அட்டகாசமான திட்டத்தை அறிமுகப்படுத்திய BSNL.. ரீசார்ஜ் கட்டண உயர்வுக்கு மத்தியில் இப்படி ஒரு திட்டமா?

ஜியோ, ஏர்டெல், வோடபோன் ஐடியா போன்ற பிரபலமான டெலிகாம் ஆப்ரேட்டர்கள் ஜூலை மாதம் ரீசார்ஜ் கட்டண உயர்வை அறிவித்தன. இதனால் பலரின் பார்வையும் BSNL பக்கம் திரும்பியது. ஏனெனில் BSNL மலிவான விலையில் ரீசார்ஜ் கட்டணங்களை வழங்குகிறது. தற்போது BSNL, அதன் பயனர்களுக்கு உதவும் வகையில் ஒரு புதிய திட்டத்தை அறிமுகப்படுத்தியுள்ளது.

பிரபல இந்திய தொலைத்தொடர்பு நிறுவனமான BSNL, சமூக ஊடகங்களில் கணிசமான கவனத்தை ஈர்த்து, நாடு முழுவதும் அதன் 4G சேவைகளை வழங்கத் தயாராகி வருகிறது. ஜூலை 2024-இல் தனியார் தொலைத்தொடர்பு ஆபரேட்டர்கள் தங்கள் கட்டணங்களை உயர்த்தியதை அடுத்து இந்த நடவடிக்கை எடுக்கப்பட்டுள்ளது. BSNL-இன் சிறப்பான சலுகைகளில் ஒன்று 395 நாட்களுக்கு செல்லுபடியாகும் ரீசார்ஜ் திட்டம் தான்.

ரூ. 2,399 திட்டத்தின் விவரங்கள்: BSNL-இன் இந்தப் புதிய திட்டம், ரூ. 2,399 விலையில் கிடைக்கிறது. அப்படியானால் மாதத்திற்கு ரூ. 200 தோராயமாக செலவாகும். இதன் மூலம் வாடிக்கையாளர்கள் ஒரு நாளைக்கு 2 ஜிபி அதிவேக டேட்டா, தினமும் 100 இலவச SMS மற்றும் நாடு முழுவதும் உள்ள அனைத்து நெட்வொர்க்குகளிலும் வரம்பற்ற அழைப்புகளை பெற முடியும். கூடுதலாக, Zing Music, BSNL Tunes, Hardy Games, Challenger Arena Games மற்றும் Gameon Astrotell போன்ற சேவைகளையும் சேர்த்து வழங்குகிறது.

தனியார் ஆபரேட்டர்களின் ரீசார்ஜ் கட்டண உயர்வுகளின் தாக்கம்: இதற்கிடையில், தனியார் தொலைத்தொடர்பு நிறுவனங்களான ரிலையன்ஸ் ஜியோ, ஏர்டெல் மற்றும் வோடபோன் ஆகியவை சமீபத்தில் பல திட்டங்களின் விலைகளை உயர்த்தியுள்ளன. இது ப்ரீபெய்ட் மற்றும் போஸ்ட்பெய்ட் வாடிக்கையாளர்களைக் கடுமையாக பாதித்துள்ளது. விலை உயர்வுகள் இருந்தபோதிலும், இந்த நிறுவனங்கள் மாதாந்திர மற்றும் வருடாந்திர திட்டங்களை தொடர்ந்து வழங்குகின்றன.

ஏர்டெல்லின் திட்டங்கள்: ஏர்டெல் பல்வேறு பிரபலமான திட்டங்களில் விலைகளை மாற்றியமைத்துள்ளது. 28 நாட்களுக்கு 1 நாளைக்கு 1GB டேட்டா வழங்கும் திட்டம், இப்போது ரூ. 265-இல் இருந்து ரூ. 299 என்ற விலையில் கிடைக்கிறது. 28 நாட்களுக்கு 1 நாளைக்கு 1.5 GB டேட்டா வழங்கும் திட்டம், இப்போது ரூ. 299-இல் இருந்து ரூ. 349 என்ற விலையில் கிடைக்கிறது.

28 நாட்களுக்கு 1 நாளைக்கு 2 GB டேட்டா வழங்கும் திட்டம், இப்போது ரூ. 409-க்கு கிடைக்கிறது. முன்பு இந்தத் திட்டம் ரூ. 359-க்கு கிடைத்தது. 84 நாட்களுக்கு 1.5 GB டேட்டா வழங்கும் திட்டம் ரூ. 719-இல் இருந்து ரூ. 859-ஆக அதிகரிக்கப்பட்டுள்ளது. மேலும் 84 நாட்களுக்கு 2 GB டேட்டா வழங்கும் திட்டம் ரூ. 979 ஆக இருந்தது. முன்பு இதே திட்டம் ரூ. 839-க்கு கிடைத்தது. கூடுதலாக, 365 நாட்களுக்கு 2.5 GB டேட்டா வழங்கும் திட்டம் இப்போது ரூ. 3,599-ஆக உள்ளது. இது முன்பு ரூ. 2,999-ஆக இருந்தது.

ரிலையன்ஸ் ஜியோவின் திட்டங்கள்: ரிலையன்ஸ் ஜியோவும் அதன் கட்டணங்களை அதிகரித்துள்ளது. முன்பு ரூ. 1,559 மற்றும் ரூ. 2,999 விலையில் இருந்த திட்டங்கள், இப்போது ரூ. 1,899 மற்றும் ரூ. 3,599-க்கு கிடைக்கிறது. 28 நாட்களுக்கு 2 GB டேட்டா வழங்கும் திட்டம், இப்போது ரூ. 299-இல் இருந்து ரூ. 349 ஆகவும், 28 நாட்களுக்கு 1.5 GB டேட்டா வழங்கும் திட்டம் ரூ.239-இல் இருந்து ரூ. 299 ஆகவும் அதிகரித்துள்ளது.

BSNL தனது 4G சேவைகளை அறிமுகப்படுத்தத் தயாராகி வரும் நிலையில், இந்தியாவின் தொலைத்தொடர்புத் துறைகளில் கடுமையான போட்டி நிலவுகிறது. இனி வரும் நாட்களில் எந்த திட்டங்களை மக்கள் அதிகம் பயன்படுத்துவார்கள்? எந்த டெலிகாம் நிறுவனங்களுக்கு ஆதரவு தருவார்கள்? என்பது இன்னும் சில நாட்களில் தெரியவரும்.