மகளிர் உரிமை தொகை: புதிதாக விண்ணப்பித்தால் 3 மாதத்தில் கிடைக்கும்.. உதயநிதி ஸ்டாலின் கொடுத்த அப்டேட்

தமிழ்நாட்டில் முக்கிய திட்டங்களில் ஒன்றான மகளிர் உரிமை தொகை வழங்கும் திட்டத்தில் முக்கிய அப்டேட் ஒன்றை துணை முதலமைச்சர் ஸ்டாலின் இன்றைய சட்டப்பேரவை கேள்வி நேரத்தில் தெரிவித்துள்ளார். அதன்படி, மகளின் உரிமை தொகைக்கு விண்ணப்பித்து காத்திருக்கும் பெண்களுக்கு நற்செய்தி வந்துள்ளது. யாருக்கெல்லாம் மகளிர் உரிமை தொகை கிடைக்கவில்லையோ இனி கவலைப்பட தேவையில்லை.

அதாவது யாரெல்லாம் புதிதாக மகளிர் உரிமைதொகைக்கு விண்ணப்பித்துள்ளார்களோ அவர்களுக்கு மூன்று மாதத்திற்குள் பணம் வந்து சேரும் என்று கூறியுள்ளார். இன்றைய சட்டப்பேரவை கூட்டத்தொடரில் கேள்வி நேரம் நடைபெற்றது. அப்போது வேடசந்தூர் தொகுதி திமுக உறுப்பினர் எஸ்.காந்திராஜன், தனது தொகுதி மற்றும் தமிழகம் முழுவதும் கலைஞர் மகளிர் உரிமைத் தொகை திட்டத்தின் கீழ் எத்தனை பேர் பயன்பெறுகின்றனர் என்றும், பல்வேறு இடங்களில் ஏழை மக்கள் மனு அளித்தும் அனுமதியளிக்கப்படவில்லை என்ற விவரங்கள் குறித்தும் கேள்வி எழுப்பினர்.

அப்போது மனு அளித்து தகுதியானவர்கள் அனைவருக்கும் மகளிர் உரிமை தொகை வழங்கப்படுமா என கேட்டார். அதே நேரத்தில், கொங்குநாடு மக்கள் தேசிய கட்சியின் உறுப்பினர் ஈ.ஆர்.ஈஸ்வரனும், விண்ணப்பித்த தகுதியானவர்களுக்கு உரிமைத் தொகை வழங்கப்படுமா என கேள்வி எழுப்பினார்.

இந்த கேள்விகளுக்கு பதிலளித்த துணை முதல்வர் உதயநிதி ஸ்டாலின் அவர்களுக்கு 3 மாதங்களுக்குள் வழங்கப்படும் என கூறினார். அதேபோல், திண்டுக்கல் மாவட்டத்தில் மகளிர் உரிமைத் தொகை 5.27 லட்சம் பேர் விண்ணப்பித்ததில், 76 சதவீதம் அதாவது 4 லட்சத்து 897 மகளிர் மாதம் ரூ.1000 உரிமைத்தொகை பெறுகின்றனர். வேடசந்தூர் 62 ஆயிரம் மகளிர், உரிமைத் தொகை பெற்று வருகின்றனர் என்று தெரிவித்தார்.

அதேபோல், மகளிர் உரிமைத் தொகை திட்டத்துக்கு தமிழகம் முழுவதும் சிறப்பு முகாம்கள் நடத்தப்பட்டு 1 கோடியே 63 லட்சத்து 57 ஆயிரத்து 195 விண்ணப்பங்கள் பெறப்பட்டுள்ளதாகவும், அவற்றை ஆய்வு செய்ததில் 70 சதவீதம் அதாவது 1 கோடியே 6 லட்சத்து 52 ஆயிரத்து 198 விண்ணப்பங்கள் முதல் கட்டமாக ஏற்கப்பட்டன என்று கூறினார்.

கடந்த 2023-ம் ஆண்டு செப்.15ம் தேதி அண்ணா பிறந்த தினத்தன்று காஞ்சிபுரத்தில் மகளிர் உரிமைத் தொகை திட்டம் தொடங்கி வைக்கப்பட்டது. அந்த நேரத்தில் முதல் முறை விண்ணப்பித்து, நிராகரிக்கப்பட்டவர்கள் மேல் முறையீடு செய்யவும் வாய்ப்பு வழங்கப்பட்டதாகவும், அதன்படி, கூடுதலாக 9 லட்சம் விண்ணப்பங்கள் ஏற்கப்பட்டுள்ளதாகவும் உதயநிதி ஸ்டாலின் கூறியுள்ளார்.

மேலும், கடந்த டிசம்பர் மாதம் 15-ம் தேதி 1 கோடியே 14 லட்சத்து 65,525 மகளிருக்கு உரிமைத்தொகை வழங்கப்பட்டுள்ளது எனவும், தற்போது, திட்டத்தின் விதிகளுக்கு உட்பட்டு எவ்வளவு பேருக்கு கூடுதலாக வழங்க முடியுமோ, அவ்வளவு பேருக்கும் எவரும் விடுபடாமல் மகளிர் உரிமைத் தொகை வழங்க நடவடிக்கை எடுத்து வருகிறோம் என்று கூறினார்.

தமிழகத்தில் அனைத்து மாவட்டங்களுக்கு நாங்கள் ஆய்வுக்கு செல்லும்போது, உரிமைத்தொகை வேண்டி மகளிர் விண்ணப்பம் அளிக்கின்றனர். அதுபற்றி, விவரங்களை சேகரித்து, முதல்வர் கவனத்துக்கு கொண்டு சென்று வருவதாகவும், முதல்வரின் அறிவுரைகளை பெற்று இதுவரை பயன்பெறாத மகளிருக்கு திட்டத்தின் பயன் கிடைப்பதற்கான நடவடிக்கை நிச்சயமாக எடுக்கப்படும் என்றும் தெரிவித்தார்.

கடந்த முறை விண்ணப்பிக்க இயலாதவர்கள் புதிதாக விண்ணப்பிக்கவும், திட்டத்தின் தகுதிகளை பூர்த்தி செய்யும் மகளிருக்கு உரிமைத்தொகை வழங்கவும் 3 மாதங்களுக்குள் நடவடிக்கை எடுக்கப்படும் என்று துணை முதலமைச்சர் உதயநிதி ஸ்டாலின் இன்றைய சட்டப்பேரவை கூட்டத்தொடரின் கேள்வி நேரத்தில் தெரிவித்துள்ளார்.