பஜாஜ் ஃபைனான்ஸ் விட்டு வெளியேறிய அனுப் குமார்.. வெறும் 4 மாதத்தில் MD பதவி ராஜினாமா..!

இந்தியாவின் மிகப்பெரிய NBFC நிறுவனமான பஜாஜ் ஃபைனான்ஸ்-ன் நிர்வாக இயக்குநர் அனுப் குமார் சாகா தனது தனிப்பட்ட காரணங்களால் இப்பதவி விலகியுள்ளதாக நிறுவனம் அறிவித்துள்ளது. இவர் இப்பதவியில் நியமிக்கப்பட்டு வெறும் நான்கு மாதங்களிலேயே ராஜினாமா செய்துள்ளது பலரையும் அதிர்ச்சியில் ஆழ்த்தியுள்ளது.

அனுப் குமார் ராஜினாமா-விற்கு பின்னர், பஜாஜ் ஃபைனான்ஸ் நிர்வாகம் இப்பதவியில் ராஜீவ் ஜெயினை நிர்வாக இயக்குநராக நியமித்துள்ளது. இவருடைய பதவிக்காலம் 2028-ஆம் ஆண்டு மார்ச் 31-ஆம் தேதி வரை நீடிக்கும் எனவும் பஜாஜ் ஃபைனான்ஸ் நிர்வாகம் தனது அதிகாரப்பூர்வ அறிவிப்பில் தெரிவித்துள்ளது.

ராஜீவ் ஜெயின் தற்போது இந்நிறுவனத்தின் துணை தலைவராக பணியாற்றி வருகிறார், இந்த நிலையில் நிர்வாக இயக்குனர் பதவியோடு துணை தலைவர் பதவியிலும் தொடர்ந்து வகிக்க உள்ளார். இதில் முக்கியமான விஷயம் என்னவென்றால் ராஜீவ் ஜெயின் இதற்கு முன்பு நிர்வாக இயக்குநராக பணியாற்றியவர் என்பதால், இப்பதவிக்கு மீண்டும் அவரே பொறுப்பேற்பது வர்த்தகத்திலும், நிர்வாகத்திலும் பெரிய மாற்றங்கள் எதுவும் இருக்காது.

அனுப் குமார் சாகா 2017 ஆம் ஆண்டில் பஜாஜ் ஃபைனான்ஸில் சேர்ந்தார். இவர் நிதித்துறையில் சுமார் 32 ஆண்டுகளுக்கும் மேற்பட்ட அனுபவத்தை கொண்டவர். இவரது 25 ஆண்டு நிதி சேவை துறை அனுபவத்தில், 14 ஆண்டுகள் ஐசிஐசிஐ வங்கியிலும் மற்றும் 11 ஆண்டுகள் நான்கு வங்கி நிறுவனங்களில் பணியாற்றியுள்ளார்.

ICICI வங்கியில் மூத்த பொது மேலாளராக (Senior General Manager) பணியாற்றிய அனுப், ஐசிஐசிஐ வங்கி HFC மற்றும் TU CIBIL ஆகியவற்றின் நிர்வாக குழுவிலும் பணியாற்றியுள்ளார்.

அனுப் குமார் சாகாவின் பதவி விலகல் தனிப்பட்ட காரணங்களால் ஏற்பட்டிருந்தாலும், 2017 முதல் பஜாஜ் ஃபைனான்ஸ் நிறுவனத்திற்கு வழங்கிய பங்களிப்பு மிகவும் மதிப்பு மிக்கது.