GCC-க்களின் புதிய சாய்ஸ்.. செலவு குறைவு, திறன் அதிகம்.. கோவையில் குவியும் உலக நிறுவனங்கள்..!!

இந்தியாவின் தொழில்நுட்பம், உலகளாவிய திறன் மையங்கள் இனி பெங்களூரு, சென்னை போன்ற பெருநகரங்களுக்கு மட்டும் சொந்தமானவை அல்ல. தமிழ்நாட்டின் தொழில் மையமான கோவையும் தற்போது உலகளாவிய நிறுவனங்களின் கவனத்தை ஈர்த்து வருகிறது.

உலகளாவிய திறன் மையங்கள் (Global Capability Centres - GCCs) இந்தியாவில் தொடர்ந்து விரிவடைந்து வரும் நிலையில், நாட்டின் இரண்டாம் அடுக்கு (Tier-2) நகரங்கள் வளர்ச்சிக்கு மிகவும் கவர்ச்சிகரமான மையங்களாக உருவெடுத்து வருகின்றன. இந்த நகரங்கள், குறைவான செலவில் திறமையான பணியாளர்களை திரட்டுதல், குறைந்த வாழ்க்கைச் செலவு, மேம்பட்ட உள்கட்டமைப்பு மற்றும் அரசாங்க ஆதரவு போன்ற பல நன்மைகளை வழங்குவதால், உலகளாவிய நிறுவனங்களின் கவனத்தை ஈர்க்கின்றன.

நாட்டின் உலகளாவிய Global Outsourcing Ecosystem-களின் முக்கியத்துவம் அதிகரித்து வருகிறது. சமீபத்திய அறிக்கைகளின்படி, வரும் ஆண்டுகளில் இரண்டாம் அடுக்கு நகரங்களில் ஜிசிசி-க்களுக்கான தேவை 30 முதல் 40 சதவீதம் வரை உயரும் என எதிர்பார்க்கப்படுகிறது.

இரண்டாம் அடுக்கு நகரங்களில் செயல்பாட்டு செலவுகள் குறைவாக இருப்பது, திறமையான பணியாளர்கள் கிடைப்பது மற்றும் ஊழியர்களை அதிக அளவில் தக்கவைத்துக் கொள்ளும் விகிதம் அதிகரிப்பது போன்ற காரணிகளே இந்த மாற்றத்திற்கு முக்கிய உந்துசக்தியாக உள்ளன.

அந்த வகையில், தென்னிந்தியாவின் அடுத்த ஜிசிசி எல்லையாக கோவை வேகமாக வளர்ந்து வருகிறது. ஒரு வலுவான தொழில்துறை பாரம்பரியம் மற்றும் ஆழமான பொறியியல் நிபுணத்துவத்தின் ஆதரவுடன், கோவை தற்போது முக்கிய தொழில்துறை மற்றும் தயாரிப்பு பொறியியல் ஆராய்ச்சி மற்றும் மேம்பாட்டிற்கான ஒரு மூலோபாய மையமாக மாறி வருகிறது.

அத்துடன், மேம்பட்ட மென்பொருள் மேம்பாடு மற்றும் டிஜிட்டல் தொழில்நுட்பங்களிலும் அதன் கால் தடத்தைப் பதித்து வருகிறது. தங்களது ஜிசிசி செயல்பாடுகளை அமைக்கவோ அல்லது விரிவாக்க விரும்பும் உள்நாட்டு மற்றும் உலகளாவிய நிறுவனங்களின் கவனத்தை கோவை வெகுவாக ஈர்த்து வருகிறது.

CBRE நிறுவனம், இந்தியத் தொழிலக கூட்டமைப்புடன் (CII) இணைந்து வெளியிட்ட அறிக்கையின்படி, கோயம்புத்தூர் ஏற்கனவே 60-க்கும் மேற்பட்ட ஜிசிசி-க்களை கொண்டுள்ளது. இதில் Bosch, State Street, Amazon ஆகிய நிறுவனங்களும் அடங்கும். இங்கு 75,000-க்கும் அதிகமான நிபுணர்கள் பணியாற்றுகின்றனர்.

அதேபோல் குறைந்த வாழ்க்கை செலவு, அமைதியான பணிச்சூழல் மற்றும் சொந்த ஊருக்கு அருகிலேயே வேலை வாய்ப்பு ஆகியவற்றின் காரணமாக இரண்டாம் அடுக்கு நகரங்களில் பணியாளர்கள் வேலையை விட்டு விலகுவது குறைவாக உள்ளது. இது நிறுவனங்களுக்குப் பயிற்சியளிக்கும் செலவை குறைப்பதுடன், நீண்ட கால ஊழியர் தக்கவைப்பை உறுதி செய்கிறது.

தொழில்நுட்ப நிறுவனங்கள் இப்போது அடுத்த பெரிய இடத்தை தேடும்போது, கோயம்புத்தூர் ஒரு மலிவான ஆனால் திறமையான தேர்வாக முன்னணியில் நிற்கிறது. இது, கோவையை தென்னிந்தியாவின் தொழில்நுட்ப வரைபடத்தில் தவிர்க்க முடியாத சக்தியாக மாற்றியுள்ளது என்பதில் சந்தேகமில்லை.