ஜன.10 - இன்று வங்கி விடுமுறையா..? அடுத்த வாரம் 4 நாள் வங்கி இயக்காது - முழு விபரம்..!

இன்று ஜனவரி 10, 2026 அன்று வங்கி தொடர்பான பணிகளை செய்ய திட்டமிட்டிருந்தவர்கள் கவனிக்க வேண்டிய முக்கிய விஷயம் உள்ளது. இந்திய ரிசர்வ் வங்கி ஆண்டுதோறும் வெளியிடும் விடுமுறை அட்டவணையின்படி, வங்கிகள் சில நாட்களில் மூடப்பட்டிருக்கும். குறிப்பாக, மாதத்தின் இரண்டாவது மற்றும் நான்காவது சனிக்கிழமைகளில் வங்கிகள் செயல்படாது. இன்று ஜனவரி மாதத்தின் இரண்டாவது சனிக்கிழமை என்பதால், நாடு முழுவதும் உள்ள வங்கிகள் மூடப்பட்டுள்ளன.

2வது சனிக்கிழமை விடுமுறை விதி
ஆர்பிஐ விதிகளின்படி, மாதத்தின் முதல் மற்றும் மூன்றாவது சனிக்கிழமைகளில் வங்கிகள் திறந்திருக்கும். ஆனால் இரண்டாவது மற்றும் நான்காவது சனிக்கிழமைகளில் வங்கிகள் மூடப்பட்டிருக்கும். இந்த விதி நாடு முழுவதும் பின்பற்றப்படுகிறது.

இதனால், ஜனவரி 10 இரண்டாவது சனிக்கிழமை என்பதால் இன்று வங்கிகள் செயல்படாது. இதேபோல், ஜனவரி 24 அன்று வரும் நான்காவது சனிக்கிழமையும் வங்கிகள் மூடப்பட்டிருக்கும்.

ஜனவரி மாதத்தின் பிற விடுமுறைகள்
இந்த மாதத்தில் வங்கிகள் அனைத்து ஞாயிற்றுக்கிழமைகளிலும் மூடப்பட்டிருக்கும். ஜனவரி 11, 18 மற்றும் 25 ஆகிய ஞாயிற்றுக்கிழமைகளில் வங்கி சேவைகள் கிடைக்காது. இதுதவிர, ஜனவரி 26 அன்று குடியரசு தினம் என்பதால் திங்கட்கிழமை அன்று வங்கிகள் மூடப்பட்டிருக்கும். இந்த விடுமுறைகள் ஆர்பிஐ அட்டவணையின்படி நாடு முழுவதும் பொருந்தும்.

பொங்கல் பண்டிகை விடுமுறை
தமிழர் திருநாளான பொங்கல் பண்டிகை தினத்தில் வங்கிகள் மூடப்பட்டு இருக்கும். ஆர்பிஐ விடுமுறை அட்டவணைப்படி ஜனவரி 15, 16,17 ஆம் தேதிகளில் வங்கிகள் இயக்காது என அறிவிக்கப்பட்டு உள்ளது. இதை தொடர்ந்து 18ஆம் தேதி ஞாயிற்றுக்கிழமை என்பதாலும் வங்கிகள் இயங்காது. எனவே அடுத்த வாரம் 4 நாட்கள் வங்கிகள் தொடர்ந்து இயங்காது.

வங்கி தொடர்பான அவசர பணிகள் இருந்தால், இந்த விடுமுறை நாட்களை கருத்தில் கொண்டு திட்டமிடவும். ஆன்லைன் வங்கி சேவைகள், யுபிஐ, மொபைல் பேங்கிங் போன்றவை இயல்பாக செயல்படும் என்பதால், அவற்றை பயன்படுத்தலாம். ஆனால் வங்கி கிளைக்கு சென்று செய்து முடிக்க வேண்டிய பணிகள் இருந்தால், ஜனவரி 12, 13, 14 ஆகிய நாட்களில் முடித்துக்கொள்ளவும்.