பணவீக்கத்தால் வாடும் இந்திய மாநிலங்கள்.. தமிழ்நாட்டின் நிலை என்ன தெரியுமா..?!

இந்திய பணவீக்கம்

ஒட்டுமொத்த இந்தியாவின் பணவீக்கம் 7.79 சதவீதமாக இருக்கும் நிலையில் ஒவ்வொரு மாநிலத்தின் பணவீக்கமும் தத்தம் வளம், வர்த்தகம், பயன்பாடு ஆகியவற்றைப் பொறுத்து மாறுப்படுகிறது. இந்த வகையில் சுமார் 26 மாநிலங்கள் மற்றும் யூனியன் பிரதேசத்தில் சில்லறை பணவீக்கம் 6 சதவீதத்திற்கு மேல் உள்ளது.

7.79 சதவீத பணவீக்கம்

குறிப்பாகப் பல மாநிலத்தில் இந்தியாவின் 7.79 சதவீத பணவீக்கத்திற்கும் அதிகமாகவே உள்ளது அதிர்ச்சி அளிக்கிறது. இதேவேளையில் பல மாநிலத்தில் 6 சதவீதத்திற்குக் கீழ் உள்ளது. இந்த நிலையில் தமிழ்நாட்டின் நிலை என்ன தெரியுமா..?

மகாராஷ்டிரா, குஜராத், உத்தரப் பிரதேசம்

மத்திய அரசின் தரவுகள் அடிப்படையில் ஏப்ரல் மாதம் மேற்கு வங்காளம், மத்திய பிரதேசத்தில் பணவீக்கத்தின் அளவு யாரும் எதிர்பார்க்காத வகையில் சுமார் 9 சதவீதத்திற்கு மேல் உயர்ந்துள்ளது. இதேபோல் மகாராஷ்டிரா, குஜராத், உத்தரப் பிரதேசம் ஆகியவை இந்திய சராசரி அளவை கட்டிலும் அதிகமாக 8 சதவீதத்திற்கு மேல் உள்ளது.

மணிப்பூர்

இப்படி ஒருபக்கம் 26 மாநிலங்கள் மற்றும் யூனியன் பிரதேசத்தில் அதிகப்படியான பணவீக்கத்தில் கடுமையாகப் பாதித்து வரும் நிலையில், மறுபுறம் மணிப்பூரில் வெறும் 2.29 சதவீத பணவீக்கம் மட்டுமே உள்ளது.

கோவா

மணிப்பூர்-க்கு அடுத்ததாகக் கோவா-வில் ரீடைல் பணவீக்கம் 4.01 சதவீதம் என்ற அளவில் மட்டுமே உள்ளது. கோவா மாநிலத்தைத் தொடர்ந்து அடுத்த 3 இடத்தைப் பிடிப்பது தென் மாநிலங்கள் என்பது கூடுதல் சிறப்பு.

கேரளா, தமிழ்நாடு, கர்நாடகா

கேரளா 5.10 சதவீதம், தமிழ்நாடு 5.4 சதவீதம், கர்நாடகா 6.3 சதவீதம், ஹிமாச்சல் பிரதேசம் 6.5 சதவீதம், டெல்லியில் 6.6 சதவீதமாக உள்ளது. இதன் மூலம் ரிசர்வ் வங்கியின் அதிகப்படியான இலக்கான 6 சதவீதத்திற்குக் கீழ் தமிழ்நாடு உள்ளது மிகவும் முக்கியமான விஷயம்.

தமிழ்நாடு

எரிபொருள் விலை, சமையல் எண்ணெய் விலை, ஏற்றுமதி, இறக்குமதி, முக்கிய உணவு பொருட்களின் விலை என அனைத்தும் மத்திய அரசின் கட்டுப்பாட்டில் இருக்கும் போதும் தமிழ்நாட்டின் பணவீக்கம் 6 சதவீதத்திற்கும் குறைவாக இருப்பது தமிழ்நாட்டின் வர்த்தகம் மற்றும் பொருளாதாரக் கட்டமைப்பைக் காட்டுகிறது.