வெறும் ரூ.1-க்கு 30 நாட்கள் அன்லிமிடெட் சேவை! BSNL-ன் அதிரடி 'ஃப்ரீடம் ஆஃபர்'.!!

இந்தியாவில் தனது 4ஜி நெட்வொர்க் பயன்பாட்டை நாடு முழுவதும் நிறைவு செய்துள்ள பிஎஸ்என்எல் (BSNL), ஒரு புதிய மற்றும் அசத்தலான திட்டத்தை அறிமுகப்படுத்தியுள்ளது. அதிக வாடிக்கையாளர்களை ஈர்க்கும் வகையில், வெறும் ரூ.1 விலையில், ஒரு மாத செல்லுபடியாகும் 'ஃப்ரீடம் ஆஃபர்' என்ற சிறப்புத் திட்டத்தை BSNL அறிவித்துள்ளது. இது, வாடிக்கையாளர்களுக்கு உண்மையான டிஜிட்டல் சுதந்திரத்தை அனுபவிக்க ஒரு வாய்ப்பை வழங்குவதாக நிறுவனம் தெரிவித்துள்ளது. இந்த அதிரடி அறிவிப்பு, தொலைத்தொடர்பு சந்தையில் மற்ற நிறுவனங்களிடையே பெரும் பரபரப்பை ஏற்படுத்தியுள்ளது.

ரூ.1 திட்டத்தின் முழு விவரங்கள்: இந்தச் சிறப்புத் திட்டத்தின் மூலம், வெறும் ரூ.1 ரீசார்ஜ் செய்து, முழு 30 நாட்களுக்கு பிஎஸ்என்எல்-இன் 4ஜி சேவைகளை அனுபவிக்கலாம்.

இந்த திட்டத்தில் உள்ள அம்சங்கள்: தினமும் 2 ஜிபி அதிவேக டேட்டா

தேசிய ரோமிங்குடன் இந்தியா முழுவதும் வரம்பற்ற வாய்ஸ் கால்ஸ்

ஒரு நாளைக்கு 100 இலவச எஸ்எம்எஸ்

இவை அனைத்தும் வெறும் ஒரு ரூபாய்க்கான சாதாரண ரீசார்ஜில் கிடைக்கின்றன. ஒரு மாதத்திற்குப் பிஎஸ்என்எல் நெட்வொர்க்கை முழுமையாக அனுபவித்து, அதன் சேவையின் தரத்தை சோதித்துப்பார்க்க இது ஒரு சிறந்த வாய்ப்பாக அமைகிறது.

புதிய பயனர்களுக்கு இலவச சிம் கார்டு: பிஎஸ்என்எல், இந்தச் சலுகையை மேலும் கவர்ச்சியாக்க, புதிய வாடிக்கையாளர்களுக்கு இலவச 4ஜி சிம் கார்டையும் வழங்குகிறது. புதிய சந்தாதாரர்கள் எந்தவிதக் கூடுதல் செலவும் செய்ய வேண்டியதில்லை. அருகிலுள்ள பிஎஸ்என்எல் சில்லறை விற்பனையாளர் அல்லது பொது சேவை மையத்தை (CSC) அணுகி, சிம் கார்டை வாங்கி, இந்தத் திட்டத்தை உடனடியாகச் செயல்படுத்திக்கொள்ளலாம். இந்த இலவச சிம் கார்டு வழங்குவதன் மூலம், புதிய பயனர்களை எளிதாகத் தனது நெட்வொர்க்கில் இணைக்க BSNL திட்டமிட்டுள்ளது. தினமும் 2ஜிபி டேட்டா வரம்பு முடிந்தபிறகு, இணைய வேகம் 40kbps ஆகக் குறைக்கப்படும். இருப்பினும், அழைப்புகள் மற்றும் எஸ்எம்எஸ் சேவைகள் தொடர்ந்து கிடைக்கும்.

சலுகையின் காலக்கெடுவும் அதன் நோக்கமும்: BSNL-ன் இந்த 'ஃப்ரீடம் ஆஃபர்' ஒரு குறிப்பிட்ட காலச் சலுகையாக, ஆகஸ்ட் 1 முதல் ஆகஸ்ட் 31 வரை மட்டுமே நாடு முழுவதும் கிடைக்கும். சுதந்திர தினத்தைக் கொண்டாடும் வகையில், இந்தியாவின் சொந்தமாக உருவாக்கப்பட்ட 4G தொழில்நுட்பத்தை குடிமக்கள் அனுபவிக்க ஒரு வாய்ப்பை வழங்குவதே இந்த முயற்சியின் நோக்கம் என்று நிறுவனம் தெரிவித்துள்ளது. இந்தத் திட்டம், BSNL-இன் 4ஜி நெட்வொர்க்கில் சேரத் திட்டமிடுபவர்களுக்கு ஒரு சிறந்த தொடக்க நிலை வாய்ப்பாக அமையும் என்பதில் சந்தேகமில்லை.