ஆர்பிஐ மானிட்டரி பாலிசி கூட்டம்! வட்டி வகிதம் குறையுமா?

கொரோனா வைரஸ் பிரச்சனை வந்ததில் இருந்து, இந்திய பொருளாதாரத்தின் அனைத்து அம்சங்களும் தலை கீழ் மாற்றம் கண்டு வருகின்றன.

இந்த கொரோனா வைரஸ் பிரச்சனையால் மக்கள் அதிகம் அவதிப்படக் கூடாது என்கிற எண்ணத்தில், குறைந்த வட்டியில் கடன் கிடைக்க வேண்டும் என்கிற நோக்கில் ஆர்பிஐ தன் ரெப்போ வட்டி விகிதங்களை 4 சதவிகிதமாகக் குறைத்தார்கள்.

மார்ச் 2020-ல் மட்டும் 0.75 % மற்றும் மே 2020-ல் மேலும் 0.40 % ரெப்போ வட்டியைக் குறைத்தார்கள்.

தற்போதைய வட்டி விகிதம்

தற்போது ஆர்பிஐ மற்ற வங்கிகளுக்கு கொடுக்கும் கடனுக்கு வசூலிக்கும் வட்டி விகிதமான ரெப்போ வட்டி விகிதம் வெறும் 4.0 சதவிகிதமாக இருக்கிறது. மற்ற வங்கிகள் ஆர்பிஐக்கு கொடுக்கும் கடனுக்கு வசூலிக்கும் வட்டி விகிதம் 3.35 சதவிகிதமாகவும், MSLR விகிதம் 4.25 சதவிகிதமாகவும் இருக்கிறது. CRR 3 சதவிகிதமாகவும், SLR 18 சதவிகிதமாகவும் இருக்கிறது.

மானிட்டரி பாலிசி கூட்டம்

தற்போது, ஆர்பிஐ வங்கியின் மானிட்டரி பாலிசி கூட்டம் இன்று முதல் ஆகஸ்ட் 06 2020 வரை நடக்க இருக்கிறது. இந்த கூட்டத்தில் தான், மேலும் ஆர்பிஐ வட்டி விகிதங்களைக் குறைக்குமா என்கிற முடிவை எடுப்பார்கள். ஏற்கனவே நிறைய வட்டி விகிதங்களைக் ஆர்பிஐ குறைத்துவிட்டது. கடந்த 01 ஆகஸ்ட் 2018 காலகட்டத்தில் 6.5 சதவிகிதமாக இருந்த ரெப்போ வட்டி விகிதத்தை மெல்ல மெல்ல 4 சதவிகிதத்துக்கு கொண்டு வந்து இருக்கிறார்கள்.

2008 - 2020

2008 பொருளாதார நெருக்கடி வந்த காலத்தில் ஜூலை 2008 காலகட்டத்தில் 9.0 சதவிகிதமாக இருந்த ரெப்போ வட்டி விகிதம் ஏப்ரல் 2009 காலகட்டத்தில் 4.75 சதவிகிதமாக குறைத்தார்கள். அதே போல இன்று, ஆர்பிஐ தன் ரெப்போ வட்டி விகிதத்தை அதை விட குறைவாக 4.0 சதவிகிதம் வரை குறைத்து இருக்கிறார்கள்.

நோ வட்டி குறைப்பு

இந்த அளவுக்கு வட்டி விகிதங்களைக் குறைத்த பின், மேலும் வட்டி விகிதங்களைக் குறைப்பது சாத்தியமில்லை என்கிறது ஒரு தரப்பு. வட்டி விகிதங்களால், பொருளாதாரத்தில் டிமாண்டை பெரிய அளவில் அதிகரிக்க வைக்க முடியாது. கொரோனா பிரச்சனை வியாபாரங்கள் மற்றும் வாடிக்கையாளர்கள் என் இரண்டு தரப்பினர்களையும் பாதித்துக் கொண்டு இருக்கிறது. எனவே ஆர்பிஐயின் மானிட்டரி பாலிசி கமிட்டி, இந்த ஆகஸ்டில் எந்த வட்டி விகித குறைப்பையும் செய்யாமல் இருக்க வாய்ப்பு இருப்பதாகச் சொல்லி இருக்கிறார்களாம்.