பிரேம்ஜி அதிரடி..!!

இந்தியாவின் 4வது பெரிய ஐடி சேவை நிறுவனமான விப்ரோ-வில் சமீபத்தில் அதன் சிஇஓ தியரி டெலாபோர்ட் ராஜினாமா செய்த தகவல் ஒட்டுமொத்த ஐடி துறையை அதிர்ச்சியில் ஆழ்த்தியது. இவருடைய வெளியேற்றத்திற்கு அசிம் பிரேம்ஜி விப்ரோ-வின் மோசமான நிலை குறித்து நிர்வாக குழு கூட்டத்தில் பேசியது தான் காரணம் என கூறப்பட்டது.

இந்த அதிர்வுகள் முடிவதற்கு முன்பாக அசிம் பிரேம்ஜி முக்கியமான முதலீட்டைச் செய்ய திட்டமிட்டு உள்ளார்.

கிராபிக் டிசைன் மற்றும் போட்டோ எடிட்டிங் துறையில் பெரும் புரட்சியை ஏற்படுத்திய ஆஸ்திரேலியா நாட்டைச் சேர்ந்த கேன்வா (Canva) நிறுவனத்தில், விப்ரோ நிறுவனர் மற்றும் தலைவர் அசிம் பிரேம்ஜியின் சொந்த முதலீட்டு நிறுவனமான பிரேம்ஜி இன்வெஸ்ட், $50-$70 மில்லியன் வரை முதலீடு செய்ய திட்டமிட்டுள்ளதாகத் தகவல் வெளியாகியுள்ளது

கேன்வா நிறுவனம் சமீபத்தில் இரண்டாம் நிலை சந்தை பங்கு விற்பனையை நடத்தியது. இதில், 1.6 பில்லியன் டாலர் மதிப்பிலான பங்குகள், தற்போதைய பங்குதாரர்கள் மற்றும் புதிய பங்குதாரர்கள் மத்தியில் கைமாறியது.

இந்த பங்குகள் கேன்வா நிறுவனத்தை 26 பில்லியன் டாலர் மதிப்பீட்டில் கைமாறியது, இந்த விற்பனையில் தான் அசிம் பிரேம்ஜி-யின் பிரேம்ஜி இன்வெஸ்ட் பங்குகளை வாங்கியுள்ளதாகக் கூறப்படுகிறது. இதுவரையில் கேன்வா மற்றும் பிரேம்ஜி இன்வெஸ்ட் நிறுவன தரப்பில் எவ்விதமான அதிகாரப்பூர்வ அறிவிப்பும் வரவில்லை.

கேன்வா நிறுவனம் அடுத்த இரண்டு வருடங்களில் IPO வெளியிடத் திட்டமிட்டுள்ள நிலையில் $26 பில்லியன் மதிப்புள்ள நிறுவனத்தில், $50-$70 மில்லியன் முதலீடு செய்வது ஒரு சிறந்த வாய்ப்பாகப் பங்குச்சந்தை வல்லுனர்கள் பார்க்கின்றனர். ஆனால் அசிம் பிரேம்ஜி-யின் பிரேம்ஜி இன்வெஸ்ட்-ன் இந்த முதலீட்டுக்கு மற்றொரு கோணம் உள்ளது.

பிரேம் இன்வெஸ்ட் நிறுவனம் சமீபத்தில் அமெரிக்கத் தொழில்நுட்ப நிறுவனங்களில் முதலீடு செய்வதில் அதிக கவனம் செலுத்தி வருகிறது. குறிப்பாக, Generative AI துறையில் உருவாக்கியுள்ள புரட்சியில் பணம் பார்க்கும் இலக்குடன் இத்துறை சார்ந்த நிறுவனத்தில் முதலீடு செய்து வருகிறது.

சமீபத்தில் அசிம் பிரேம்ஜி-யின் பிரேம்ஜி இன்வெஸ்ட் அமெரிக்காவைச் சேர்ந்த ஹிப்போகிராடிக் AI (Hippocratic AI) என்ற AI நிறுவனத்தில் முதலீடு செய்ததைத் தொடர்ந்து கேன்வா நிறுவனத்தில் முதலீடு செய்து வந்துள்ளது. Hippocratic AI நிறுவனம் ஹெல்த்கேர் பிரிவில் இயங்கி வருகிறது.