மீண்டும் 110 டாலரை கடந்த கச்சா எண்ணெய் விலை.. அப்போ பெட்ரோல், டீசல் விலை என்ன ஆகும்?

உலகளவில் கச்சா எண்ணெய் விலை மீண்டும் கடுமையாக உயர தொடங்கியுள்ளது. ஈரான் போர் காரணமாக உலக சந்தையில் கச்சா எண்ணெய் விநியோகம் மோசமான நிலையை எட்டியுள்ளது. இதனால் மே மாதத்திற்கு பின் மீண்டும் கச்சா எண்ணெய் விலை உயர்ந்துள்ளது.

பிரெண்ட் கச்சா எண்ணெய் விலை சுமார் 3.7% உயர்ந்து ஒரு பீப்பாய் 110 டாலரை தொட்டது. இந்த ஆண்டு தொடக்கத்திலிருந்து இதுவரை கச்சா எண்ணெய் விலை 70 சதவீதத்திற்கும் மேலாக அதிகரித்துள்ளது. ஈரான் போர் தான் இதற்கு முதன்மையான காரணம். மே மாதத்திற்கு பின் குறைந்து வந்த கச்சா எண்ணெய் விலை மீண்டும் உயர தொடங்கி இருபது அதிர்ச்சியை ஏற்படுத்தியுள்ளது.

ஈரானின் நிலவும் போர் குறிப்பாக டிரம்ப் பெரிய தாக்குதலுக்கு திட்டமிடுவதாக வெளியான தகவல் இதற்கு முக்கிய காரணம். அதே போல ஹவுதி கிளர்ச்சியாளர்கள் தொடர்ச்சியாக சவுதி அரேபியா மீது நடத்தி வரும் தாக்குதல்கள், வளைகுடா பிராந்தியத்தில் இன்னும் பதற்றத்தை ஏற்படுத்தி, கச்சா எண்ணெய் விநியோகத்தில் பெரும் அச்சத்தை ஏற்படுத்தியுள்ளன.

ரஷ்யா மீதான உக்ரைனின் தொடர் தாக்குதல்கள் , குறிப்பாக ரியாசான் எண்ணெய் சுத்திகரிப்பு ஆலை மீதான தாக்குதல் ரஷ்யாவின் எரிபொருள் ஏற்றுமதி மற்றும் விநியோகத்தை முடக்கியுள்ளன. மேலும், அமெரிக்காவுக்கும் ரஷ்யாவுக்கும் இடையே டீசல் விநியோகம் தொடர்பாக திட்டமிடப்பட்டிருந்த ஒப்பந்தங்களை தடுக்க எதிர்க்கட்சியினர் திட்டமிடுவது ஆகியவையும் கச்சா எண்ணெய் விலை ஏற்றத்துக்கு காரணம்.

கச்சா எண்ணெய் விலை உயர்வால் உலக சந்தையில் டீசல் மற்றும் பெட்ரோல் தொடர்பான futures ஒப்பந்தங்களும் கடுமையாக உயர்ந்துள்ளன. நியூயார்க்கில் டீசல் விலை கேலனுக்கு $4.90 ஆக நிலைபெற்றுள்ளது. இதுவரை இல்லாத மிக உயர்ந்த விலையில் எரிபொருள்கள் வர்த்தகமாகி வருகின்றன.

கச்சா எண்ணெய் விலையை கட்டுப்படுத்த அமெரிக்கா பல்வேறு முயற்சிகளை எடுத்து வருகிறது. அவசரகால கையிருப்பில் இருந்து மில்லியன் கணக்கான பீப்பாய் எண்ணெயை விடுவிக்க திட்டமிட்டுள்ளது. இருப்பினும், உலகளவில் தொடரும் போர்கள் மற்றும் விநியோக சங்கிலி தடையால் விலை ஏற்றத்தை தடுக்க முடியவில்லை.

கச்சா எண்ணெய் விலை உயர்வது இந்தியாவுக்கு கெட்ட செய்தி. ஏனெனில் இந்தியா மொத்தமாக கச்சா எண்ணெயை இறக்குமதி செய்து தான் பெட்ரோல், டீசலாக மாற்றி பயன்படுத்துகிறது. எனவே கச்சா எண்ணெய் விலை உயர்ந்தால் இந்தியாவில் பெட்ரோல், டீசல் விலைகள் உயரும். இது நேரடியாக பல்வேறு பொருட்களின் விலைவாசிகளை உயர்த்தும்.