திவாலானது FTX.. கிரிப்டோ முதலீட்டாளர்கள் பெரும் சோகம்..!

உலகின் இரண்டாவது பெரிய கிரிப்டோகரன்சி எக்ஸ்சேஞ்ச் நிறுவனமான FTX வீழ்ச்சி அடைந்த பிறகு கிரிப்டோ குமிழி தாறுமாறாக வெடிக்கத் துவங்கியது.

FTX தளம் வீழ்ந்த நிலையில் அதன் முதலீட்டாளர்கள் தங்கள் டோக்கன்களை விற்பனை செய்து பணத்தைத் திரும்பப் பெறக் கூட முடியவில்லை என்பது வருத்தமான விஷயமாக உள்ளது.

கடந்த 48 மணிநேரத்தில் பல முன்னணி கிரிப்டோகரன்சிகள் வீழ்ச்சி அடைந்து, கிரிப்டோ சந்தையில் மதிப்பு 100 பில்லியன் டாலர் அளவிலான வீழ்ச்சியை எதிர்கொண்டு உள்ளது.

சாம் பேங்க்மேன்-ஃப்ரைட்

சாம் பேங்க்மேன்-ஃப்ரைட்-ன் கிரிப்டோகரன்சி எக்ஸ்சேஞ்ச் தளமான FTX அமெரிக்காவில் திவாலானதாக அறிவித்து bankruptcy அறிக்கையை சமர்ப்பித்துள்ளது என FTX வெள்ளிக்கிழமை அறிக்கையை வெளியிட்டு உள்ளது.

சிஇஓ பதவி

இதோடு 30 வயதான முன்னாள் கிரிப்டோ பில்லியனர் FTX இன் தலைமை நிர்வாக அதிகாரி பதவியை ராஜினாமா செய்துள்ளார், மேலும் ஜான் ஜே ரே III அவரது இடத்தைப் பெறுவார் என்று அந்த அறிக்கையில் தெரிவிக்கப்பட்டுள்ளது.

FTX நிறுவனம்

FTX நிறுவனம் திவாலானது, FTX டோக்கன் அனைத்தும் மதிப்பற்றதாக மாறிவிட்டது என்றால் மிகையில்லை. கடந்த சில நாட்களில் FTX டோக்கன் மதிப்பு 98 சதவீதத்திற்கும் மேல் சரிந்துள்ளது. Binance போன்ற பிற முக்கியக் கிரிப்டோ எக்ஸ்சேஞ்ச் தளங்கள் FTX-ஐ பெறுவதில் இருந்து பின்வாங்கின. இதனால் முதலீட்டாளர்கள் தங்கள் முதலீட்டு தொகை குறித்த அச்சத்தில் உள்ளனர்.

Binance உதவி

FTX நிறுவனம் திவால் ஆவதில் இருந்து தப்பிக்க அனைத்து வழிகளையும் தேடி வந்த நிலையில் இந்நிறுவனத்தின் நிறுவனர் சாம் அமெரிக்காவில் திவாலானதாக அறிவித்து அறிக்கை சமர்ப்பித்து உள்ளார்.

Binance இத்தளத்தைக் காப்பாற்றும் என எதிர்பார்க்கப்பட்ட போது இந்த முயற்சி தோல்வியைச் சந்தித்தது குறிப்பிடத்தக்கது. இந்த நிலையில் FTX நிறுவனத்தைக் காப்பாற்ற தற்போது இருக்கும் ஓரே வழி புதிய முதலீடுகளைப் பெற வேண்டியது மட்டும் தான் என இருக்கும் நிலையில் திவாலானதாக அறிவிக்கப்பட்டது.

CoinDesk தகவல்

கிரிப்டோ செய்தி இணையத்தளமான CoinDesk ஆனது FTX நிறுவனத்தின் நிறுவனரான பாங்க்மேன்-ஃப்ரைடின் கிரிப்டோ வர்த்தக நிறுவனமான FTX, அதன் நேட்டிவ் டோக்கன்களான FTT ஐ பெரிதும் சார்ந்து இருப்பதாக அலமேடா ரிசர்ச் அமைப்பின் FTX நிறுவனத்தின் இருப்பு நிலை ஆய்வுகளை வெளியிட்டு பெரும் பரபரப்பை ஏற்படுத்தியது.

FTT இருப்பு விற்பனை

இதைத் தொடர்ந்து Binance சிஇஓ Changpeng Zhao, FTX நிறுவனத்தின் நேட்டிவ் டோக்கன்களான FTT இருப்பைத் தற்போது கசிந்த தகவல் அடிப்படையில் விற்பனை செய்துள்ளதாக அறிவித்தது. அடுத்த இரண்டு நாளில் அதாவது நவம்பர் 7-8 தேதிகளில் மட்டும் FTT டோக்கன் விலை 72 சதவீதம் சரிந்தது. நவம்பர் 10 ஆம் தேதி FTX நிறுவனத்தின் செயல்பாடுகள் அனைத்தும் முடக்கப்பட்டு முதலீட்டாளர்களின் பணத்தை ப்ரீஸ் செய்யப்பட்டது.

9.4 பில்லியன் டாலர் தேவை

இந்த நிலையில் FTX நிறுவனத்தைக் காப்பாற்ற  9.4 பில்லியன் டாலர் மதிப்பிலான தொகையை எதிர்பார்ப்பதாக FTX நிறுவனத்தின் நிறுவனரான பாங்க்மேன்-ஃப்ரைடின் நவம்பர் 9ஆம் தேதி தெரிவித்தார்.

மேலும் பஹாமாஸின் செக்யூரிட்டி கமிஷன் இந்நிறுவனத்தின் அனைத்து சொத்துக்களையும் முடக்கப்பட்டு உள்ளது கவனிக்க வேண்டிய ஒன்றாக உள்ளது.

FTX கிரிப்டோகரன்சி எக்ஸ்சேஞ்ச்

2019 மே அன்று முன்னாள் வால் ஸ்ட்ரீட் வர்த்தகர் சாம் பேங்க்மேன்-ஃப்ரைட் மற்றும் முன்னாள் கூகுள் ஊழியர் கேரி வாங் ஆகியோர் FTX.COM என்ற கிரிப்டோகரன்சி எக்ஸ்சேஞ்ச் தளத்தை FTX நிறுவனத்தின் வாயிலாக நிறுவினர். 2021 அக்டோபர் மாதம் முதலீட்டை ஈர்க்கும் போது FTX நிறுவன சுமார் 25 பில்லியன் டாலருக்கு மதிப்பிடப்பட்டது குறிப்பிடத்தக்கது.

பிட்காயின் விலை

காயின்டெஸ்க் தளத்தின் படி பிட்காயின் மதிப்பு இன்று 4.12 சதவீதம் சரிந்து 16.712 டாலருக்கும், எதிரியம் 4.41 சதவீதம் சரிந்து 1,230 டாலருக்கும், பினான்ஸ் காயின் 4.43 சதவீதம் சரிந்து 280.33 டாலருக்கும் வர்த்தகம் செய்யப்பட்டு வருகிறது.