சென்னை ZOHO அலுவலகம்.. வியக்க வைக்கும் கலக்கல் வீடியோ..!

இந்தியாவின் முன்னணி ஸ்டார்ட்அப் நிறுவனங்களில் குறிப்பாக லாபத்தில் இயங்கும் ஸ்டார்ட்அப் நிறுவனங்களில் முன்னோடியாக இருக்கும் ZOHO, சென்னையில் தமிழ்நாட்டை சேர்ந்தவர்களால் உருவாக்கப்பட்டு இன்று உலகளவில் வர்த்தகம் செய்கிறது.

1996 ஆம் ஆண்டு ஸ்ரீதர் வேம்பு மற்றும் டோனி தாமஸ் ஆகியோரால் இணைந்து உருவாக்கப்பட்ட ZOHO நிறுவனத்தில் அதிகப்படியான பங்குகளை வைத்திருப்பது ராதா வேம்பு தான். இவர் ஸ்ரீதர் வேம்பு அவர்களுடைய சகோதரியும், இந்தியாவின் பணக்கார பெண்களில் முக்கியமானவரும் ஆவார்.

1996 முதல் 2009 வரையில் AdventNet என்று அழைக்கப்பட்ட ZOHO நிறுவனம் ஆரம்பத்தில் நெட்வொர்க் மேனேஜ்மென்ட் சாப்ட்வேர் நிறுவனத்தை தான் உருவாக்கியது. AdventNet நிறுவனம் 2001ல் ஜப்பான் நாட்டிற்கு அதன் ஆப்ரேஷன்ஸ்-ஐ விரிவாக்கம் செய்த பின்பு தான் சிறு மற்றும் குறு நிறுவனங்களுக்கான எண்டர்பிரைசர்ஸ் சேவையை உருவாக்கியது.

2005ல் ZOHO CRM சேவை அறிமுகம் செய்த பின்பு இந்நிறுவனத்தின் பெயர் மட்டும் அல்லாமல் சேவை பிரிவே தலைகீழாக மாறி ராக்கெட் வேகத்தில் வளர துவங்கியது. இன்று 9 நாடுகளில் 12 அலுவலகங்கள் இயங்கினாலும், சென்னை அலுவலகம் தான் தலைமை அலுவலகம்.

சென்னை ZOHO அலுவலகம் வித்தியாசமான வடிவத்தில் இருக்கும் காரணத்தாலும், இந்நிறுவனத்தின் பிரம்மாண்ட வளர்ச்சியாலும் இந்த அலுவலகம் சென்னையின் முக்கிய அடையாளங்களில் ஒன்றாகவே மாறியுள்ளது.

சென்னை ZOHO தலைமை அலுவலகத்தின் கலக்கலான வீடியோ வெளியாகி பல ஆயிரம் மக்களின் கவனத்தை ஈர்த்துள்ளது.