வருமான வரி விலக்கு வரம்பு ரூ.4 லட்சமாக அதிகரிக்குமா? புதிய மற்றும் பழைய வரி முறை வரம்பு என்ன?

2023-2024-ஆம் நிதியாண்டிற்கான பொருளாதார ஆய்வறிக்கை இன்று வெளியிடப்பட்டது. இந்நிலையில் நிதியமைச்சர் நிர்மலா சீதாராமன் 2024 முதல் 2025-ஆம் நிதியாண்டிற்கான முழு பட்ஜெட்டை நாளை காலை 11 மணியளவில் தாக்கல் செய்ய உள்ளார். வரி விலக்கு மற்றும் வரி விலக்கு வரம்புகளை உயர்த்துவது உள்ளிட்ட வருமான வரி அறிவிப்புகள் குறித்து எதிர்பார்ப்புகள் அதிகரித்து இருப்பதால், நாளை அறிவிப்பு வெளியாகுமா? என்று மக்கள் ஆர்வமாக காத்திருக்கின்றனர்.

புதிய வரி விதிப்பு முறையில் பழைய வரி முறையை விட குறைவான வரி விலக்குகள் இருந்தாலும், வரி விகிதங்கள் குறைவாக இருக்கும். 2023-ஆம் ஆண்டு பட்ஜெட்டில் நிதியமைச்சர் நிர்மலா சீதாராமன் புதிய வரி விதிப்பு முறையில் வரி விலக்கை அதிகரித்தார்.

முன்பு வரை இந்த வரி விதிப்பு முறையில் வருமான வரி விலக்கு ரூ. 2.5 லட்சமாக இருந்தது. ஆனால், 2023-ஆம் ஆண்டு பட்ஜெட்டில் வரி விலக்கு உச்சவரம்பு ரூ.50,000 அதிகரிக்கப்பட்டு ரூ. 3 லட்சமாக மாற்றப்பட்டது. புதிய வரி விதிப்பு முறையில், இப்போது ஆண்டு வருமானம் ரூ.3 லட்சம் வரை உள்ளவர்கள் எந்தவித வருமான வரியும் செலுத்த வேண்டியதில்லை.

வருமான வரி ஸ்லாப்	பழைய வரி முறை	புதிய வரி முறை
0 - 2,50,000	0%	0%
2,50,001 - 3,00,000	5%	0%
3,00,001 - 5,00,000	5%	5%
5,00,001 - 6,00,000	20%	5%
6,00,001 - 9,00,000	20%	10%
9,00,001 - 10,00,000	20%	15%
10,00,001 - 12,00,000	30%	15%
12,00,001 - 15,00,000	30%	20%
15,00,001 & Above	30%	30%

60 வயதுக்கு மேல் உள்ள மூத்த குடிமக்களுக்கு, பழைய வரி முறையின் கீழ் வருமான வரியில் ரூ. 3,00,000 வரை விலக்கு அளிக்கப்பட்டுள்ளது. 80 வயதுக்கு மேல் உள்ள உயர் மூத்த குடிமக்களுக்கு ரூ. 5,00,000 வரையிலான வருமானத்திற்கு விலக்கு அளிக்கப்பட்டுள்ளது.

யூனியன் பட்ஜெட் 2023-2024-இல் என்ன எதிர்பார்க்கப்படுகிறது?: Tax Connect Advisory Services LLP-இன் பங்குதாரரான விவேக் ஜலான் கூறுகையில் புதிய வரி முறையில் வரி விலக்கு வரம்பு தற்போதைய ரூ.3 லட்சத்திலிருந்து குறைந்தது ரூ.4 லட்சமாக நீட்டிக்கப்படும் என்று எதிர்பார்க்கப்படுவதாக கூறியுள்ளார்.

மேலும், ரூ.15 லட்சத்திற்கு மேற்பட்ட வருமானம் கொண்ட வரி செலுத்துபவர்கள் இன்னும் பழைய முறையையே கடைப்பிடித்து வருகின்றனர். அரசாங்கம் அவர்களையும் புதிய வரி முறைக்கு மாற்றுவதற்கான வழிவகைச் செய்யும் என்றும் எதிர்பார்க்கப்படுகிறது. எனவே, புதிய வரி முறையில் ரூ.15 லட்சம் முதல் ரூ.18 லட்சம் வரையிலான வருமானம் பெறுபவர்களுக்கு 25 சதவீத வரி விகிதம் இருக்கலாம் என்றும் ஜலான் கூறியுள்ளார்.

தனிநபர்கள், HUF-கள் போன்றோருக்கான புதிய வரி முறையின் வரி விலக்குகள் அதிகரிக்கப்பட்டு, மேலும் பலர் புதிய வரி முறைக்கு மாறுவதற்கு வழிவகுக்கும்.

இது சம்பளம் பெறும் வகுப்பினரின் கையில் அதிக பணப்புழக்கத்தை ஏற்படுத்தும். இது நுகர்வோர் செலவை அதிகரித்து, நாட்டின் மொத்த உள்நாட்டு உற்பத்தியை அதிகரிப்பதோடு, அதிகரித்து வரும் தேவையை பூர்த்தி செய்ய வேலைவாய்ப்பை உருவாக்குவதை ஊக்குவிக்கும் என்று ஜலான் கூறியுள்ளார்.