அமெரிக்க பங்குச்சந்தையை ரத்தகளறியாக மாற்றிய சீனாவின் Deepseek.. தேம்பி தேம்பி அழும் முதலீட்டாளர்கள்!

சீன AI ஸ்டார்ட்அப் நிறுவனமான டீப்சீக் உருவாக்கிய மலிவுவிலை செயற்கை நுண்ணறிவு மாடல் அமெரிக்காவில் மாபெரும் வெற்றி அடைந்துள்ள காரணத்தால் அமெரிக்க பங்குச் சந்தையை ரத்தகளறியாக மாற்றியுள்ளது. டீப்சீக் வெற்றி பல துறையை சேர்ந்த நிறுவனங்களின் பங்குகளை மோசமான நிலைக்கு தள்ளியுள்ளது.

AI சிப் தயாரிப்பில் முன்னோடியாக இருக்கும் என்விடியாவின் பங்குகள் 12% க்கும் அதிகமாக சரிந்தது. டீப்சீக்கின் மலிவு விலை AI மாடல் குறைந்த எண்ணிக்கையிலான சிப்களை கொண்டு திறம்பட இயங்க முடியும் என நிரூபணம் செய்துள்ள காரணத்தால் என்விடியா வர்த்தகத்தையும், வருவாயும் இனி வரும் காலத்தில் பாதிக்கும் என கணிக்கப்பட்டு உள்ள காரணத்தால் 12 சதவீதம் வரையில் சரிந்து 500 பில்லியன் டாலர் மதிப்பிலான சந்தை மதிப்பீட்டை இழந்துள்ளது.

இதேபோல் ஏஐ துறையில் இருக்கும் மைக்ரோசாஃப்ட், மெட்டா பிளாட்பார்ம்ஸ் மற்றும் கூகிள்-ன் தாய் நிறுவனமான ஆல்ஃபபெட் உள்ளிட்ட பிற தொழில்நுட்ப நிறுவனங்களின் பங்குகளும் இன்று 2.2% முதல் 3.5% வரை சரிந்து முதலீட்டாளர்களின் முதலீட்டு மதிப்பில் பெரும் பாதிப்பை ஏற்படுத்தியது.

இதேபோல் ஏஐ சேவை இயங்க அதிகப்படியான மின்சாரம் தேவைப்படும் காரணத்தால் டேட்டா சென்டர்களுக்கு அதிகப்படியான மின்சாரம் சப்ளை செய்யும் மின்சார துறை நிறுவனமான ஜி.இ. வெர்னோவா மற்றும் விஸ்ட்ரா போன்ற நிறுவனங்களின் பங்குகள் தோராயமாக 20% வீழ்ச்சியடைந்தன.

AI சர்வர் தயாரிப்பாளர்களான டெல் டெக்னாலஜிஸ் மற்றும் சூப்பர் மைக்ரோ கம்ப்யூட்டர் ஆகியவை 7.2 சதவீதம் மற்றும் 8.9 சதவீதம் சரிந்தன.

இப்படி ஏஐ துறையுடன் நேரடியாகவும், மறைமுகமாகவும் தொடர்பு கொண்டுள்ள நிறுவனங்கள் அனைத்தும் இன்று அமெரிக்க வர்த்தகத்தில் சிக்கிக்கொண்டு உள்ளது. இதன் எதிரொலியாக மொத்தமாக பெரும் சரிவை சந்தித்துள்ளது.

அமெரிக்க நேரப்படி காலை வர்த்தகத்தில் டாவ் ஜோன்ஸ் இன்டஸ்ட்ரியல் ஆவ்ரேஜ், எஸ்&பி 500 மற்றும் நாஸ்டாக் காம்ப்சிட் குறியீடு ஆகியவை அனைத்தும் வீழ்ச்சியை சந்தித்தன. டாவ் ஜோன்ஸ் இன்டஸ்ட்ரியல் ஆவ்ரேஜ் 275.4 புள்ளிகள், எஸ்&பி 500 132.2 புள்ளிகள் மற்றும் நாஸ்டாக் காம்ப்சிட் 720.3 புள்ளிகள் வீழ்ச்சியடைந்தன.

சீனாவின் முன்னணி தொழில்நுட்ப நிறுவனமான டிப்சீக், செயற்கை நுண்ணறிவு (AI) துறையில் புதிய அத்தியாயத்தை எழுதி வருகிறது. ஹெட்ஜ் பண்ட் மற்றும் ஏஐ துறையில் முக்கிய நபரான லியாங் வென்ஃபெங் (Liang Wenfeng) நிறுவிய இந்த நிறுவனம், தனது சக்திவாய்ந்த ஏஐ மாடல்கள் மூலம் உலகளாவிய கவனத்தை ஈர்த்துள்ளது.

டிப்சீக்கின் ஏஐ மாடல்கள், குறிப்பாக டிப்சீக்-வி3, அதன் போட்டியாளர்களான ஓபன்ஏஐயின் ChatGPT மற்றும் கூகுளின் ஜெமினி ஆகியவற்றை விட சிறந்த செயல்திறனை வெளிப்படுத்துகிறது. இது மட்டுமின்றி, டிப்சீக் மிகவும் குறைந்த விலையில் இந்த சேவையை வழங்குகிறது. ஓபன்ஏஐயின் ஓ1 ஒரு மில்லியன் input tokens-க்கு 15 டாலர்களை வசூலிக்கும் போது, டிப்சீக் ஆர்1 வெறும் 0.55 டாலர்களை மட்டுமே வசூலிக்கிறது.

டிப்சீக்கின் இந்த குறைந்த விலை மற்றும் அதிக செயல்திறன் என்பது, செயற்கை நுண்ணறிவு துறையில் ஒரு புதிய போட்டியை ஏற்படுத்தியுள்ளது. இது வரை, செயற்கை நுண்ணறிவு மாடல்களை உருவாக்க அதிக செலவு பிடிக்கும் என்று கருதப்பட்டது. ஆனால், டிப்சீக் இதற்கு மாறுபட்ட கருத்தை முன்வைத்துள்ளது. குறைந்த செலவில் அதிக செயல்திறன் கொண்ட ஏஐ மாடல்களை உருவாக்க முடியும் என்பதை நிரூபித்துள்ளது.

டிப்சீக்கின் இந்த சாதனை, செயற்கை நுண்ணறிவு தொழில்நுட்பத்தை அனைவருக்கும் கிடைக்கச் செய்யும் ஒரு புதிய கதவைத் திறந்துள்ளது. இதன் மூலம், பல சிறு நிறுவனங்கள் மற்றும் ஆராய்ச்சியாளர்கள் செயற்கை நுண்ணறிவு தொழில்நுட்பத்தை பயன்படுத்தி தங்கள் பணிகளை மேம்படுத்திக்கொள்ள முடியும்.

இந்த வளர்ச்சி, செயற்கை நுண்ணறிவு துறையில் ஒரு புதிய போட்டியை ஏற்படுத்தியுள்ளது. இதன் மூலம், செயற்கை நுண்ணறிவு தொழில்நுட்பத்தில் மேலும் மேலும் புதிய கண்டுபிடிப்புகள் நிகழும் என்று எதிர்பார்க்கப்படுகிறது. டிப்சீக்கின் இந்த சாதனை, செயற்கை நுண்ணறிவு துறையில் ஒரு புதிய அத்தியாயத்தைத் துவங்கியுள்ளது.