நேரம் பார்த்து காய் நகர்த்தும் சீனா-வின் டிக்டாக்.. பலே அறிவிப்பு..!

சுத்தி சுத்தி எங்குப் பார்த்தாலும் டெக் நிறுவனங்கள் ஊழியர்களைப் பணிநீக்கம் செய்து வரும் நிலையில், இன்று சற்றும் எதிர்பார்க்காத வகையில் சுந்தர் பிச்சை தலைமை வகிக்கும் ஆல்பபெட் சரியாகப் பணியாற்றாத Poor Performing பிரிவில் இருக்கும் 10000 ஊழியர்களைப் பணிநீக்கம் செய்யத் திட்டமிட்டு உள்ளதாகத் தகவல் வெளியாகியுள்ளது.

இதன் மூலம் ஒட்டுமொத்த கூகுளின் மொத்த ஊழியர்கள் எண்ணிக்கையான 1,87,000 ஊழியர்களில் 5-6 சதவீத பேரை பணிநீக்கம் செய்ய உள்ளது.

கடந்த 3 மாதத்தில் மெட்டா, மைக்ரோசாப்ட், நெட்பிளிக்ஸ், டிவிட்டர், சேல்ஸ்போர்ஸ், ஆரக்கிள் என அனைத்து முன்னணி நிறுவனங்களும் ஊழியர்களைப் பணிநீக்கம் செய்த நிலையில் தற்போது டிக்டாக் முக்கியமான முடிவை எடுத்துள்ளது.

டிக்டாக்

சீனா-வின் முன்னணி ஷாட் வீடியோ சேவை தளமான டிக்டாக் அமெரிக்க அரசின் நெருக்கடி காரணமாகச் சர்வதேச வர்த்தகத்தைத் தனியாகப் பிரித்துச் சான் பிரான்சிஸ்கோ-வில் தலைமையாகக் கொண்டு உலக நாடுகளில் வர்த்தகம் செய்து வருகிறது.

வேலைவாய்ப்பு சந்தை

உலகம் முழுவதும் டெக் நிறுவனங்கள் பணிநீக்கம் செய்து வரும் நிலையில், வேலைவாய்ப்புச் சந்தையில் எப்போதும் இல்லாமல் அதிகப்படியான திறமையான மற்றும் கிரீம் லேயர் ஊழியர்கள் இருக்கும் நிலையில் இதைச் சரியாகப் பயன்படுத்திக்கொள்ள முடிவு செய்துள்ளது டிக்டாக்.

3000 இன்ஜினியர்கள்

சீன நிறுவனமான டிக்டாக் தனது சர்வதேச வர்த்தகத்தில் புதிதாக 3000 இன்ஜினியர்களைப் பணியில் அமர்த்த முடிவு செய்துள்ளது. இதில் அதிகப்படியான ஊழியர்கள் அமெரிக்க அலுவலகத்தில் நியமிக்கப்பட வாய்ப்புகள் அதிகமாக உள்ளது.

டிக்டாக் சிஇஓ Shou Zi Chew

டிக்டாக் எப்போதும் புதிய ஊழியர்களைப் பணியில் சேர்க்கும் போது மிகவும் கவனமாகச் செய்யும், அந்த வகையில் எங்களுடைய வர்த்தகம் மற்றும் சேவையில் சமாளிக்க முடியாத பிரச்சனைகள் இருக்கும் போது தான் ஊழியர்களைச் சேர்ப்போம் என டிக்டாக் சிஇஓ Shou Zi Chew தெரிவித்துள்ளார்.

சிங்கப்பூர், அமெரிக்கா

TikTok சிங்கப்பூரில் உள்ள அதன் முக்கிய அலுவலகத்திலும் புதிதாக ஊழியர்களைப் பணியில் அமர்த்த உள்ளது. ஏற்கனவே 1,000க்கும் மேற்பட்ட டெக் இன்ஜினியர்களைக் கொண்ட மிகப்பெரிய அமெரிக்க டெக் இன்ஜினியர்ங் சென்டரை விரிவாக்கம் செய்யும் பணியில் இறங்கியுள்ளது டிக்டாக். டிக்டாக் தற்போது ஷாட் வீடியோ சேவை மட்டும் அளிக்காமல் மேப்ஸ், சர்ச் எனப் பல சமுகவளைத்தளச் சேவைகளை வழங்கி வருகிறது.

ஸ்மார்ட் ஐடியா

தற்போது கூகுள், மெட்டா, மைக்ரோசாப்ட் என அனைத்து முன்னணி டெக் நிறுவனங்களிலும் ஊழியர்கள் பணிநீக்கம் செய்யப்பட்டு வரும் நிலையில் சீன நிறுவனமான டிக்டாக் திட்டமிட்டு காய் நகர்த்த உள்ளது. இதன் மூலம் டிக்டாக் தனக்குத் தேவையான ஊழியர்களைத் தேவையான பிரிவில், தேவையான நிறுவனத்தில் தேர்வு செய்து வேகமாக வளர்ச்சி அடைய வாய்ப்புகள் உள்ளது.

அமெரிக்கச் சந்தை

இதற்கிடையில் டிக்டாக் அமெரிக்காவில் பல விதிமுறைகளை மீறுவதாகக் கூறப்பட்ட நிலையில் டிக்டாக் தனது வர்த்தகத்தில் அதிகளவில் அமெரிக்க டெக் இன்ஜினியர்களைப் பணியமர்த்துவதாக வாக்குறுதி கொடுத்தது. இதைத் தொடர்ந்து இந்த வாக்குறுதியை நிறைவேற்றும் வகையில் அடுத்தகட்ட வளர்ச்சிக்கான திறமையான ஊழியர்களைப் பணியில் அமர்த்த உள்ளது.