ஷிகர் தவான் வழக்கில் முக்கிய திருப்பம்!! ரூ.5.6 கோடியை திரும்ப ஒப்படைக்க முன்னாள் மனைவிக்கு உத்தரவு

பிரபல கிரிக்கெட் வீரர் ஷிகர் தவானின் முன்னாள் மனைவியும், ஆஸ்திரேலிய ஃபிட்னஸ் இன்ஃப்ளூயன்ஸருமான ஆயிஷா முகர்ஜி, சுமார் AU $894,397 (இந்திய மதிப்பில் ரூ5.7 கோடி) பணத்தை ஷிகார் தவானுக்கு திருப்பிக் கொடுக்க டெல்லி பாட்டியாலா ஹவுஸ் குடும்ப நீதிமன்றம் உத்தரவிட்டுள்ளது. அச்சுறுத்தல்கள், பணம் பறித்தல், ஏமாற்றுதல் போன்ற மோசடிச் செயல்களில் ஆயிஷா முகர்ஜி ஈடுபட்டதாக டெல்லி நீதிமன்றம் கூறியுள்ளது.

ஷிகர் தவான் மற்றும் ஆயிஷா முகர்ஜிக்கு திருமணம் நடந்து இருவரும் விவாகரத்து பெற்றனர். அப்போது ஆஸ்திரேலிய நீதிமன்றம் ஷிகர் தவானின் சொத்துக்களில் இவருக்கு செட்டில்மெண்ட் செய்ய உத்தரவிட்டது. அது செல்லாது என டெல்லி நீதிமன்றம் தீர்ப்பு தந்துள்ளது. தவானுக்கும் ஆயிஷாவுக்கும் இடையிலான நிதி உடன்படிக்கைக்கு வழிவகுத்த ஆவணங்கள் செல்லாது என நீதிமன்றம் அறிவித்தது. மேலும், வழக்குத் தாக்கல் செய்யப்பட்ட தேதியிலிருந்து முழுமையாக பணம் செலுத்தப்படும் வரை, இத்தொகைக்கு ஆண்டுக்கு 9% வட்டி செலுத்தவும் உத்தரவிட்டுள்ளது.

'பார் அண்ட் பென்ச்’ அறிக்கையின்படி, 2024 பிப்ரவரி மாதம் ஆஸ்திரேலிய நீதிமன்றம், தவானின் இந்திய நிதி, சொத்துகள் உட்பட, உலகளாவிய சொத்துப் பிரிவில் ஆயிஷாவுக்கு AU$1.17 மில்லியன் மதிப்புள்ள சொத்துகளைத் தக்கவைத்ததோடு, கூடுதலாக 15% சொத்துகளும், தவான் செலுத்த வேண்டிய AU$2.5 மில்லியனும் வழங்க ஆணையிட்டது.

ஆஸ்திரேலிய நீதிமன்றம் சொத்தை ஆயிஷாவுக்கு மாற்றித் தருமாறும், தவறினால் கடும் விளைவு ஏற்படும் என கூறியது. இந்நிலையில் ஷிகர் தவான் டெல்லி நீதிமன்றத்தில், 2012-ல் திருமணமான உடனேயே, தனது மனைவி தனக்கு எதிராக "புனையப்பட்ட, அவதூறான, பொய்யான" தகவல்களைப் பரப்பி தனது நற்பெயரையும், கிரிக்கெட் வாழ்க்கையையும் அழித்துவிடுவேன் என்று மிரட்டத் தொடங்கியதாக 'வாதிட்டுள்ளார்.

ஆஸ்திரேலிய நீதிமன்றம் கணக்கிட்ட தொகையானது இந்தியச் சட்ட விதிகளுக்கும், இந்து திருமணச் சட்டத்திற்கும் முரணானது என்று ஷிகர் தவான் வாதிட்டார். ஆஸ்திரேலிய நீதிமன்றம் பிறப்பித்த உத்தரவுகளுக்குத் தான் கட்டுப்படவில்லை என அறிவிக்கக் கோரி அவர் முறையிட்டார்.

வழக்கை விசாரித்த டெல்லி குடும்ப நீதிமன்றம், தவானின் வாதங்களை ஏற்றுக்கொண்டு, ஆஸ்திரேலிய நீதிமன்றத்தின் உத்தரவுக்கு அவர் கட்டுப்பட்டவர் அல்ல என்று அறிவித்தது. நாட்டில் வெளிநாட்டு நீதிமன்றத்தின் சொத்துத் தீர்வு தொடர்பான தீர்ப்புகள் அவருக்கு எதிராகச் செயல்படுத்தப்படாது எனக் கூறி, அவற்றை ரத்து செய்தது.