தங்கம் விலை எவ்வளவு உயர்ந்தாலும் நம்ம மக்கள் அடங்க மாட்டாங்க..!! செபியோட வார்னிங் என்ன ஆச்சு?

தங்கம் விலை தாறுமாறாக உயர்ந்தாலும் இந்தியர்கள் தங்கத்தை வாங்குவதை நிறுத்தவில்லை. வழக்கமான நகைகள் , நாணயங்களுக்கு மாற்றாக டிஜிட்டல் தங்கத்தை அதிகமாக வாங்கி வைத்துள்ளனர். இந்தியாவில் டிஜிட்டல் தங்கம் வாங்குவதில் யுபிஐ முக்கியப் பங்கு வகிக்கிறது. நாட்டில் 90% டிஜிட்டல் தங்கம் யுபிஐ செயலிகள் வழியாகவே வாங்கப்படுகிறது.

ஜனவரி மாதத்தில், டிஜிட்டல் தங்கம் விற்பனை ரூ3,926 கோடி என்ற புதிய சாதனையை எட்டியுள்ளதாக, சமீபத்திய தகவல்கள் தெரிவிக்கின்றன. தேசிய கொடுப்பனவு கழகம் (NPCI) வெளியிட்ட தரவுகள்படி, ஜனவரியில் யுபிஐ மூலம் டிஜிட்டல் தங்கம் வாங்குவது ரூ 3,926 கோடியாக உயர்ந்து, 219 மில்லியன் பரிவர்த்தனைகளைத் தொட்டது. புவிசார் அரசியல் பதட்டங்கள், சந்தை நிலையற்ற தன்மை இருந்தபோதிலும் இந்த வளர்ச்சி ஏற்பட்டது.

யுபிஐ வழியாக டிஜிட்டல் தங்கம் விற்பனை ஜனவரி 2025 இல் ரூ762 கோடியாக இருந்தது. அக்டோபர் 2025 இல் இது ரூ2,290 கோடியாக உயர்ந்தது. பேடிஎம், ஃபோன்பே, ஜார், அமேசான் பே, கூகுள் பே, தன்ஷ்க் போன்ற கட்டண செயலிகள் மூலம் இதன் விற்பனை சீராக அதிகரித்து வருகிறது.

சந்தை கட்டுப்பாட்டாளரான செபி (SEBI), டிஜிட்டல் தங்கம் ஒழுங்குமுறைப்படுத்தப்படாதது என முதலீட்டாளர்களுக்கு எச்சரித்தது. டிஜிட்டல் தங்கத்தில் செய்யப்படும் முதலீடுகளுக்கு நாங்கள் பாதுகாப்பு தர மாட்டோம் என வெளிப்படையாகவே எச்சரிக்கை விடுத்தது. இதன் விளைவாக நவம்பரில் விற்பனை சரிந்து, சுமார் ரூ 1,200 கோடி மதிப்பிலான 120 மில்லியன் பரிவர்த்தனைகள் மட்டுமே நடைபெற்றன.

உலகளாவிய நிச்சயமற்ற தன்மைகளும், சந்தையின் நிலையற்ற தன்மையும் டிசம்பரில் தங்கத்தின் தேவையை அதிகரித்தன. இதனால் டிஜிட்டல் தங்கம் விற்பனை மீண்டும் ஏற்றம் கண்டு, ரூ2,100 கோடி மதிப்பிலான 180 மில்லியன் பரிவர்த்தனைகள் பதிவாகின. தங்கத்தின் விலை உயர்வு, பாதுகாப்பான முதலீட்டு கருவியாக அதன் பங்கு, எளிமையான அணுகல், குறைந்தபட்ச அளவிலேயே வாங்கக்கூடிய வசதி ஆகியவை டிஜிட்டல் தங்கத்தின் மீதான வாடிக்கையாளர் ஆர்வத்தை அதிகரித்தன. ரூ1 முதல் ரூ 2 லட்சம் வரை ஒரு நாளைக்கு வாங்க முடியும் என்பதும் ஒரு முக்கிய சிறப்பாகும்.

"தங்கம் எப்போதும் இந்தியக் குடும்பங்களுக்கு மிகவும் நம்பகமான மற்றும் நீண்டகாலமாக நிரூபிக்கப்பட்ட சேமிப்புக் கருவியாக இருந்து வருகிறது" என்று ஜார் (Jar) இணை நிறுவனர் நிஷ்சய் ஏ.ஜி. தெரிவித்தார். "தங்கத்தின் மீதான எங்கள் நம்பிக்கை ஆழமாகியுள்ளது. தங்கம் வரலாற்று உச்சத்தில் இருப்பதாலும், வெள்ளி ஏற்ற இறக்கத்துடன் இருப்பதாலும், அனுபவமிக்க முதலீட்டாளர்கள் பின்பற்றும் ஆலோசனையைப் பகிர்ந்து கொள்கிறேன்: குறுகிய கால வாய்ப்புகளைத் தேடாமல், நீண்ட காலத்திற்கு சேமிப்பதில் கவனம் செலுத்துங்கள். தொடர்ந்து சேமிக்கும் ஒழுங்கு, மிக முக்கியம்" என்கிறார்.

பெரும்பாலான ஃபின்டெக் தளங்கள், டிஜிட்டல் தங்கத்தை சேமிப்பு அல்லது முதலீட்டு வாய்ப்பாக வழங்குகின்றன. MMTC-PAMP அல்லது SafeGold போன்ற நிறுவனங்களால் குறியீடாக்கப்பட்டு, பாதுகாப்புடன் சேமிக்கப்படுகிறது. வாடிக்கையாளர்கள் தங்கள் டிஜிட்டல் தங்கத்தை தேவைப்படும்போது எளிதாக விற்க முடியும். டிஜிட்டல் தங்கத்தில் முதலீடு செய்யும்போது சில கூடுதல் செலவுகளும் உள்ளன. இதில் சரக்கு மற்றும் சேவை வரி (GST), பாதுகாப்புக்கான சேமிப்பு கட்டணங்கள், தளத்திற்கான சேவைக் கட்டணங்கள் ஆகியவை அடங்கும். முதலீடு செய்யுமுன் இந்தக் கட்டணங்களை அறிந்திருப்பது முக்கியம்.

Disclaimer: இந்த செய்தியில் இருக்கும் கருத்துகள் மற்றும் பரிந்துரைகள் தனிப்பட்ட ஆய்வாளர்கள் அல்லது நிறுவனங்களின் சொந்த கருத்துகளாகும், இவை Goodreturns.in அல்லது Greynium Information Technologies Private Limited (இவை இரண்டும் "நாங்கள்" என குறிப்பிடப்படுகிறது) ஆகியவற்றின் கருத்துகளைப் பிரதிபலிக்கவில்லை. உள்ளடக்கத்தின் துல்லியம், முழுமை அல்லது நம்பகத்தன்மைக்கு நாங்கள் எந்தவொரு உத்தரவாதம் அளிக்கவோ, அங்கீகரிக்கவோ அல்லது பொறுப்பேற்கவோ மாட்டோம். மேலும், முதலீட்டு ஆலோசனை அல்லது பங்குகளை வாங்கவோ விற்கவோ எந்த வித தூண்டுதலையும், ஊக்கத்தையும் நாங்கள் வழங்கவில்லை. அனைத்து தகவல்களும் புரிதல் நோக்கங்களுக்காக மட்டுமே வழங்கப்படுகின்றன. எந்தவொரு முதலீட்டு முடிவுகளை எடுப்பதற்கு முன்பும், அங்கீகரிக்கப்பட்ட நிதி ஆலோசகர்களிடமிருந்து தனிப்பட்ட முறையில் சரிபார்க்கப்பட வேண்டும்.