முடிவுக்கு வந்த சகாப்தம்.. பெங்களூரு மக்களை கவர்ந்த KFC சிக்னல் அடையாளம் மாற்றம்.. என்ன காரணம்..?

ஒவ்வொரு பெரிய நகரத்திலும், அப்பகுதி மக்களுக்கு வழி சொல்லவும், பழைய நினைவுகளை அசைபோடவும் பயன்படும் சில பிரத்யேகமான அடையாளங்கள் இருக்கும். அது ஒரு கோயில் கோபுரமாக இருக்கலாம் அல்லது ஒரு பிரம்மாண்டமான விளம்பர அமைப்பாக இருக்கலாம். அப்படியான ஒரு உணர்வுப்பூர்வமான அடையாளம்தான், இந்தியாவின் சிலிக்கான் வேலி என்று அழைக்கப்படும் பெங்களூரு நகரின் இந்திராநகர் பகுதியில் இருந்த 'KFC பக்கெட்' விளம்பரம்.

இந்திரா நகர் பகுதியில் வசிக்கும் மக்களுக்கும், அப்பகுதியில் நாள்தோறும் பயணிக்கும் பொதுமக்களுக்கும் அதிர்ச்சி கலந்த ஏமாற்றம் ஏற்பட்டுள்ளது. பல ஆண்டுகளாக இந்திரா நகர் சந்திப்பின் தனித்துவமான அடையாளமாக விளங்கிய KFC சிக்னல் தற்போது தன் அடையாளத்தை இழந்து வருகிறது.

அந்தச் சிக்னலுக்கு மேலே வானுயர நின்ற பிரம்மாண்டமான KFC பக்கெட் வடிவ விளம்பரம் அகற்றப்பட்டு, அதற்குப் பதிலாகப் புதிய அமைப்பு நிறுவப்படுகிறது. இந்த மாற்றம், நீண்ட காலமாக அப்பகுதியில் வசிப்பவர்களுக்கு 'ஒரு சகாப்தம் முடிந்துவிட்டது' என்ற ஒரு உணர்வை கொடுத்துள்ளது.

பல ஆண்டுகளாக, அந்த KFC பக்கெட் விளம்பரம் வெறும் ஒரு கடையின் அடையாளமாக மட்டும் இருக்கவில்லை. அது பெங்களூருவின் போக்குவரத்து மற்றும் கலாச்சார வாழ்க்கையுடன் பின்னிப்பிணைந்த ஒரு வழிகாட்டியாக இருந்ததாக சொல்லப்படுகிறது. "அந்த KFC சிக்னலில் லெஃப்ட் எடுங்க", "KFC பக்கெட் கிட்ட வெயிட் பண்றேன்" என்று வழி சொல்வதற்குக் கூட இந்தச் சந்திப்பின் பெயர் பயன்படுத்தப்பட்டது. மக்கள் மத்தியில் இவ்வளவு ஆழமாக வேரூன்றியிருந்த அந்த அடையாளம் இப்போது அகற்றப்படுவது, ஆன்லைனில் பலரது உணர்ச்சிப்பூர்வமான நினைவுகளை தூண்டியுள்ளது.

இணையத்தில் பரவும் பதிவுகள் : சமூக வலைத்தளங்களில் பலரும் தங்கள் நினைவுகளைப் பகிர்ந்து வருகின்றனர். ஒரு பயனர், "KFC சிக்னல் தனது முக்கிய அடையாளமான KFC-ஐ இழந்துவிட்டது" என்று பதிவிட, அதற்குப் பதிலளித்த மற்றொருவர், "ஐயோ! என் குழந்தைப் பருவம் முழுவதும் அங்கேதான் கழிந்தது. அந்த விளம்பரம் திறந்தபோது கூட நான் அங்கிருந்தேன். மிகவும் வருத்தமாக இருக்கிறது" என்று தனது ஆழ்ந்த சோகத்தை பதிவு செய்துள்ளார். மேலும், பலர் இது இந்திரா நகர் பகுதியின் பழைய நினைவுகளின் முடிவு என்றும், காலப்போக்கில் நகர்ப்புறம் எவ்வளவு மாறிவிட்டது என்பதன் குறியீடு என்றும் கருத்து தெரிவித்தனர்.

"மெட்ரோ வருவதற்கு முந்தைய CMH ரோடு நாட்கள் முடிந்துவிட்டன" என்று ஒருவர் பதிவிட அதற்கு மற்றொருவர், "அப்படியானால், இனிமேல் 'பிஸ்ஸா ஹட் சிக்னல்' என்று அழைக்க வேண்டுமோ?" என்று வேடிக்கையாகவும் கேள்வி எழுப்பினார். இந்த மாற்றம் இருந்தாலும், பல பெங்களூரு மக்கள் தங்களின் நினைவில் அந்தச் சந்திப்பை எப்போதும் "KFC சிக்னல்" என்றே தொடர்ந்து அழைப்பார்கள் என்பதில் யாருக்கும் சந்தேகமில்லை. இது பெங்களூரின் மாறாத நினைவுகளை சுமந்து நிற்கும் ஒரு முக்கியமான தருணமாக உள்ளது.