சொன்னா நம்பமாட்டீங்க.. இந்தியாவிலேயே அதிக சைவ உணவு ஆர்டர் செய்யும் ஊர் இதுதான்..!

பிரபல உணவு டெலிவரி நிறுவனமான ஸ்விக்கி இந்தியாவிலேயே எந்த நகரத்தில் அதிக அளவிலான சைவ உணவுகள் ஆர்டர் செய்யப்படுகின்றன என்ற தகவலை வெளியிட்டுள்ளது. இந்தியாவில் ஸ்விக்கி, ஸோமேட்டோ உள்ளிட்ட செயலிகளை பயன்படுத்தி நாம் நமக்கு பிடித்த உணவகங்களில் இருந்து உணவுகளை ஆர்டர் செய்து நமது வீட்டிலேயே டெலிவரி பெற முடிகிறது. அந்த வகையில் ஆன்லைன் டெலிவரி சேவையில் முன்னணியில் இருக்கிறது ஸ்விக்கி.

ஸ்விக்கி நிறுவனம் இந்தியாவின் எந்த நகரத்தில் சைவ உணவுகளுக்கான ஆர்டர்கள் அதிகம் கிடைக்கப்பெற்றன என்ற தகவலை வெளியிட்டுள்ளது. பெரும்பாலானவர்கள் சைவ உணவுக்கான ஆர்டர்கள் ஹரித்வார், மதுரா, அயோத்தி ஆகிய நகரங்களில் இருந்து வந்திருக்கலாம் என எண்ணலாம். ஆனால் ஸ்விக்கி வெளியிட்டுள்ள தகவலின்படி இந்தியாவில் பெங்களூரு நகரத்தில் தான் அதிகளவிலான சைவப் பிரியர்கள் இருப்பது தெரியவந்துள்ளது.

ஸ்விக்கி நிறுவனத்திற்கு கிடைத்த மூன்றில் ஒரு சைவ உணவு ஆர்டர் பெங்களூர் நகரத்திலிருந்து வந்திருப்பதாக தெரிவித்துள்ளது. பெங்களூரு இந்தியாவின் சிலிக்கான் வேலி என அழைக்கப்படும் நிலையில் அதனை வெஜ் வேலி என அழைக்கும் அளவிற்கு அங்கே சைவ பிரியர்கள் அதிகமாக இருக்கின்றனர். அதன்படி பெங்களூருவில் ஸ்விக்கியில் ஆர்டர் செய்யப்பட்ட மிக பிரபலமான சைவ உணவுகளாக இருப்பவை மசாலா தோசை, பன்னீர் பிரியாணி மற்றும் பன்னீர் பட்டர் மசாலா ஆகும்.

குறிப்பாக காலை உணவுக்காக ஆர்டர் செய்பவர்கள் பெரும்பாலும் மசாலா தோசை, வடை, இட்லி மற்றும் பொங்கல் ஆகியவற்றையே விரும்புகின்றனர். பெங்களூரை தவிர்த்து இந்தியா முழுவதுமே பிரபலமாக இருக்கக்கூடிய காலை உணவு மசாலா தோசை என்கிறது ஸ்விக்கி வெளியிட்டுள்ள தகவல். சைவ உணவு ஆர்டர்களை பெறும் நகரங்களில் மும்பை இரண்டாவது இடத்தில் இருக்கிறது. இங்கே தால் கிச்சடி , மார்கரிட் பீட்சா மற்றும் பாவ் பாஜி ஆகியவை முதல் மூன்று இடங்களை பிடித்திருக்கின்றன.

இந்த பட்டியலில் ஹைதராபாத் நகரம் மூன்றாவது இடத்தில் இருக்கிறது. இங்கே மசாலா தோசை மற்றும் இட்லி பிரியர்கள் அதிகமாக இருக்கின்றனர். இந்தியா முழுவதுமே பிரபலமான ஒரு சைவ உணவாக மசாலா தோசை இருப்பதாக ஸ்விக்கி தெரிவித்துள்ளது.

மேலும் ஸ்நாக்ஸ் வகைகளில் மார்கரிட் பீட்சா முதலிடத்திலும், சமோசா இரண்டாமிடத்திலும் உள்ளது. பாவ் பாஜி இந்த பட்டியலில் மூன்றாமிடத்தை பிடித்துள்ளது. மேலும் சைவ உணவு பிரியர்கள் பெரும்பாலானவர்கள் சாலட்களை ஆர்டர் செய்வதும் அதிகரித்துள்ளதாக ஸ்விக்கி தெரிவித்துள்ளது.

Story written by: Devika