உலகிலேயே முதன்முறையாக CNG பைக் அறிமுகம் செய்த பஜாஜ்.. விலை இவ்வளவு தானா?

புனே: இந்தியாவின் முன்னணி வாகன தயாரிப்பு நிறுவனமான பஜாஜ் ஆட்டோ உலகின் முதல் சிஎன்ஜி இருசக்கர வாகனத்தை அறிமுகம் செய்துள்ளது. உலகின் மூன்றாவது பெரிய மோட்டார் சைக்கிள் உற்பத்தியாளராக இந்தியாவின் பஜாஜ் ஆட்டோ நிறுவனம் செயல்பட்டு வருகிறது.

மூன்றுசக்கர வாகனமான ஆட்டோ விற்பனையில் முதலிடத்தில் இருக்கிறது இந்நிறுவனம். உலகின் முதல் சிஎன்ஜி இருசக்கர வாகனத்தை தயாரித்து வருவதாகவும் விரைவில் அறிமுகம் செய்ய இருப்பதாகவும் அண்மையில் இதன் தலைவர் ராஜீவ் பஜாஜ் அறிவித்திருந்தார்.

இதன்படி புனேவில் நடைபெற்ற நிகழ்ச்சியில் பஜாஜ் ஆட்டோவின் சிஎன்ஜி பைக் ஃபீரிடம் 125 (Freedom 125) என்ற பெயரில் அறிமுகம் செய்யப்பட்டது. இதில் மத்திய போக்குவரத்து துறை அமைச்சர் நிதின் கட்கரி மற்றும் பஜாஜ் ஆட்டோவின் தலைவர் ராஜீவ் பஜாஜ் ஆகியோர் கலந்து கொண்டனர். மிகவும் எதிர்பார்க்கப்பட்ட இந்த சிஎன்ஜி பைக், இரண்டு எரிபொருள்களிலும் ஓடக் கூடியது. அதாவது சிஎன்ஜி-யிலும் பயன்படுத்தலாம், பெட்ரோலிலும் பயன்படுத்தலாம்.

ஆறு வண்ணங்களில் மற்றும் மூன்று வகைப்பாடுகளில் அறிமுகம் செய்யப்பட்டுள்ளது. பஜாஜ் ஆட்டோ நிறுவனத்தின் இணையதளம் மற்றும் டீலர்ஷிப் மூலமாக இந்த பைக்கிற்கான முன்பதிவினை செய்து கொள்ளலாம் என அறிவிக்கப்பட்டுள்ளது. மற்ற இருசக்கர வாகனங்களுடன் ஒப்பிடும்போது இந்த பைக்கின் பராமரிப்பு செலவு என்பது 50 சதவிகிதம் குறைவாக இருக்கும் என பஜாஜ் ஆட்டோ தெரிவித்துள்ளது.

ஃப்ரீடம் 125 பைக்கில் பெட்ரோல் டேங்க் மற்றும் அதற்கு கீழே 2 கிலோ எடை சிஎன்ஜி கொண்ட சிலிண்டர் பொருத்தப்பட்டுள்ளது. ஒரு சின்ன பட்டனை அழுத்தினாலே தானாகவே பெட்ரோல் மற்றும் சிஎன்ஜிக்கு இடையே மாற்றி கொள்ளும்.

ஃப்ரீடம்125 பிராண்டின் கீழ் ட்ரம்(Drum), ட்ரம் எல்இடி(Drum LED) மற்றும் டிஸ்க் எல்இடி (Disc LED) என மூன்று வகைகளில் விற்பனைக்கு வந்துள்ளது. இதில் அடிப்படை வகையான டிரம்மின் எக்ஸ் ஷோரூம் விலை 95,000 ரூபாய், ட்ரம் எல்இடி-இன் விலை 1.05 லட்சம் ரூபாய், டிஸ்க் எல்இடி-இன் 1.10 லட்சம் ரூபாய் என அறிவிக்கப்பட்டுள்ளது.

இந்த பைக்கை பொறுத்தவரை 125சிசி சிங்கிள் சிலிண்டர் என்ஜினை கொண்டுள்ளது. ஒரு கிலோ சிஎன்ஜி எரிவாயுவுக்கு இந்த பைக்கானது 213 கிலோ மீட்டர் மைலேஜ் தரும் என பஜாஜ் நிறுவனம் தெரிவித்துள்ளது. இந்த இருசக்கர வாகனத்தின் இருக்கையின் நீளம் என்பது 785 மில்லி மீட்டர்களாக இருக்கிறது. இது 9.5 PS பவர்( power) மற்றும் 9.7 Nm டார்க்( torque) உருவாக்கும் திறன் கொண்டிருக்கிறது.