சென்னை நிறுவனம்ன்னா சும்மாவா.. TVS 3 மாசத்தில் என்னவெல்லாம் செய்திருக்கு தெரியுமா..!!!

சென்னையை தலைமையிடமாக கொண்டு தமிழ்நாடு மட்டும் அல்லாமல் இந்தியா முழுவதும், உலகின் பல நாடுகளில் தனது இருசக்கர வாகனங்களை தயாரிப்பு மற்றும் விற்பனை நிறுவனமான TVS மோட்டார் கம்பெனி லிமிடெட், ஜூன் மாதத்துடன் முடிவடைந்த நடப்பு நிதியாண்டின் முதல் காலாண்டு முடிவுகளை வெளியிட்டு உள்ளது.

ஜூன் காலாண்டில் டிவிஎஸ் மோட்டார் கம்பெனி நிறுவனத்தின் ஒருங்கிணைந்த நிகர லாபம் வருடாந்திர அடிப்படையில் 42.2 சதவீதம் உயர்ந்து 434.30 கோடி ரூபாயாக உயர்ந்துள்ளது. கடந்த ஆண்டின் இதே காலாண்டில் டிவிஎஸ் மோட்டார்ஸ் 305.37 கோடி லாபம் ஈட்டியிருந்தது. இதுவே மார்ச் காலாண்டை ஒப்பிடுகையில் 336.10 கோடி ரூபாய் பெற்றிருந்த நிலையில் ஜூன் காலாண்யில் 29.2% அதிகரித்துள்ளது.

ஜூன் மாதத்துடன் முடிவடைந்த காலாண்டில் டிவிஎஸ் நிறுவனத்தின் ஒருங்கிணைந்த மொத்த வருவாய் 23.8% உயர்ந்து 9,055.51 கோடியாக உள்ளது. கடந்த ஆண்டின் இதே காலாண்டில் மொத்த வருமானம் ₹7,347.83 கோடியாக இருந்தது குறிப்பிடத்தக்கது.

மேலும் டிவிஎஸ் நிறுவனம் எப்போதும் இல்லாத வகையில் ஜூன் காலாண்டில் அதிகப்படியான அப்ரேட்டிங் EBITDA அளவான 764 கோடி ரூபாயை பெற்றுள்ளது. இது கடந்த நிதியாண்டின் ஜூன் காலாண்டை காட்டிலும் 27 சதவீதம் அதிகமாகும். மேலும் EBITDA மார்ஜின் அளவு கடந்த நிதியாண்டின் ஜூன் காலாண்டை காட்டிலும் 10.6 சதவீதமாக உயர்ந்துள்ளது.

ஜூன் 2022 காலாண்டை ஒப்பிடுகையில் ஜூன் 2023 காலாண்டில் டிவிஎஸ் மோட்டார்ஸ் நிறுவனத்தின் இரு சக்கர மற்றும் 3 சக்கர வாகன விற்பனை மற்கும் வெளிநாட்டு ஏற்றுமதி ஆகியவை 5 சதவீதம் அதிகரித்து 3 மாதத்தில் 9.07 லட்சம் வாகனங்களை விற்பனை செய்துள்ளது.

இக்காலக்கட்டத்தில் மோட்டார் சைக்கிள் விற்பனை 7 சதவீதம் அதிகரித்து 4.63 லட்சம் வாகனங்கள் விற்பனை செய்யப்பட்டு உள்ளது. ஸ்கூட்டர் விற்பனை 11 சதவீதம் அதிகரித்து 3.50 லட்சம் வாகனங்கள் விற்பனை செய்யப்பட்டு உள்ளது. 3 சக்கர வாகனங்களின் விற்பனை 46,000 இருந்து 35000 ஆக குறைந்துள்ளது.

எலக்ட்ரிக் வாகனங்களின் விற்பனை ஜூன் 2022ல் வெறும் 9000 ஆக இருந்த நிலையில், தற்போது 39000 ஆக அதிகரித்துள்ளது. இன்றளவும் டிவிஎஸ் iQube என்படும் எலக்ட்ரிக் வாகனங்களின் புக்கிங் தொடர்ந்து குவிந்து வருவதாக தெரிவித்துள்ளது.