ஓரே இரவில் 3,500 டாலர் உயர்ந்த பிட்காயின்.. $56,563-ஐ தொட்டு புதிய சாதனை..!

பிட்காயின் மற்றும் இதர முன்னணி கிரிப்டோகரன்சி மீதான முதலீடுகளும், பிரபலங்களின் தொடர் ஆதரவும் வெள்ளிக்கிழமை இரவு வர்த்தகம் அதாவது அமெரிக்காவின் வெள்ளிக்கிழமை வர்த்தக சந்தையில் அதீத முதலீட்டின் காரணமாக ஓரே இரவில் சுமார் 3,500 டாலர் அளவிலான வளர்ச்சியை அடைந்துள்ளது.

நேற்று மாலையில் வர்த்தகத்தில் 53,000 டாலருக்கு வர்த்தகம் செய்யப்பட்ட பிட்காயின் அமெரிக்க வர்த்தக சந்தை துவங்கிய பின்பும் குறுகிய காலத்தில் அதிகப்படியான முதலீடு பெற்ற காரணத்தால் சுமார் 3,500 டாலர் அளவில் உயர்ந்து 56,563 டாலர் என்ற புதிய உச்சத்தை அடைந்துள்ளது.

இதன் மூலம் கடந்த 24 மணிநேரத்தில் 9 சதவீத வளர்ச்சியும், 2020ல் சுமார் 90 சதவீத வளர்ச்சியும் அடைந்துள்ளது. ஜனவரி 1ஆம் தேதி பிட்காயின் மதிப்பு வெறும் 29,111.52 டாலருக்கு விற்பனை செய்யப்பட்ட நிலையில் தற்போது உலகளவில் முதலீட்டாளர்கள் மிகுந்த ஆர்வத்துடன் முதலீடு செய்து வரும் காரணத்தால் தற்போது 56,563 டாலர் அளவீட்டை அடைந்துள்ளது.

சமீபத்தில் பிட்காயினுக்கு டெஸ்லா, மாஸ்டர்கார்டு, BNY மெலன் என பல முன்னணி நிறுவனங்கள் ஆதரவு தெரிவித்த நிலையில், பேஸ் இசை கலைஞரான ஜீனி சிம்மனஸ் கார்டானோ கிரிப்ரோகரன்சியின் மீது சுமார் 3 லட்சம் டாலர் அளவிலான முதலீட்டை செய்துள்ளார்.

இதனால் இசை ரசிகர்கள் மத்தியில் கிரிப்டோகரன்சி மீது முதலீடு செய்ய ஆர்வம் தூண்டப்பட்டு உள்ளது. மேலும் பல முன்னணி முதலீட்டாளர்களும் தற்போது பிட்காயின் மற்றும் இதர கிரிப்டோகரன்சி மீது முதலீடு செய்ய ஆர்வம் காட்டுவதால் தொடர்ந்து உயரும் என எதிர்பார்க்கப்படுகிறது.