ராமேஸ்வரம் கஃபே திவ்யா-வின் துபாய் திட்டம்.. ஆனா சென்னைக்கு 'நோ நோ'

பெங்களூரில் இளைஞர்கள் முதல் பெரியவர்கள் வரையில் மசால் தோசைக்கும், இட்லிக்கும், நெய் பொடி தோசைக்கும் அடிமையாக்கியிருக்கும் ராமேஸ்வரம் கஃபே 4 வருடத்திற்கு முன்பு பெங்களூரில் சிறிய அளவில் துவங்கி இன்று இந்நகரின் அடையாளமாக மாறியுள்ளது. இந்த நிலையில் ராமேஸ்வரம் கஃபே உரிமையாளர்கள் தற்போது மிகப்பெரிய விரிவாக்க திட்டத்தை கையில் எடுத்துள்ளனர்.

ராமேஸ்வரம் கஃபே தற்போது பெங்களூரிலும், ஹைதராபாத்தில் மட்டுமே இயங்கி வரும் வேளையில் விரைவில் மும்பை, புனே, டெல்லி மற்றும் குஜராத் உள்ளிட்ட வட இந்திய மாநிலத்திலும் கால் பதிக்கவும், வேகமாக விரிவாக்கம் செய்யவும் திட்டமிட்டு உள்ளது.

இண்டர்நெட் வாயிலாகவும், மக்களின் வாயிலாகவும் குறுகிய காலத்தில் பெரிய அளவில் வளர்ச்சி அடைந்துள்ள ராமேஸ்வரம் கஃபே, அடுத்தடுத்து வளர்ச்சி திட்டத்தை வகுப்பது மட்டும் அல்லாமல் தனது பிராண்டு டிரெண்டிங் ஆக இருக்கும் போதே புதிய உச்சத்திற்கு செல்ல முடிவு செய்துள்ளது.

பெங்களூர் இந்திரா நகரில் புதிய கிளையைத் திறந்தபோது, ராமேஸ்வரம் கஃபே இணை நிறுவனரும் மேலாண்மை இயக்குநருமான திவ்யா ராகவேந்திர ராவ் தனது மாபெரும் விரிவாக்கத் திட்டம் குறித்து அறிவித்தார். இந்த புதிய கிளை இந்திரா நகர் பகுதியின் மிகவும் பிரபலமான 100 அடி சாலையில் அமைந்துள்ளது. 400 பேர் அமரக்கூடிய இடவசதியுடன் விரிவாக்கப்பட்ட மெனுவைக் கொண்டுள்ளது.

ராமேஸ்வரம் கஃபே வட இந்தியாவில் விரிவாக்கம் செய்வதோடு, ஹைதராபாத்தில் தனது கடை எண்ணிக்கையும் விரிவாக்கம் செய்ய திட்டமிட்டுள்ளது. 2025 ஆம் ஆண்டுக்குள் ஹைதராபாத்தில் ஒன்று அல்லது இரண்டு புதிய கிளைகளைத் திறக்க திட்டமிடப்பட்டுள்ளது. இதேவேளையில் கேரளா அல்லது தமிழ்நாடு சந்தைகளில் நுழைய எந்தத் திட்டமும் இல்லை என்பதையும் தெளிவுப்படுத்தியுள்ளது.

இதோடு நிற்காமல் ராமேஸ்வரம் கஃபே எல்லைகளை கடந்து அடுத்த ஆண்டின் இரண்டாம் பாதியில் துபாயில் தனது முதல் சர்வதேச கிளையைத் திறக்க தயாராகி வருகிறது. இந்த நடவடிக்கையின் மூலம் ராமேஸ்வரம் கஃபே பிராண்டின் மதிப்பு புதிய உச்சத்தை தொட உள்ளது. இது ராமேஸ்வரம் கஃபே வளர்ச்சி பாதையில் முக்கிய திருப்பமாக இருக்கும் எனவும் எதிர்பார்க்கப்படுகிறது.

ராமேஸ்வரம் கஃபே தற்போது பெங்களூரு சர்வதேச விமான நிலையத்தில் ஒரு கிளையைத் திறக்க உள்ளது குறிப்பிடத்தக்கது.