கோயம்புத்தூர் தான் வேணும்.. அடிம்பிடித்து வந்த அமெரிக்க நிறுவனம்..!

தமிழ்நாட்டில் வேகமாக வளர்ச்சி அடையும் பகுதிகளில் முக்கியமானதாக இருக்கும் கோயம்புத்தூரில் அடுத்தடுத்து வெளிநாட்டு நிறுவனங்கள் அலுவலகத்தை அமைத்து வரும் வேளையில், புதிதாக ஒரு அமெரிக்க நிறுவனம் களத்தில் இறங்கியுள்ளது. உலகளாவிய டெக் நிறுவனங்களுக்கு கோயம்புத்தூர் மிகவும் விருப்பமான நகரமாக உள்ளது குறிப்பிடத்தக்கது.

அமெரிக்காவை தலைமையிடமாகக் கொண்ட அனலிட்டிக்ஸ் மற்றும் தொழில்நுட்ப நிறுவனமான CorroHealth Infotech, கோயம்புத்தூரில் உள்ள இந்தியன் லேண்ட் டெக் பார்க்கில் தனது புதிய அலுவலகத்தை அமைக்க உள்ளதாக அறிவித்துள்ளது.

இப்புதிய அலுவலகத்தில் சுமார் 400 பேருக்கு வேலைவாய்ப்பை உருவாக்கும் என்று எதிர்பார்க்கப்படுகிறது. இதன் மூலம் கோயம்புத்தூரில் புதிய வேலைவாய்ப்புகள் உருவாக்கப்படுவது மட்டும் அல்லாமல் பொருளாதார வளர்ச்சி மற்றும் தொழில்நுட்பத்தில் பெரும் முன்னேற்றத்திற்கு வழிவகுக்கும்.

கோயம்புத்தூர் அலுவலகம் மூலம் CorroHealth Infotech நிறுவனத்தின் உலகளாவிய தடம் விரிவாக்கம் செய்யப்பட உள்ளது, இதேபோல் கோயம்புத்தூரில் கிடைக்கும் திறமையான பணியாளர்கள் தான் இந்நிறுவனம் இங்கு அலுவலகத்தை அமைக்க முக்கியமான காரணமாக உள்ளது.

CorroHealth Infotech சுகாதாரத் துறையில் நிபுணத்துவம் பெற்ற ஒரு முன்னணி அனலிட்டிக்ஸ் மற்றும் தொழில்நுட்ப நிறுவனமாகும். இந்த நிறுவனம், ஹெல்த்கேர் நிறுவனங்களுக்கு வருவாய் சுழற்சி மேலாண்மை, மருத்துவ பில்லிங் மற்றும் கோடிங் ஆகியவற்றில் புதுமையான தீர்வுகளை வழங்குகிறது.

மேலும் இந்தியன் லேண்ட் டெக் பார்க் கோயம்புத்தூரில் அமைந்துள்ள ஒரு முன்னணி டெக் பார்க் ஆகும். இது பல்வேறு டெக் நிறுவனங்களுக்கு அதிநவீன உள்கட்டமைப்பு மற்றும் அலுவலக வசதிகளை வழங்குகிறது.