பெங்களூரின் சாலை குழிக்குள் எத்தனை பேர் இருக்காங்களோ? ஸ்டார்ட்அப் நிறுவனரின் கலகல ட்வீட்!

பெங்களூரில் வசிக்கும் இணை நிறுவனர் ஒருவர் குண்டும் குழியுமாக இருக்கும் இடங்களை மதிப்பாய்வு செய்யக்கூடிய ஒரு அப்ளிகேஷனை உருவாக்க இருப்பதாக தனது அதிகாரப்பூர்வ X பக்கத்தில் பதிவிட்டிருந்தார். இவருடைய போஸ்டுக்கு கிரண் மஜும்தார்-ஷா மற்றும் மோகன்தாஸ் பாய் போன்ற வணிகத் தலைவர்கள் உட்பட நகரத்தில் உள்ள மக்கள் தங்கள் வரவேற்பை தெரிவித்தனர். பள்ளம் நிறைந்த சாலைகள் குறித்து அதிகாரிகளுக்கு தெரிந்தும் எந்தவித நடவடிக்கையும் எடுக்காமல் இருப்பதால் சிலர் தங்களுடைய விரக்தியை தெரிவித்தனர்.

செலவு மேலாண்மை நிறுவனமான பைலின் இணை நிறுவனரும் CTO-வுமான சிவராமகிருஷ்ணன் நாராயணன் என்பவர், "பெங்களூருவில் உள்ள குழிகளை மதிப்பிட ஒரு அப்ளிகேஷனை உருவாக்க திட்டமிட்டுள்ளோம். சமீபத்தில் ஒரு பெரிய குழியைப் பார்த்தேன். அதற்கு உரிய நடவடிக்கை எடுக்கப்படவில்லையே என்று வருத்தப்பட்டேன். அந்தக் குழிக்குள் யாரெல்லாம் இருக்கிறார்களோ? என்று போஸ்ட் செய்திருந்தார்.

இவர் காமெடியாக போஸ்ட் செய்த பதிவு, வேகமாக பகிரப்பட்டு அதிக அளவிலான லைக்குகள் மற்றும் ஷேர்களை குவித்தது. சிவராமகிருஷ்ணனின் யோசனை நகைச்சுவையாக இருந்தாலும், பலர் அவருடையக் கருத்தை ஆதரித்தனர்.

பலரும் இவருடைய யோசனைக்கு ஆதரவு தெரிவித்த நிலையில், சிலர் நகைச்சுவையாக கமெண்ட் செய்ய தொடங்கினர். ஒரு X பயனர் "மாதத்தின் சிறந்த குழி எது" என்பதை கண்டுபிடிக்கும் ஆப்ஷனையும், அது எவ்வாறு வாகனத்தின் டயரை சேதப்படுத்துகிறது என்ற திறனையும் அப்ளிகேஷனில் இணைக்க முடியுமா? என்று பதிவிட்டு இருந்தார்.

மற்றொரு X பயனர் ஒவ்வொரு குழிக்கும் ஒரு தனிப்பட்ட ஐடி கொடுங்கள். அந்த நகரத்தின் பின்கோடு, குழியை கண்டுபிடிக்க சீரியல் நம்பர் ஆகியவற்றை பயன்படுத்துங்கள். உதாரணமாக D110001_P00001 என்ற கோடை டெல்லிக்கு பயன்படுத்தலாம். டெல்லியின் பின்கோடு 110001, P என்பது குழியை குறிக்கிறது என்று எழுதியிருந்தார்.

மேலும் பல பயனர்களும் சிவராமகிருஷ்ணனிடம், இந்த அப்ளிகேஷனை நாடு முழுவதும் இல்லாவிட்டாலும் குண்டும் குழியுமாக இருக்கும் பிரச்சனைகளை சமாளிக்க மற்ற நகரங்களிலும் உருவாக்க வேண்டும் என்று கேட்டுக் கொண்டனர்.

இந்த அப்ளிகேஷனை மற்ற நகரங்களுக்கும் விரிவுபடுத்த வேண்டும். இங்கு நிறைய குழிகள் மறைக்கப்பட்டுள்ளன என்று ஒரு X பயனர் எழுதியிருந்தார். அப்படியே மும்பையையும் உங்கள் அப்ளிகேஷனில் சேர்த்துக் கொள்ளுங்கள் என்று மற்றொரு X பயனர் எழுதி இருந்தார்.

இன்ஃபோசிஸ் இணை நிறுவனரும் முன்னாள் தலைமை அதிகாரமான மோகன்தாஸ் பாய் கர்நாடகா அரசை கடுமையாக கண்டித்தார். பெங்களூரு வெளி வட்டச் சாலையில் வடிகால் மற்றும் போக்குவரத்து மோசமாக உள்ளது. அப்பகுதியில் அலுவலகங்களைக் கொண்ட பன்னாட்டு நிறுவனங்களுக்கு பெரும் கோபத்தை ஏற்படுத்துகிறது. நிலைமையை மேம்படுத்த அரசாங்கம் தக்க நடவடிக்கை எடுக்கவில்லை என்றால் இந்த நிறுவனங்கள் மாநிலத்திற்கு வெளியே உள்ள நகரங்களில் அலுவலகத்தை திறப்பது குறித்து பரிசீலிக்கலாம் என்று பதிவிட்டிருந்தார்.

பயோகான் நிறுவனரும் தலைவருமான கிரண் மஜும்தார்-ஷா கூட நகரின் சாலைகளின் நிலை குறித்து தனது கவலைகளை சமூக ஊடகங்களில் தெரிவித்திருந்தார்.