மெகா திட்டத்துடன் ரூ.15,000 கோடிக்கு பத்திரம் வெளியிட்டு நிதி திரட்டுகிறது ஏர்டெல்!!

பாரதி ஏர்டெல் நிறுவனத்தின் தாய் நிறுவனமான பாரதி டெலிகாம், நடப்பு நிதியாண்டின் மிகப்பெரிய கடன் பத்திர விற்பனையை அடுத்த வாரம் தொடங்கவுள்ளது. இந்த ஆண்டின் மிகவும் எதிர்பார்க்கப்படும் ஒரு பத்திர வெளியீட்டாக இது இருக்கும் என கருதப்படுகிறது.

பாரதி டெலிகாம் நிறுவனம், ரூ. 15,000 கோடி ($1.7 பில்லியன்) நிதி திரட்ட திட்டமிட்டுள்ளது. இரண்டு ஆண்டுகள் மற்றும் மூன்று ஆண்டுகள் இரண்டு மாதங்களில் முதிர்ச்சியடையும் கடன் பத்திரங்கள் மூலம் இந்த நிதி திரட்டப்படவுள்ளது. இந்த வெளியீடுகளுக்கு முறையே ஆண்டுக்கு 7.35% மற்றும் 7.45% வட்டி செலுத்தப்படும் என பாரதி டெலிகாம் அதிகாரிகள் கூறுகின்றனர்.

இந்த கடன் பத்திரங்களை மியூச்சுவல் ஃபண்டுகள் பெருமளவில் வாங்கும் என எதிர்பார்க்கப்படுகிறது. சில வெளிநாட்டு வங்கிகள் மற்றும் தனியார் வங்கிகளும் இதில் ஆர்வம் காட்டுவதாகவும் வங்கி அதிகாரிகள் தெரிவிக்கின்றனர். கடந்த நான்கு ஆண்டுகளில், பாரதி டெலிகாம் நிறுவனத்திற்கு இதுவே மிகவும் மலிவான நிதி திரட்டும் முறையாக இருக்கும்.

2025-ல் இந்திய ரிசர்வ் வங்கியின் ரெப்போ வட்டியில் 100 அடிப்படை புள்ளிகள் குறைக்கப்பட்டதும், நிறுவனத்தின் கடன் பத்திரங்கள் CRISIL ரேட்டிங்ஸ் மூலம் AAA தரத்திற்கு உயர்த்தப்பட்டதும் செலவுகளைக் குறைக்க உதவியுள்ளன.

இந்தக் கடன் பத்திர விற்பனை வெற்றிகரமாக அமைந்தால், இது நடப்பு ஆண்டின் மிகப்பெரிய கடன் பத்திர வெளியீடாக இருக்கும். கடந்த 2024 நவம்பரில், பாரதி டெலிகாம் ரூ. 11,150 கோடியை கடன் பத்திர விற்பனை மூலம் திரட்டியது.

"பெரும்பாலான நிதி மறுநிதியளிப்புக்கு பயன்படுத்தப்படும் என்றாலும், கணிசமான பகுதி மூலதனச் செலவுகளுக்காகப் பயன்படுத்தப்படும்" என்று ஒரு வங்கி அதிகாரி கூறினார். நவம்பர்-டிசம்பர் மாதங்களில் ரூ.9,750 கோடி மதிப்பிலான கடன் பத்திரங்கள் முதிர்ச்சியடைய உள்ளன. மேலும், 2027 முதல் 2034 வரை முதிர்ச்சியடையவுள்ள ரூ. 16,150 கோடி மதிப்பிலான கடன் பத்திரங்களும் நிறுவனத்திடம் உள்ளன.

Disclaimer: இந்த செய்தியில் இருக்கும் கருத்துகள் மற்றும் பரிந்துரைகள் தனிப்பட்ட ஆய்வாளர்கள் அல்லது நிறுவனங்களின் சொந்த கருத்துகளாகும், இவை Goodreturns.in அல்லது Greynium Information Technologies Private Limited (இவை இரண்டும் "நாங்கள்" என குறிப்பிடப்படுகிறது) ஆகியவற்றின் கருத்துகளைப் பிரதிபலிக்கவில்லை. உள்ளடக்கத்தின் துல்லியம், முழுமை அல்லது நம்பகத்தன்மைக்கு நாங்கள் எந்தவொரு உத்தரவாதம் அளிக்கவோ, அங்கீகரிக்கவோ அல்லது பொறுப்பேற்கவோ மாட்டோம். மேலும், முதலீட்டு ஆலோசனை அல்லது பங்குகளை வாங்கவோ விற்கவோ எந்த வித தூண்டுதலையும், ஊக்கத்தையும் நாங்கள் வழங்கவில்லை. அனைத்து தகவல்களும் புரிதல் நோக்கங்களுக்காக மட்டுமே வழங்கப்படுகின்றன. எந்தவொரு முதலீட்டு முடிவுகளை எடுப்பதற்கு முன்பும், அங்கீகரிக்கப்பட்ட நிதி ஆலோசகர்களிடமிருந்து தனிப்பட்ட முறையில் சரிபார்க்கப்பட வேண்டும்.