இந்தியாவே தவிக்கும் நேரத்தில், கெத்து காட்டும் 'சென்னை'.. ஜூலையில் நடந்த தரமான சம்பவம்..!

இந்தியாவின் பொருளாதாரம், வர்த்தகம், வேலைவாய்ப்பு, 2ஆம் மற்றும் 3ஆம் கட்ட நகரங்களின் வளர்ச்சி என 360 கோணத்திலும் புதிய வேகத்தை கொடுத்த ஸ்டார்ட்அப் துறை 2023 ஆம் ஆண்டில் புதிய முதலீடுகளை ஈர்க்க முடியாமல் தவித்து வருவதோடு பல நிறுவனங்கள் அடுத்தடுத்து பணிநீக்கம் செய்தும் வருகிறது.

இந்த நிலையில் ஜூலை மாதத்தின் வென்சர் கேப்பிடல் முதலீடுகள் குறித்த தரவுகள் வெளியாகியுள்ளது, 2023 ஆம் ஆண்டின் முதல் 7 மாதத்தில் எப்போதும் இல்லாத வகையில் ஜூலை மாதம் வென்சர் கேப்பிடல் முதலீடுகளின் அளவு மிகவும் குறைவான அளவீட்டை பதிவு செய்துள்ளது.

ஜூலை மாதம் மொத்தமாகவே 529 மில்லியன் டாலர் தொகையை மட்டுமே முதலீடு செய்யப்பட்டு உள்ளது, மேலும் 1 பில்லியன் டாலர் என்ற பென்ச்மார்க் அளவுக்கு கீழ் 3வது மாதமாக வென்சர் கேப்பிடல் முதலீடுகள் 2023 ஆம் ஆண்டில் பதிவாகியுள்ளது. இந்த ஆண்டு அதிகப்படியாக மார்ச் மாதம் 1.4 பில்லியன் டாலர் முதலீடுகள் குவிந்துள்ளது.

ஜூலை மாதம் குவிந்த மொத்த 529 மில்லியன் டாலர் முதலீட்டில் சென்னை ஸ்டார்ட்அப் நிறுவனங்கள் மட்டுமே 191 மில்லியன் டாலர் முதலீடுகளை பெற்று அதிகம் முதலீடு பெற்ற நகரமாக விளங்குகிறது. சென்னையை தொடர்ந்து டெல்லி, பெங்களூர் டாப் 3 இடங்களை பிடித்துள்ளது.

2023 ஆம் ஆண்டில் மிகவும் மோசமான முதலீட்டு காலமாக இருக்கும் இந்த ஜூலை மாதத்தில் சென்னை அதிகப்படியான முதலீட்டை ஈர்த்துள்ளது சிறப்பான விஷயம். ஜூலை மாதத்தில் அதிகப்படியான முதலீடுகள் குவிந்த துறையாக பின்டெக், எலக்ட்ரிக் வாகனம், ஐடி சேவை துறை நிறுவனங்கள் இப்பட்டியலில் உள்ளது.

ஜூலை மாதத்தில் அதிகப்படியான முதலீட்டை பெற்ற நிறுவனங்கள் பட்டியலில் Kaar Technologies, Battery Smart, Renewbuy மற்றும் Veritas Finance ஆகியவை திகழ்கிறது. இந்த 4 நிறுவனங்கள் மட்டுமே 100 மில்லியன் டாலருக்கும் அதிகமான முதலீட்டை பெற்றுள்ளது, மற்ற முதலீடுகள் அனைத்தும் 50 மில்லியன் டாலருக்கு கீழ்.