விட்றாதடா தம்பி.. தீபாவளி ரொம்ப முக்கியம்.. பணத்தை அள்ளிவீசும் கார்ப்பரேட் நிறுவனங்கள்..!!

2024ஆம் ஆண்டில் இந்திய வர்த்தக சந்தையில் வர்த்தகம் அதிகப்படியான தடுமாற்றத்தை எதிர்கொண்ட நிலையில் இந்த 4 நாள் விடுமுறை உடன் வரும் தீபாவளி பண்டிகையில் எப்படியாவது இழந்த வரத்தகத்தை பெற்றிட வேண்டும் என்ற ஒற்றை இலக்குடன் இந்திய கார்ப்ரேட் நிறுவனங்களும் துடியாய் துடிக்கிறது. இதற்காக எடுத்த ஆயுதம் தான் விளம்பரம்.

இந்தியாவின் முன்னணி நுகர்வோர் மற்றும் ஆட்டோமொபைல் நிறுவனங்கள், செப்டம்பர் காலாண்டில் விற்பனையை அதிகரிக்க தங்கள் விளம்பர மற்றும் மார்கெட்டிங் பட்ஜெட்டை அதிகரித்து, செலவுகளைப் பெரிய அளவில் உயர்த்தியுள்ளது.

நெஸ்ட்லே, கோல்கேட்-பால்மோலிவ், கோத்ரெஜ் கன்ஸ்யூமர் புராடக்ட்ஸ், மாருதி சுசூகி, வோக்ஸ்வாகன், ஸ்கோடா மற்றும் டாடா மோட்டார்ஸ் உள்ளிட்ட நிறுவனங்கள் செப்டம்பர் காலாண்டில் விளம்பர மற்றும் மார்கெட்டிங் செலவுகளை அதிகரித்து அதிகப்படியான வர்த்தகத்தைப் பெற வேண்டும் என்ற முக்கியமான இலக்கை கொண்டு செயல்பட்டு வருகிறது. இதுமட்டும் அல்லாமல் பல நிறுவனங்கள் இதை டிசம்பர் மாதம் வரையில் நீட்டிக்கவும் உள்ளதாகத் தெரிவித்துள்ளது.

உதாரணமாக, கோல்கேட்-பால்மோலிவ், ஜூலை-செப்டம்பர் காலாண்டில் விளம்பரம் மற்றும் மார்கெட்டிங் செலவுகளை 17.8% அதிகரித்து ரூ.242 கோடிக்கு கொண்டு சென்றுள்ளது. இதை தொடர்ந்து, டிசம்பர் காலாண்டிலும் விளம்பர செலவுகளைத் தொடர்ந்து அதிகரிக்கத் திட்டமிட்டுள்ளது. கோத்ரெஜ் கன்ஸ்யூமர் புராடக்ட்ஸும் கடந்த காலாண்டில் செய்தது போலவே விளம்பர முதலீடுகளை படிப்படியாக அதிகரிக்கும் நோக்கில் உள்ளது.

நெஸ்ட்லே இந்தியாவும் செப்டம்பர் காலாண்டில் விளம்பரம் மற்றும் மார்கெட்டிங் முதலீடுகளை முன்னுரிமைப்படுத்தியுள்ளதாகவும் இதன்மூலம் விற்பனையை அதிகரிக்கத் திட்டமிட்டு உள்ளதாகவும் இந்நிறுவனத்தின் தலைவர் சுரேஷ் நாராயணன் தெரிவித்துள்ளார்.

ஹிந்துஸ்தான் யூனிவர்சல், நெஸ்ட்லே, டாடா கன்ஸ்யூமர், கோத்ரெஜ் கன்ஸ்யூமர் புராடக்ட்ஸ் மற்றும் டாபர் போன்ற பெரிய எஃப்எம்சிஜி நிறுவனங்கள், உணவு மற்றும் எரிபொருள் விலை உயர்வால் நகர்ப்புற நுகர்வோர் தேவை பாதிக்கப்பட்டுள்ளதை ஒப்புக்கொண்டாலும், கிராமப்புற தேவை மீண்டு வருவதையும் குறிப்பிட்டுள்ளன. இதனால் கடந்த 5 மாதத்தில் கிராம்புறத்தில் விளம்பரத்தையும், தள்ளுபடிகளையும் அதிகரித்துள்ளனர்.

இதேபோல் ஆட்டோமொபைல் துறையில், மருதி சுசூகி, வோக்ஸ்வாகன், ஸ்கோடா மற்றும் டாடா மோட்டார்ஸ் போன்ற நிறுவனங்கள் பண்டிகைக் காலத்தில் புதிய வாகனங்கள் வாங்குபவர்களை ஈர்ப்பதற்காக தங்கள் மார்கெட்டிங் முயற்சிகளை அதிகரித்து வருகின்றன.