பட்ஜெட் 2026: அமைச்சர் நிர்மலா சீதாராமன் இதுவரை கொண்டு வந்த முக்கியமான வரி சீர்த்திருத்தங்கள் என்ன?

மத்திய நிதி அமைச்சர் நிர்மலா சீதாராமன், வரும் பிப்ரவரி 1ஆம் தேதி தனது ஒன்பதாவது மத்திய பட்ஜெட்டை தாக்கல் செய்யவுள்ளார். கடந்த ஐந்து ஆண்டுகளில் இந்தியாவின் வரி விதிப்பு முறையில் அவர் கணிசமான மாற்றங்களை கொண்டு வந்துள்ளார். இந்த பட்ஜெட்டில் வருமான வரி தொடர்பான முக்கிய அறிவிப்புகளை வெளியிடுவாரா என்ற எதிர்பார்ப்பு சம்பளம் பெறுவோர் மத்தியில் அதிகரித்துள்ளது.

பட்ஜெட் 2026-க்கு முன்னதாக, நிர்மலா சீதாராமனின் கடந்தகால பட்ஜெட்டுகள், ஊதியதாரர்களுக்கு ரூ 12.75 லட்சம் வரை வரிச்சலுகைகளை வழங்கியுள்ளன. இதில் ரூ75,000 நிலையான விலக்கு உள்ளடங்கும். இது நடுத்தர வர்க்கத்தினருக்கு நிவாரணமளித்தது. பட்ஜெட் 2023இல் , ரூ7 லட்சம் வரையிலான வருமானத்திற்கு வரி விலக்கு அளிக்கும் எளிதாக்கப்பட்ட வரி முறையை அறிவித்தார். நிலையான விலக்குடன், ரூ.7.5 லட்சம் வரை வருமானம் ஈட்டுவோர் புதிய வரி முறையில் வரி செலுத்தத் தேவையில்லை.

புதிய வரி விதிப்பு முறை: 2020ஆம் ஆண்டு பட்ஜெட்டில் விருப்பமான சலுகை வரி விகிதங்களுடன் இதை அறிமுகப்படுத்தியது. இது சில பிடித்தங்களின் பலன்களை நீக்கியது. பின்னர், பட்ஜெட் 2023 இதை இயல்புநிலையாக மாற்றியது. இதனால், வரி செலுத்துவோர் பழைய முறையைத் தேர்ந்தெடுக்காத வரை, புதிய முறையிலேயே தாக்கல் செய்வது கட்டாயமாக்கப்பட்டது.

மூலதன ஆதாய வரிச் சீர்திருத்தங்கள்: பட்ஜெட் 2024, குறுகிய கால மற்றும் நீண்ட கால மூலதன ஆதாயங்களின் வரி விதிப்பில் விரிவான மாற்றங்களைக் கொண்டு வந்தது. சில நிதிச் சொத்துக்களுக்கான குறுகிய கால மூலதன ஆதாய (STCG) விகிதம் 15% லிருந்து 20% ஆக உயர்த்தப்பட்டது.

பட்ஜெட் 2024-க்கு முன், ரூ1 லட்சத்துக்கும் அதிகமான பங்குகள் மீதான நீண்ட கால மூலதன ஆதாய (LTCG) வரி 10% ஆக இருந்தது. இருப்பினும், சொத்து மற்றும் கடன் பரஸ்பர நிதி போன்ற பிற சொத்துக்களில் இருந்து வரும் LTCG, குறியீட்டுச் சலுகையுடன் 20% வரிக்கு உட்பட்டது. பணவீக்கத்திற்கு ஏற்ப செலவுகளை சரிசெய்வதன் மூலம் இந்த சலுகை வரிப் பொறுப்பைக் கணிசமாகக் குறைத்தது.

பட்ஜெட் 2024, அனைத்துச் சொத்து வகைகளிலும் LTCG-ஐ 12.5% ஆக ஒரே மாதிரியாக மாற்றியது. குறியீட்டுச் சலுகையை நீக்கியதுடன், விலக்கு வரம்பை ரூ1.25 லட்சமாக உயர்த்தியது. மேலும், LTCG மற்றும் STCG-க்கு தகுதி பெற, பட்டியலிடப்பட்ட பங்குகள், பத்திரங்கள் போன்ற சொத்துக்களுக்கு ஒரு வருடம் (12 மாதங்கள்) என்றும், ரியல் எஸ்டேட், தங்கம் போன்ற பிற சொத்துக்களுக்கு இரண்டு ஆண்டுகள் (24 மாதங்கள்) என்றும் வைத்திருக்கும் காலத்தை மறுவரையறை செய்தது.

நிலையான விலக்கு மற்றும் புதிய வரி அடுக்குகள்: பட்ஜெட் 2024-இல், நிதி அமைச்சர் புதிய வரி விதிப்பு முறையின் கீழ் சம்பளம் பெறும் ஊழியர்களுக்கான நிலையான விலக்கை ரூ75,000 ஆக உயர்த்தினார். குடும்ப ஓய்வூதிய விலக்கு ரூ15,000-இலிருந்து ரூ25,000 ஆக உயர்த்தப்பட்டது. புதிய வரி அடுக்குகளாக, ரூ3 லட்சம் வரை வரி இல்லை; ரூ3-7 லட்சம் வரை 5% வரி; மற்றும் ரூ7-10 லட்சம் வரை 10% வரி விதிக்கப்படும்.

கிரிப்டோ சொத்துக்கள் மீதான வரி: பட்ஜெட் 2022, மெய்நிகர் டிஜிட்டல் சொத்துக்கள் மீது 30% வரியை விதித்தது. அத்துடன், இந்தச் சொத்துக்களை மாற்றுவதற்கு கூடுதலாக 1% TDS (ஆதாரத்தில் வரி பிடித்தம்) விதிக்கப்படும் என அறிவித்தது.

மறுமதிப்பீடுகளை மீண்டும் தொடங்குதல்: பட்ஜெட் 2021, மறுமதிப்பீடுகளை மீண்டும் தொடங்குவதற்கான கால வரம்பை ஆறு ஆண்டுகளில் இருந்து மூன்று ஆண்டுகளாகக் குறைத்தது. ரூ50 லட்சம் அல்லது அதற்கு மேற்பட்ட வருமானத்தை மறைக்கும் கடுமையான வரி ஏய்ப்பு வழக்குகளில், 10 ஆண்டுகள் வரை மறுமதிப்பீடுகளை மீண்டும் திறக்கலாம் எனத் தெளிவுபடுத்தப்பட்டுள்ளது.