பீட்சா விலையை திடீரென குறைத்த Domino's.. என்ன காரணம் தெரியுமா..?

மேற்கத்திய நாடுகளில் பீட்சா என்பது அனைவரும், அனைத்து தரப்பு மக்களும், எப்போது வேண்டுமானாலும் சாப்பிடும் ஒரு எளிய உணவாக இருந்தாலும் இந்தியாவில் பீட்சா என்பது இன்றளவும் இந்திய மக்களுக்கு ஆடம்பர உணவாகவே உள்ளது.

இந்த நிலையில் இந்தியாவில் பீட்சா விற்பனையில் கொடிகட்டி பறக்கும் டாமினோஸ் மற்றும் பீட்சா ஹட் பெரிய அளவிலான ஆதிக்கம் செலுத்தி வந்த நிலையில், அமெரிக்காவில் உருவான அதே புரட்சி இந்தியாவில் வெடித்தது. கடந்த 5 வருடத்தில் பீட்சா விற்பனையில் அதிகளவிலான உள்நாட்டு பிராண்டுகள், பிராந்திய பிராண்டுகள் வந்துள்ளது. இந்த நெருக்கடியை தாங்காமல் டாமினோஸ் தனது பீட்சா விலையை குறைத்துள்ளது.

Tossin, தென் கொரியாவின் GoPizza, Leo's Pizzeria, MojoPizza, Ovenstory மற்றும் La Pino'z போன்ற சிறிய மற்றும் புதிய போட்டியாளர்களுடன் போட்டியிட இந்தியாவின் மிகப்பெரிய பீட்சா சங்கிலி நிறுவனமான Domino's அதன் பெரிய பீட்சாக்களின் விலையை கிட்டத்தட்ட பாதியாகக் குறைத்துள்ளது.

அமெரிக்க பீட்சா சங்கிலி நிறுவனங்கள் இந்தியாவின் FMCG போக்கை தவறாக கணித்துவிட்டது. பல உள்ளூர் பிராண்டுகள் தற்போது பிரபலமான பீட்சா பிராண்டுகளுக்கு கடுமையான போட்டியைக் கொடுப்பது மட்டும் அல்லாமல் சில சந்தைகளில் முன்னோடியாக உள்ளது. இதுமட்டும் அல்லாமல் சிறிய பிராண்டுகளும் விரைவான சேவை உணவகங்களுக்கு (QSRs) மாடலில் தனது வர்த்தகத்தை விரைவாக விரிவடைந்துள்ளது. இது அனைத்தும் பின்னடைவாக அமைந்துள்ளது.

Domino's கடந்த வாரம் அதன் வாடிக்கையாளர்களுக்கு பெரிய பீஸ்ஸாக்களின் விலை கடும் வீழ்ச்சி என்ற மெசேஜ்-ஐ அனுப்பியது. வெஜ் லார்ஜ் பீட்சாக்களின் விலை ரூ.799ல் இருந்து ரூ.499 ஆகவும், அசைவ பெரிய பீட்சாக்களின் விலை ரூ.919ல் இருந்து ரூ.549 ஆகவும் குறைக்கப்பட்டுள்ளதாக டாமினோஸ் தெரிவித்துள்ளது. "குறைவாக பணம் செலுத்துங்கள், அதிகமாகப் பெறுங்கள்" என்று டாமினோஸ் நிறுவனம் தனது மெசேஜ்-ல் தெரிவித்துள்ளது.

இந்தியாவில் 1,800 க்கும் மேற்பட்ட கடைகளுடன் Domino's பிராண்டை இந்தியாவில் இயக்கும் Jubilant FoodWorks இன் செய்தித் தொடர்பாளர் காலாண்டு முடிவுகள் வெளியிடும் நேரத்தில், கருத்து தெரிவிக்க மறுத்துவிட்டார் என எக்னாமிக் டைம்ஸ் தெரிவித்துள்ளார். ஜூபிலண்ட் ஃபுட்வொர்க்ஸ் இந்தியாவில் 21 டன்கின் உணவகங்கள் மற்றும் 13 Popeyes கடைகளையும் நடத்துகிறது.

ஜூபிலண்ட் ஃபுட்வொர்க்ஸ் ஜூன் காலாண்டில் நிகர லாபம் 74% குறைந்து ரூ. 28.91 கோடியாகவும், அதேபோன்ற விற்பனையில் 1.3% சரிவையும் பதிவு செய்துள்ளது. இதற்கு முக்கிய காரணம் உள்நாட்டு பீட்சா பிராண்டுகள் அதிகளவிலான வாடிக்கையாளர்களை பெற்று வருவது தான்.