வாடிக்கையாளர்களே இந்த நாட்களில் வங்கி பக்கம் போகாதீங்க.. டிசம்பரில் மொத்தம் 19 நாட்கள் விடுமுறை.!!

இன்றைய டிஜிட்டல் உலகில் பணப் பரிவர்த்தனைகள் ஆன்லைனில் நடந்தாலும், பணம் எடுத்தல், பெரிய வைப்புத் தொகைகள், கடன் தொடர்பான ஆவணங்கள் போன்ற பல சேவைகளுக்கு வங்கிகளுக்கு நேரில் செல்வது இன்னும் பிரதானமாக உள்ளது. இந்த நிலையில், நவம்பர் மாதம் நிறைவடைய இன்னும் சில நாட்களே உள்ள நிலையில், அடுத்த மாதமான டிசம்பர் மாதத்திற்கான வங்கி விடுமுறைகள் பட்டியல் தற்போது வெளியிடப்பட்டுள்ளது. டிசம்பர் மாதம் முழுவதும் பண்டிகைகள் மற்றும் மாநிலங்களின் விசேஷ தினங்கள் என மொத்தம் 19 நாட்களுக்கு வங்கிகள் மூடப்பட உள்ளன. வாடிக்கையாளர்கள் இந்தப் பட்டியலை தெரிந்துகொண்டு தங்கள் வங்கிப் பயணங்களைத் திட்டமிடுவது அவசியம்.

டிசம்பரில் 19 நாட்கள் விடுமுறை : இந்தியாவில் வங்கி விடுமுறைகள் என்பது மாநிலத்திற்கு மாநிலம் மாறுபடும். ஒவ்வொரு மாநிலத்திலும் கொண்டாடப்படும் திருவிழாக்கள் மற்றும் விசேஷ தினங்களுக்கு ஏற்ப விடுமுறைகள் வழங்கப்படுவது வழக்கம். அதன்படி, டிசம்பர் மாதத்தில் மொத்தம் 19 நாட்களுக்கு வங்கிகளுக்கு விடுமுறை அறிவிக்கப்பட்டுள்ளது. இதில் வார விடுமுறைகளும் (ஞாயிறு மற்றும் இரண்டாவது/நான்காவது சனிக்கிழமை) அடங்கும்.

டிசம்பர் 7, 14, 21, 28 ஆகிய தேதிகள் ஞாயிற்றுக்கிழமை வார விடுமுறைகளாகும். டிசம்பர் 13 இரண்டாவது சனிக்கிழமையாகவும், டிசம்பர் 27 நான்காவது சனிக்கிழமையாகவும் வங்கிகளுக்கு விடுமுறை ஆகும்.

முக்கிய விடுமுறைகள் : வழக்கமான வார விடுமுறைகள் தவிர, மாநிலங்களின் சிறப்பு விழாக்கள் மற்றும் தினங்களுக்கான விடுமுறைகள் அறிவிக்கப்பட்டுள்ளன.

டிசம்பர் 1: திங்கட்கிழமை, மாநில பதவியேற்பு நாளையொட்டி அருணாச்சலப் பிரதேசத்தில் வங்கிகள் மூடப்பட்டிருக்கும்.

டிசம்பர் 3: புதன்கிழமை, புனித பிரான்சிஸ் சேவியர் தினத்திற்காக கோவாவில் வங்கிகளுக்கு விடுமுறை.

டிசம்பர் 12: வெள்ளிக்கிழமை, பா டோகன் நெங்மிஞ்சா சங்மா தினத்திற்காக மேகாலயாவில் விடுமுறை அளிக்கப்படுகிறது.

டிசம்பர் 18: வியாழன் கிழமை, குரு காசிதாஸ் ஜெயந்தியையொட்டி சத்தீஸ்கரில் வங்கிகளுக்கு விடுமுறை. சோசோ தாமின் நினைவு தினம் அன்றும் மேகாலயாவில் வங்கிகள் மூடப்பட்டிருக்கும்.

டிசம்பர் 19: வெள்ளிக்கிழமை, கோவா விடுதலை தினத்திற்காக அங்குள்ள வங்கிகளுக்கு விடுமுறை.

டிசம்பர் 24: புதன்கிழமை, கிறிஸ்துமஸ் ஈவ் அன்று மேகாலயா மற்றும் மிசோரம் பகுதிகளில் வங்கிகள் மூடப்பட்டிருக்கும்.

டிசம்பர் 25: வியாழன் கிழமை, கிறிஸ்துமஸ் பண்டிகைக்காக அனைத்து மாநிலங்களிலும் வங்கிகளுக்கு கட்டாய விடுமுறை.

டிசம்பர் 26: வெள்ளிக்கிழமை, கிறிஸ்துமஸ் கொண்டாட்டங்களுக்காக மிசோரம், தெலங்கானா மற்றும் மேகாலயாவில் வங்கிகளுக்கு விடுமுறை அளிக்கப்படுகிறது. தியாகி உதம் சிங் பிறந்தநாளையொட்டி ஹரியானா வங்கிகளுக்கும் விடுமுறை அறிவிக்கப்பட்டுள்ளது.

டிசம்பர் 27: சனிக்கிழமை, குரு கோவிந்த் சிங் ஜெயந்தியையொட்டி ஹரியானா, பஞ்சாப் மற்றும் இமாச்சல பிரதேச மாநிலங்களில் உள்ள வங்கிகளுக்கு விடுமுறை.

டிசம்பர் 31: புதன்கிழமை, மிசோரம் மற்றும் மணிப்பூர் மாநிலங்களில் வங்கிகளுக்கு விடுமுறை அளிக்கப்படுகிறது.

வங்கிகளுக்கு மொத்தமாக 19 நாட்கள் விடுமுறை என்றாலும், வாடிக்கையாளர்கள் நெட் பேங்கிங், மொபைல் பேங்கிங், யு.பி.ஐ. (UPI) மற்றும் ஏ.டி.எம். (ATM) சேவைகள் மூலம் தங்கள் பணப் பரிவர்த்தனைகளை தொடர்ந்து மேற்கொள்ளலாம். இருப்பினும், முக்கியமான பணிக்காக வங்கிக் கிளைக்குச் செல்ல திட்டமிடும்போது, சம்பந்தப்பட்ட மாநிலத்தின் விடுமுறை தினங்களை பரிசோதித்து செல்வது அவசியமாகும்.