வேகம் எடுக்கும் டிஜிட்டல் வணிகம்.. 2027-ஆம் ஆண்டுக்குள் டார்க் ஸ்டோர்கள் வளர்ச்சி எங்கேயோ போயிடும்!

தொற்றுநோய் காலத்திற்குப் பிறகு விரைவான வணிக வளர்ச்சி ஏற்பட்டுள்ளது. இந்த வளர்ச்சியின் காரணமாக, இந்தியாவின் டயர் 1 மற்றும் டயர் 2 நகரங்களில் டார்க் ஸ்டோர்களுக்கான தேவை அதிகரித்துள்ளது. JLL மற்றும் Miebach கன்சல்ட்டிங் என்ற 2 நிறுவனங்கள் இணைந்து நடத்திய ஆய்வின்படி, 2023-ஆம் ஆண்டில் இந்த நகரங்களில் சுமார் 24 மில்லியன் சதுர அடி இடம் டார்க் ஸ்டோர்கள் அமைப்பதற்கு தேவைப்படும் என்று கணிக்கப்பட்டது. மேலும், இந்த தேவை 2027-ஆம் ஆண்டு வரை தொடர்ந்து அதிகரித்து, 37.6 வரை எட்டும் என்றும் எதிர்பார்க்கப்படுகிறது.

டார்க் ஸ்டோர் என்றால் என்ன?: டார்க் ஸ்டோர் என்பது ஆன்லைன் ஷாப்பிங்கிற்கு மட்டுமே வடிவமைக்கப்பட்ட ஒரு சிறிய கிடங்கு போன்ற விநியோக மையமாகும். அதாவது இது நேரடி விற்பனை அல்லாத கடைகள் என்று கூட வைத்துக்கொள்ளலாம். இது விரைவான விநியோகத் தேவைகளைப் பூர்த்தி செய்வதற்காக நிரம்பிய குடியிருப்பு பகுதிகளுக்கு அருகில் அமைந்திருக்கும் 3,000 முதல் 8,000 சதுர அடி பரப்பளவைக் கொண்டுள்ள கடைகளாகும்.

டார்க் ஸ்டோர்கள் பல்வேறு வகையான தயாரிப்புகளை சேமித்து வைத்து, 24 மணி நேரமும் செயல்படுகின்றன. இது பல்வேறு தயாரிப்புகள் விரைவாக சென்றடைவதை உறுதி செய்கிறது. போக்குவரத்து செலவுகளை குறைக்கிறது. இந்த ஸ்டோர்களில் உள்ள பொருட்கள் முழுக்க முழுக்க ஆன்லைன் வர்த்தக தளத்தின் மூலம் டெலிவரி செய்யப்படுகின்றன. இவை நேரடி விற்பனை செய்யப்படாத கடைகளாகும்.

இந்த வகை டார்க் ஸ்டோர்களில் 24 மணி நேரத்திற்கும் குறைவான எக்ஸ்பயரி டேட் கொண்ட பொருட்களும் விற்கப்படுகின்றன. உதாரணமாக வெஜிடபிள் டெலிவரி சேவைகளை எடுத்துக் கொள்ளலாம். இதுபோன்ற டார்க் ஸ்டோர்களில் இருந்து தான் பொருட்களை விற்பனை செய்கின்றன.

டார்க் ஸ்டோர்களுக்கு வாடகை எவ்வளவு?: டெல்லி போன்ற இடங்களில் இந்த டார்க் ஸ்டோர்களை அமைப்பதற்கு ஒரு சதுர அடிக்கு 150 முதல் 200 ரூபாய் வாடகையாக செலுத்த வேண்டியுள்ளது. அதேபோல மும்பை இரண்டாவது இடத்தில் உள்ளது. இங்கு ஒரு சதுர அடிக்கு 80 முதல் 150 ரூபாய் வாடகை செலவாகிறது. பெங்களூருவில் 60 முதல் 100 ரூபாய் செலவாகிறது.

நைட் ஃபிராங்கின் இண்டஸ்ட்ரியல் கேபிடல் மார்க்கெட்ஸின் நிர்வாக இயக்குனர் பல்பீர் சிங் கல்சா, நகரங்களில் உள்ள டார்க் ஸ்டோர்கள் ஒவ்வொரு ஆண்டும் 40 சதவிகிதம் என்ற விகிதத்தில் வளர்ந்து வருகின்றன என்று கூறியுள்ளார். அவரது மதிப்பீட்டின்படி, Zepto 300-400-க்கும் மேற்பட்ட டார்க் ஸ்டோர்க கொண்டுள்ளது, Blinkit 600 க்கும் மேற்பட்டவற்றைக் கொண்டுள்ளது மற்றும் Flipkart சுமார் 100 டார்க் ஸ்டோர்களைக் கொண்டு வர திட்டமிட்டு வருகிறது என்று கூறியுள்ளார்.

டார்க் ஸ்டோர்கள் இந்தியாவில் விரைவாக வளர்ந்து வரும் ஒரு புதிய வணிகமாகும். இவற்றின் தேவை, விரைவான வணிகத்தின் வளர்ச்சியால் அதிகரித்து வருகிறது. டார்க் ஸ்டோர்கள், தயாரிப்புகளை விரைவாக சேமித்து வைத்து, 24 மணி நேரமும் செயல்படுவதன் மூலம், விரைவான டெலிவரி சேவையை வழங்குகின்றன. இருப்பினும், இந்த வளர்ச்சிக்கு சில சவால்களும் உள்ளன, குறிப்பாக சொத்து விலை உயர்வு மற்றும் உள்ளூர் நகராட்சி விதிகளுக்கு இணங்குதல் போன்றவை. இதிலிருந்து எதிர்காலத்தில் டார்க் ஸ்டோர்கள் முக்கிய பங்கு வகிக்கும் என்பது தெளிவாகிறது.