சென்னை மெட்ரோ-வுக்கு பேனசோனிக் நிறுவனத்தின் ஸ்பெஷல் கவனிப்பு.. அடடே இது நல்லாயிருக்கே..!!

சென்னை: சென்னை நகர போக்குவரத்தை வேகமாக மாற்றி வரும் மெட்ரோ சேவை திட்டம் தொடர்ந்து விரிவாக்கம் செய்யப்பட்டும், மெருகேற்றப்பட்டும் வரும் வேளையில் சென்னை மெட்ரோ ரயில் திட்டத்தின் லைன் 3 மற்றும் லைன் 5 வழித்தடத்தில் இருக்கும் பிளாட்ஃபார்ம் ஸ்கிரீன் டோர்களை (PSD) அமைக்கும் திட்டத்தை பனசோனிக் மானுஃபேக்சரிங் (பெய்ஜிங்) கோ. லிமிடெட் மற்றும் பைனியர் ஃபில்-மெட் ப்ரைவேட் லிமிடெட் ஆகியவற்றின் கூட்டணிக்குக் கிடைத்துள்ளது.

இந்த பிளாட்ஃபார்ம் ஸ்கிரீன் டோர் (PSD) அமைக்கும் திட்டத்தின் மொத்த ஒப்பந்த மதிப்பு ரூ.146.95 கோடியாகும். இந்த திட்டத்தைக் கைப்பற்றப் பல நிறுவனங்கள் போட்டிப்போட்டாலும் கடைசியில் பனசோனிக் - பைனியர் ஃபில்-மெட் கூட்டணி இந்த ஒப்பந்தத்தைப் பெற்றுள்ளது.

சென்னை மெட்ரோ ரயில் திட்டத்தின் லைன் 3 மாதவரம்-சிப்காட் (45.4 கி.மீ ) மற்றும் லைன் 5 மாதவரம்-சோழிங்கநல்லூர் (44.6 கி.மீ) ஆகியவை வட-தெற்கு பகுதிகளை இணைக்கும் வகையில் அமைந்துள்ளது. இந்த வழித்தடத்தில் உயர்த்தப்பட்ட மற்றும் நிலத்தடி ரயில் நிலையங்கள் வழியாக மெட்ரோ ரயில் திட்டம் இயங்கும்.

இந்த ஒப்பந்தம் மூலம் பனசோனிக் - பைனியர் ஃபில்-மெட் கூட்டணி பிளாட்ஃபார்ம் ஸ்கிரீன் டோர்களை வடிவமைத்து, தயாரித்து, நிறுவி, சோதித்து மற்றும் செயல்படுத்தும் பணிகளை மேற்கொள்ள உள்ளது.

காரிடார்-3 இல், ஒப்பந்ததாரர் மாதவரம் டிப்போ நிலையம் மற்றும் தரமணி நிலையம் இடையே உள்ள 29 நிலத்தடி நிலையங்களில் பிளாட்ஃபார்ம் ஸ்கிரீன் டோர்களை நிறுவும்.

காரிடார் 5 இல், கோலத்தூர் சந்திப்பு நிலையம் மற்றும் நாதமுனி நிலையம் இடையே உள்ள 5 நிலத்தடி நிலையங்களில் பிளாட்ஃபார்ம் ஸ்கிரீன் டோர்கள் நிறுவப்படும். இறுதி ஒப்பந்த மதிப்பு 146.95 கோடி, இதற்கான பணிகளை தோராயமாக நான்கு ஆண்டுகளுக்குள் முடிக்க வேண்டும்.

சென்னை மெட்ரோ ரயில் திட்டத்தின் லைன் 3 மற்றும் லைன் 5 வளர்ச்சி பணிகள்:

லைன் 3ல் 29 மெட்ரோ நிலையங்கள், DRA - Soma JV டாடா ப்ராஜெக்ட்ஸ் லிமிடெட் மற்றும் ரெயில் விகாஸ் நிஹாம் லிமிடெட் ஆகியவற்றால் கட்டப்பட்டு வருகின்றன.

இதேபோல் லைன் 5ல் ஐந்து நிலத்தடி மெட்ரோ நிலையங்கள், டாடா ப்ராஜெக்ட்ஸ் லிமிடெட் மூலம் கட்டப்பட்டு வருகின்றன.