பெங்களூர்: 2006ல் விற்பனை செய்த நிலம்.. பணம்கேட்டு மிரட்டும் மகள்.. ஆடிப்போன உரிமையாளர்..!

பெங்களூருவில் கிட்டத்தட்ட இரண்டு தசாப்தங்களுக்கு முன்பு, அதாவது 2006 ஆம் ஆண்டில் நடந்த ஒரு நில விற்பனை, தற்போது ஒரு பெரிய சட்டப் பிரச்சினைக்கு வழிவகுத்துள்ளது. அன்றைய தினம் நிலத்தை விற்றவரின் மகள், இப்போது திடீரென களமிறங்கி, என் அனுமதி இல்லாமல் சொத்து விற்கப்பட்டது என்று கூறி, தற்போதைய உரிமையாளர்களுக்கு சட்டப்பூர்வ அறிவிப்பை அனுப்பியுள்ளார். இந்த வினோதமான சம்பவம் இணையத்தில் பெரும் அதிர்வலைகளை ஏற்படுத்தியுள்ளது.

சர்ச்சையைத் தூண்டிய விற்பனையும் தற்போதைய உரிமையாளர்களின் வாதமும்: பெங்களூரு மாநகரப் போக்குவரத்துக் கழக (BBMP) வரம்புக்குள் அமைந்துள்ள இந்தச் சொத்தை, தற்போது இழப்பீடு கோரும் பெண்ணின் தந்தையே விற்றுள்ளார். இந்த விவகாரத்தால் பாதிக்கப்பட்ட வாங்குபவர், 'ரெடிட்' (Reddit) தளத்தில் தனது அனுபவத்தைப் பகிர்ந்து கொண்டுள்ளார். அவரது கூற்றுப்படி, நிலத்தின் அசல் விற்பனையாளர் நேரடியாக விற்பனையை முடித்துள்ளார்.

இந்தச் செயல்பாட்டில் 'வக்காலத்து அதிகாரம்' (Power of Attorney - POA) போன்ற எந்த ஒரு வழக்கறிஞர் அதிகாரமும் பயன்படுத்தப்படவில்லை. அன்றிலிருந்து, அதாவது 2006 முதல், அவர்கள் தவறாமல் சொத்து வரி செலுத்தி வருகின்றனர் என்றும், மேலும் நிலத்தின் காத்தா சான்றிதழ் (Khata Certificate) தங்கள் தந்தையின் பெயரில் இருப்பதாகவும் வாங்குபவர் உறுதியாகக் கூறுகிறார்.

மகள் முன்வைக்கும் விசித்திரமான வாதம்: இப்போது, 19 ஆண்டுகளுக்குப் பிறகு, விற்பனையாளரின் மகள், "இந்த விற்பனைக்கு முன்பு என்னிடம் கேட்கப்படவில்லை எனவும், எனக்குத் தெரிவிக்கப்படவில்லை என்றும் கூறி இழப்பீடு கோருகிறார். மேலும் ஆச்சரியமளிக்கும் விதமாக, அந்த நேரத்தில் தான் மைனர் (Minor) அதாவது 18 வயதுக்குக் குறைந்தவராக இல்லை என்றபோதிலும், அவர் இழப்பீடு கேட்பது பலரையும் குழப்பத்தில் ஆழ்த்தியுள்ளது. நிலத்தை வாங்கியவர்களின் கூற்றுப்படி, விற்பனையாளரே தனது மகளின் திருமண ஏற்பாடுகளுக்காகத்தான் நிலத்தை விற்றதாகத் தெரிவித்துள்ளார். இப்படித் தெரிந்தே நடந்த ஒரு விற்பனையில், பல ஆண்டுகளுக்குப் பிறகு மகள் உரிமை கோருவது விசித்திரமாகப் பார்க்கப்படுகிறது.

மாறிவரும் அறிக்கைகளும் சட்ட அழுத்தங்களும்: ஆரம்பத்தில், விற்பனையாளரின் மகன் இது ஒரு குடும்ப விவகாரம் என்றும், சுமுகமாகத் தீர்த்துக்கொள்ளப்படும் என்றும் கூறியுள்ளார். ஆனால் சில மாதங்களுக்குப் பிறகு, அவரது நடவடிக்கை முற்றிலுமாக மாறியது. வாங்குபவர்களிடம் நாங்கள் சட்ட நடவடிக்கை எடுப்போம், நீங்கள் ஒரு வழக்கறிஞரைப் பார்த்துக்கொள்ளுங்கள் என்று மிரட்டியதாக கூறப்படுகிறது.

அதேபோல், சமீபத்தில் மீண்டும், விற்பனையாளரின் மகன் இப்போது நீதிமன்றத்திற்கு வெளியே ஒரு சமரசத்திற்கு அழுத்தம் கொடுத்து வருகிறார். நீதிபதி அவளுக்குச் சாதகமாகத் தீர்ப்பளித்தால் என்ன செய்வது? போன்ற லேசான அச்சுறுத்தல்களையும் அவர் பயன்படுத்துவதாகக் கூறப்படுகிறது. தீர்வு காண அழுத்தம் கொடுக்கப்படுவதாக உணர்ந்த வாங்குபவர், விற்பனையாளரின் மகன் இதே போன்ற பிரச்சினைகளைத் தனிப்பட்ட முறையில் தீர்க்க, வாங்குபவர்கள் பணம் செலுத்திய வேறு சில வழக்குகளையும் மேற்கோள் காட்டியதாகக் குறிப்பிட்டார்.

சட்ட ஆலோசனை மற்றும் நெட்டிசன்கள் கருத்து: இந்த விவகாரம் குறித்து சட்ட நிபுணர்களிடம் ஆலோசனை பெற்றபோது, வாங்குபவருக்கு அவர்கள் சரியான விற்பனைப் பத்திரங்கள் மற்றும் ஆவணங்களை வைத்திருப்பதால், அவர்கள் சட்ட ரீதியாக வலுவான நிலையில் இருப்பதாக வழக்கறிஞர்கள் உறுதியளித்துள்ளனர்.

ரெடிட் (Reddit) தளத்தில் இந்த விவகாரம் பகிரப்பட்ட இந்த பதிவில், பல பயனர்கள் வாங்குபவருக்கு ஆதரவளித்தனர். ஒரு பயனர், அனைத்து ஆவணங்களும் சரியாக இருந்தால் மற்றும் அரசுப் பதிவுகளுடன் பொருந்தினால், நீங்கள் கவலைப்படத் தேவையில்லை என்று கூறினார். மற்றொரு பயனர், இது ஒரு குடும்ப பரம்பரை பிரச்சினையின் ஒரு பகுதியாக இருக்கலாம் என்று எச்சரித்தார்.

அதாவது, சொத்துப் பங்கில் விடுபட்ட மகள், நேரடியாகத் தன் குடும்பத்திடம் சண்டையிடாமல், வாங்குபவர்கள் மூலம் தனது பங்கைக் கோர முயற்சிக்கிறார் என்றும் அவர் கருத்துத் தெரிவித்தார். இந்தச் சம்பவம், சொத்து ஆவணங்களைச் சரிபார்ப்பதன் முக்கியத்துவத்தையும், நீண்ட காலத்திற்குப் பிறகு எழும் சட்டச் சிக்கல்களையும் வெளிச்சம் போட்டுக் காட்டுகிறது என்றும் கூறியுள்ளார்.