இந்திய பொருளாதாரத்தின் அடிப்படை வலுவாக இருக்கிறது..! CEA கருத்து..!

ஏற்றுமதி சரிவு, வியாபார சரிவு, வங்கிகளில் நிதி நெருக்கடி, என் பி எஃப் சி நிறுவனங்கள் திவால் ஆவது, ஜி எஸ் டி வரி செலுத்திய வியாபாரிகளுக்கு தகுந்த நேரத்தில் வரி ரீஃபண்ட் கொடுக்காதது, தேவை & நுகர்வு குறைவு, வேலை இல்லா திண்டாட்டம் என பல பிரச்னைகள் இந்தியாவில் அழுத்தமாக கால் ஊன்றி இருக்கின்றன.

எனவே செப்டம்பர் 2019 காலாண்டுக்கு, இந்தியாவின் புள்ளியியல் அமைச்சகம் வெளியிட்ட 4.5 சதவிகித ஜிடிபி வளர்ச்சியை யாராலும் மறைக்க முடியவில்லை. மறுக்கவும் முடியவில்லை.

அடுத்து வரும் காலாண்டில் நல்ல வளர்ச்சி இருக்கும் எனச் சொல்லி இருக்கிறார் இந்தியாவின் முதன்மைப் பொருளாதார ஆலோசகர் கிருஷ்ணமூர்த்தி சுப்ரமணியன்.

இந்தியாவின் அடிப்படை பொருளாதாரம் (Fundamental) மிக வலுவாக இருக்கின்றன, எனவே இந்தியாவின் ஜிடிபி தரவுகளும் வரும் 2019 - 20 நிதி ஆண்டின் மூன்றாவது காலாண்டில் இருந்து அதிகரிக்கலாம் எனச் சொல்லி இருக்கிறார் முதன்மை பொருளாதார ஆலோசகர் கிருஷ்ணமூர்த்தி சுப்ரமணியன்.

இவரைத் தொடர்ந்து மத்திய பொருளாதார விவகாரத் துறையின் செயலராக இருக்கும் அதானு சக்ரபர்த்தி "இந்தியாவில் இந்த ஆண்டில், இந்தியாவுக்கு வரும் முதலீடுகள் பாசிட்டிவாகத் தான் இருக்கின்றன" எனவும் சொல்லி இருக்கிறார்.

மறு பக்கம், கடந்த அக்டோபர் 2019-க்கான இந்தியாவின் எட்டு முக்கிய துறைகளின் வளர்ச்சி, அக்டோபர் 2018 காலத்துடன் ஒப்பிடும் போது, 5.8 சதவிகிதம் சரிவைக் கண்டு இருக்கிறது.

இந்தியாவின் ஒட்டு மொத்த தொழிற் துறை வளர்ச்சியில் சுமாராக 40 சதவிகிதத்துக்கு மேல் பிரதிபலிப்பது இந்த முக்கிய எட்டு துறைகள் தான் என்பதும் குறிப்பிடத்தக்கது. இந்திய தொழிற் துறை வளர்ச்சி சரியும் போது ஜிடிபி மட்டும் ஏற்றம் காணுமா என்ன..?

கடந்த 25 ஆண்டுகளில் பொருளாதார வளர்ச்சியை மட்டுமே கணக்கில் எடுத்துக் கொண்டு இயங்கி வந்த சீனாவின் ஜிடிபி கூட, தன் 27 ஆண்டுகளில் இல்லாத அளவுக்கு சரிவைக் கண்டு இருக்கிறது.என்பதையும் இங்கு பதிவு செய்ய வேண்டி இருக்கிறது. ஆனால் நம் பொருளாதார ஆலோசகரோ... இந்தியாவின் அடிப்படை பொருளாதாரம் (Fundamental) வலுவாக இருப்பதாகச் சொல்கிறார். எது எப்படியோ... இந்திய பொருளாதாரம் வளர்ந்தால் சரி.