100 பில்லியன் டாலரை தொட்ட 4வது இந்திய குடும்ப நிறுவனம்..!

உலகளவில் பல குடும்ப நிறுவனங்கள் உள்ளது அனைவருக்கும் தெரியும், ஆனால் தலைமுறைகளைக் கடந்து இந்த நிறுவனங்கள் தொடர்வது என்பது சாதாரண விஷயமில்லை. அப்படி இந்தியாவில் பல வருடங்களாக வெற்றிக்கொடி நாட்டி வரும் சில குடும்ப நிறுவனங்கள் 100 பில்லியன் டாலர் சந்தை மதிப்பீட்டை பெற்றுள்ளது.

இந்தியாவில் இதுவரை 100 பில்லியன் டாலர் சந்தை மதிப்பீட்டைப் பெற்ற நிறுவனங்கள் பட்டியலில் டாடா மற்றும் ரிலையன்ஸ் குழுமம் மட்டுமே இருந்தது. கடந்த ஆண்டுக் கௌதம் அதானி தலைமையிலான அதானி குழுமம் 100 பில்லியன் டாலர் பட்டியலில் இருந்த நிலையில் தற்போது புதிதாக ஒரு குடும்ப நிறுவனம் 100 பில்லியன் டாலர் மதிப்பீட்டை பெற்றுள்ளது.

இந்தியாவில் ஆட்டோமொபைல் முதல் கன்ஸ்யூமர் எலக்ட்ரானிக்ஸ், நிதி சேவை, காப்பீட்டு சேவை எனப் பல துறையில் இயங்கும் பஜாஜ் குழுமம் 100 பில்லியன் டாலர் சந்தை மதிப்பீட்டை பெற்று, இப்பட்டியலில் 4வது குழுமமாக இடம்பெற்றுள்ளது.

ஜூன் 25ஆம் தேதியே பஜாஜ் குரூப் 100 பில்லியன் டாலர் மதிப்பீட்டை பெற்ற நிலையில் டாலர் மதிப்பு உயர்வு காரணமாகச் சரிந்தது, இந்நிலையில் ஜூலை 6ஆம் தேதி மீண்டும் பஜாஜ் குரூப் 100 பில்லியன் டாலரை தொட்டுள்ளது.

இதன் மூலம் இந்தியாவில் 100 பில்லியன் டாலரை தொட்ட 4வது குடும்ப நிறுவனம் என்ற பெயரை பஜாஜ் பைனான்ஸ் பெற்றுள்ளது. இந்தியாவின் இரு சக்கர வாகன தயாரிப்பு மற்றும் விற்பனையில் முன்னோடியாக இருக்கும் பஜாஜ் ஆட்டோ தனது வர்த்தகத்தை விரிவாக்கம் செய்ய எலக்ட்ரிக் வாகன தயாரிப்பில் பெரிய அளவிலான முதலீட்டை செய்துள்ளது.