Click it and Unblock the Notifications
தமிழ்நாட்டில் கடந்த ஏப்ரல் மாதம் சட்டமன்ற தேர்தல் நடைபெற்றது. இந்த தேர்தலில் விஜயின் தவெக அதிகமான இடங்களை கைப்பற்றியது. இதனை அடுத்து கூட்டணி கட்சிகளின் உதவியோடு ஆட்சி அமைத்தது. முதலமைச்சராக விஜய் அரியணை ஏறினார். இந்த தேர்தலில் திமுக இரண்டாம் இடமும் அதிமுக மூன்றாம் இடமும் பிடித்தன.
தேர்தலில் போட்டியிட்ட அரசியல் கட்சிகள், இந்திய தேர்தல் ஆணையத்திடம், தேர்தல் வரவு- செலவு கணக்குகளை தாக்கல் செய்ய வேண்டும். அதன்படி தி.மு.க., அ.தி.மு.க. மற்றும் நாம் தமிழர் ஆகிய கட்சிகள் தங்களின் தேர்தல் செலவின பிரமாண பத்திரங்களை தாக்கல் செய்துள்ளன. இதில் ஒவ்வொரு கட்சியும் எவ்வளவு பணத்தை செலவு செய்துள்ள என்ற விவரங்கள் வெளியாகியுள்ளன.
திமுக தாக்கல் செய்துள்ள பிரமாண பத்திரத்தில், தேர்தல் தொடங்குவதற்கு முன்பாக 365 கோடி ரூபாய் கையிருப்பு இருந்துள்ளது. தேர்தல் காலத்தில் நன்கொடைகள் மூலம் 126 கோடி வசூலாகியுள்ளது. இதில் தேர்தலுக்கு மொத்தமாக திமுக 197.84 கோடி ரூபாயை செலவிட்டுள்ளது. குறிப்பாக விளம்பரங்களுக்கு மட்டும் 70 கோடியை செலவு செய்துள்ளது. தேர்தல் பிரசாரத்துக்கு மட்டும் 149.89 கோடி ரூபாயை திமுக செலவிட்டுள்ளது.
குறிப்பாக திமுக தலைவர் ஸ்டாலினின் மருமகன் சபரிசனின் பென் நிறுவனத்துக்கு 6.61 கோடி ரூபாய் வழங்கப்பட்டுள்ளது. கட்சி வேட்பாளர்கள் பலருக்கு தேர்தல் நிதியாக தலா 25 லட்சத்தை திமுக வழங்கியுள்ளது. தேர்தல் செலவுகள் போக, மீதம் 319.39 கோடி ரூபாய் இருப்பதாக தெரிவித்துள்ளது.
அதிமுக பொதுச்செயலாளர் எடப்பாடி பழனிசாமி தாக்கல் செய்துள்ள பிரமாணப் பத்திரத்தில், தமிழகம், கேரளம் மற்றும் புதுச்சேரி மாநிலங்களுக்கான அக்கட்சியின் மொத்த தேர்தல் செலவு தொகையாக 112.39 கோடி ரூபாய் கணக்கு காட்டப்பட்டு உள்ளது. தேர்தலுக்கு முன்பு கட்சியின் கையிருப்பாக 313 கோடி இருந்துள்ளது. தேர்தல் காலத்தில் 87.41 கோடி ரூபாய் நன்கொடை வந்துள்ளது.
இதில் 112 கோடி ரூபாய் செலவிடப்பட்டுள்ளது குறிப்பாக 103 கோடி ரூபாய், பிரமான்யா ஸ்ட்ராட்டஜி கன்சல்டிங் நிறுவனத்திடம் சமூக வலைத்தள மற்றும் ஊடக விளம்பரங்களுக்காக அதிமுக வழங்கியுள்ளது. தேர்தல் முடிந்த நிலையில் அதிமுகவிடம் 295 கோடி ரூபாய் இருப்பு உள்ளது.
நாம் தமிழர் கட்சிக்கு தேர்தலுக்கு முன்பு கட்சியின் கணக்கில் 19 லட்சம் ரூபாய் இருந்தது. தேர்தல் நேரத்தில் 2.20 கோடி ரூபாய் வசூலானது. தேர்தலில் அக்கட்சி மேற்கொண்ட மொத்த செலவு 1.37 கோடி ரூபாயாகும். பிரசாரம் மற்றும் விளம்பரங்களுக்காக 93 லட்சமும், வேட்பாளர்களுக்கான செலவுக்காக 44 லட்சமும் வழங்கப்பட்டுள்ளது. தேர்தல் முடிந்தபிறகு நாம் தமிழர் கட்சியின் வசம் 64 லட்சம் ரூபாய் இருப்பில் உள்ளது. ஆளும் கட்சியான தவெக தனது தேர்தல் செலவினம் குறித்த விவரங்களை இன்னும் தாக்கல் செய்யவில்லை.
Sign in with Google
