புதுசா வீடு கட்ட போறீங்களா.. உங்களுக்கு ஒரு ஷாக் நியூஸ்..!

வீட்டைக் கட்டிப்பார் கல்யாணம் பண்ணிப்பார் என்பதற்கு ஏற்ப நம்முடைய கனவு வீட்டைக் கட்டி முடிப்பதற்குள் பல பிரச்சனைகளை எதிர்கொள்ள வேண்டியுள்ளது, ஒரு பக்கம் வங்கிக் கடன், கட்டுமான ஒப்புதல் போன்றவை இருந்தாலும், மறுபுறம் கட்டுமான பொருட்களின் விலை உயர்வு பெரும் தலைவலியாக உள்ளது.

டிசம்பர் தொடக்கத்திலிருந்து இந்தியாவில் பெரும்பாலான இடத்தில் சிமெண்ட் விலை கணிசமாக உயர்ந்துள்ளது பல வீட்டு கட்டுவோரை சோகத்தில் ஆழ்த்தியுள்ளது. இந்தியாவில் பல மாதங்களாக சிமெண்ட் விலை உயராமல் இருந்த வேளையில் தற்போது திடீரென உயர்ந்துள்ளது ரியல் எஸ்டேட் துறையில் பெரும் பாதிப்பை ஏற்படுத்தியுள்ளது.

இந்த விலை உயர்வு குறித்து சிமெண்ட் டீலர்கள் கூறுகையில், நாட்டின் உள்கட்டமைப்புத் துறையில் அதிகரித்துள்ள டிமாண்ட் அடிப்படையாகக் கொண்டு விலை உயர்த்தப்பட்டு உள்ளது என தெரிவித்துள்ளனர். இந்தியாவில் கடந்த சில மாதங்களாக சிமெண்ட் துறையில் நிறுவன கைப்பற்றல் அதிகமாக இருந்த காரணத்தால் தற்போது இதன் தாக்கம் எதிரொலிக்கிறது.

இந்திய சிமெண்ட் உற்பத்தியில் ஆதித்யா பிர்லா குழுமம் முதல் இடத்தில் இருந்தாலும், அதானி சிமெண்ட் பிரிவு இத்துறையில் வேகமாக வளர்ச்சி அடைந்து வருகிறது. தற்போது கைப்பற்றப்பட்ட நிறுவனங்கள் அனைத்தும் பெரும் தொகைக்கு வாங்கப்பட்டதால் இதன் தாக்கம் சிமெண்ட் விலையில் எதிரொலிக்கும் என்பது முன்பே கணிக்கப்பட்டது தான் என்றாலும், இது அடுத்த வருடம் தான் நடைமுறைக்கு வரும் என கூறப்பட்டது. ஆனால் டிசம்பர் மாதமே விலை உயர்வு நடைமுறைக்கு வந்துள்ளது பலரையும் அதிர்ச்சியில் ஆழ்த்தியுள்ளது.

தற்போது சிமெண்ட் நிலை அதிகமாக உயர்ந்துள்ளது மேற்கு இந்தியாவில் தான், அங்கு 50 கிலோ சிமெண்ட் பேக் ரூ.5-10 வரை அதிகரித்துள்ளன.

மேற்கு இந்தியாவில் சிமெண்டின் புதிய விலை வரம்பு 50 கிலோ பைக்கு ரூ.350 முதல் ரூ.400 வரை உள்ளது. டெல்லியில், விலைகள் ஒரு பேக் ரூ.20 அதிகரித்து, பிராண்ட் மற்றும் தரத்தைப் பொறுத்து ஒரு பேக்கிற்கு ரூ.340 முதல் ரூ.395 வரை உள்ளது.

தென்னிந்தியாவில், சிமெண்ட் விலைகள் வரலாற்று ரீதியாக குறைவாக இருந்த இடத்தில், டீலர்கள் ஒரு சிமெண்ட் பேக்கிற்கு ரூ.40 வரை விலையை உயர்த்தியுள்ளனர், தற்போதைய விலை 50 கிலோ பைக்கு சுமார் ரூ.320 ஆக உள்ளது. நாட்டின் தெற்கு மற்றும் கிழக்கு பகுதிகளில், விலை உயர்வுகள் குறைவாக இருந்தாலும், அவை தொடர்ந்து அதிகரிக்கும் வாய்ப்புகள் இருப்பதாக தெரிகிறது.