8வது சம்பள கமிஷனை விடுங்க.. இப்படியொரு விஷயம் நடக்கபோகுது..!! அரசு ஊழியர்களே ரெடியா..?!

இந்தியா முழுவதும் இருக்கும் மத்திய அரசு ஊழியர்களும், ஓய்வூதியதாரர்களும் 8வது சம்பள கமிஷன் அறிவிப்புக்காக காத்திருக்கும் வேளையில், ஒவ்வொரு வருடமும் 2 முறை மாற்றப்படும் அகவிலைப்படி மற்றும் அகவிலைப்படி நிவாரணம் ஜனவரி மாதத்திற்கு மத்திய அரசு அறிவிக்க உள்ளது.

2026 ஜனவரி முதல் அமலாகும் அகவிலைப்படி உயர்வுக்கு நவம்பர் மாதத்தின் AICPI-IW தரவு வெளியாகியுள்ளது. இது லட்சக்கணக்கான ஊழியர்கள் மற்றும் ஓய்வூதியதாரர்களுக்கு அதிகப்படியான எதிர்பார்ப்பை ஏற்படுத்தியுள்ளது மட்டும் அல்லாமல் 8வது சம்பள கமிஷன் அறிமுகத்திற்கு முன்பு வரும் காரணத்தால் டபுள் கொண்டாட்டமாக உள்ளது.

தற்போது மத்திய அரசு ஊழியர்களுக்கான அகவிலைப்படி என்பது 58 சதவீதமாக உள்ள நிலையில், 2026ஆம் ஆண்டின் முதல் அரையாண்டுக்கான உயர்வு 2 அல்லது 3 சதவீதமாக இருக்கலாம் என்று கணிக்கப்படுகிறது. டிசம்பர் தரவு பிப்ரவரி முதல் வாரத்தில் வெளியாகும் போதே இது உறுதியாகும்.

அகவிலைப்படி உயர்வு கணிப்பு
நவம்பர் மாத AICPI-IW சராசரி புள்ளிகள் 145.17 ஆக உள்ளது. இதன்படி அகவிலைப்படி ஃபார்முலா படி 59.93 சதவீதம் வருகிறது. அதை அரசு ரவுண்ட் ஆஃப் செய்து 60 சதவீதமாக உயரும் என்று எதிர்பார்க்கப்படுகிறது. டிசம்பர் தரவு சற்று உயர்ந்தால் 3 சதவீத உயர்வுக்கும் சாத்தியமாகும். இந்த உயர்வு ஜனவரி 2026 சம்பளம் மற்றும் ஓய்வூதியத்தில் எதிரொலிக்கும்.

2025 ஜூலை மாதத்தில் அகவிலைப்படி 3 சதவீதமாக உயர்த்தப்பட்டு 58 சதவீதமாக உயர்ந்தது. அதற்கு முன் ஜனவரி 2025 இல் 2 சதவீத உயர்வுடன் 55 சதவீதமாக இருந்தது குறிப்பிடத்தக்கது. இந்த உயர்வின் மூலம் அரசு ஊழியர்கள் நாட்டில் நிலவும் பணவீக்கத்தில் இருந்து பாதுகாக்கப்படுகிறார்கள். AICPI-IW குறியீடு நாட்டில் நிலவும் பணவீக்க அளவை அடிப்படையாகக் கொண்டு அகவிலைப்படி கணக்கிட பென்ச்மார்க் செட் செய்கிறது.

8வது சம்பளக் கமிஷன்
இந்த அகவிலைப்படி உயர்வு 8வது சம்பளக் கமிஷன் அமலாக்கத்திற்கு முன் வருவதால், தற்போதைய அடிப்படை ஊதியத்தில் பிரதிபலிக்கும். சம்பள கமிஷன் அமலான பிறகு அகவிலைப்படி புதிய ஊதிய அமைப்பில் கணக்கிடப்படும். இந்த உயர்வு மத்திய அரசு ஊழியர்களுக்கு நிதி நிவாரணம் அளிக்கும் என்று எதிர்பார்க்கப்படுகிறது.