இந்தியாவின் முதல் லம்போர்கினி உருஸ் பெர்ஃபார்மென்டே வாங்கிய ரிகான்ட்.. விலை என்ன தெரியுமா..?

விரும்பிய பொருளை வாங்கியே ஆக வேண்டும் என்று விடாப்பிடியாக இருப்பவர்களும் இருக்கத்தான் செய்கிறார்கள். அதிலும் காஸ்ட்லியான கார்களை எப்படியாவது வாங்க வேண்டும் என்று நினைத்து அதன்படியே வாங்கி முடிப்பவர்களும் உள்ளனர்.

அப்படியொரு இளைஞரின் 19 ஆண்டுகால கனவு, ஒரு லம்பார்கினி காரை சொந்தமாக்க வேண்டும் என்பது. தனது கனவுக் காரை அந்த இளைஞர் வாங்கியே விட்டார். அந்த இளைஞரின் பெயர் ரிகான்ட் பிட்டி. ஈஸ்மைடிரிப் நிறுவனத்தின் இணை உரிமையாளர். ஈஸ்மைடிரிப் நிறுவனம் இந்தியாவின் இரண்டாவது பெரிய ஆன்லைன் டிராவல் கம்பெனி.

ரிகான்ட் பிட்டி தனது 16 ஆவது வயதில் தனது சகோதரர்கள் நிஷாந்த் பிட்டி (மணிகார்னிகா: தி குயின் ஆப் ஜான்ஸி, மதாரி ஆகிய படங்களின் இணை தயாரிப்பாளர்), பிரசாந்த் பிட்டி ஆகியோருடன் சேர்ந்த 2008இல் ஈஸ்மைடிரிப் கம்பெனியை நிறுவினார். கம்பெனி ஆரம்பித்ததில் இருந்தே நல்ல லாபம் வரத் தொடங்கியதால் பிட்டி சகோதரர்களின் உழைப்புக்கு ஏற்ற லாபம் பெருகியது.

2021 ஆம் ஆண்டு மார்ச்சில் ஈஸ்மைடிரிப் நிறுவனம் பங்குச்சந்தையில் பட்டியலிடப்பட்டது. அதே ஆண்டு செப்டம்பரில் அந்த நிறுவனத்தின் சந்தை மதிப்பு 1 பில்லியன் அமெரிக்க டாலர்களாகி ஒரு யுனிகார்ன் நிறுவனமாக உருவெடுத்தது.

ரிகான்ட் பிட்டி லின்கிடுஇன்-ல் பகிர்ந்த ஒரு பதிவில் இந்தியாவின் முதல் லம்போர்கினி உருஸ் பெர்பார்மன்டே காரை வைத்திருப்பதாகக் கூறியுள்ளார். இந்தக் காரின் நிறம் வெர்டி வைப்பர்(ஸ்பெஷல் கிரீன்) அந்த லம்போர்கினி காரை அவர் 2023 செப்டம்பர் 24 ஆம் தேதியன்று வாங்கியுள்ளார். அந்த சொகுசு எஸ்யூவியின் விலை ரூ.4.22 கோடியாகும்.
காருடன் அவர் எடுத்துக் கொண்ட படத்தையும் ரிகான்ட் பிட்டி பகிர்ந்துள்ளார்.

இந்தக் காரை வாங்குவது எனது 19 ஆண்டுகால கனவாகும். 2021 ஆம் ஆண்டில் அந்தக் காரை வாங்கியிருக்க முடியும். ஆனால் கோவிட் 19 பாதிப்பு உலகம் முழுவதும் பரவியிருந்ததால் வாங்க முடியவில்லை.

அதற்கு பதிலாக நான் ஆக்ஸிஜன் கான்சன்ட்ரேட்டர்களை பல என்ஜிஓக்கள் மற்றும் மருத்துவமனைகளுக்கு நன்கொடையாக அளித்தேன். ஆனால் காத்திருப்பவர்களுக்கு அவர்கள் விரும்பியப் பொருள் கட்டாயம் கிடைக்கும்.

பின்னர் எனது கனவு காரான லம்போர்கினி உருஸ் பெர்பார்மன்டேவை வாங்கினேன். உண்மையிலேயே இது இந்தியாவில் வாங்கப்பட்ட முதல் கார். இது ஒரு பேன்ஸி கார் கதையல்ல. விடாப்பிடியாகவும் கடின உழைப்பாலும் என் கனவை நனவாக்கிய செயலாகும் என்றார்.

பல இந்திய பிரபலங்கள் மற்றும் தொழிலதிபர்கள் லம்போர்கினி உருஸ் காப்ஸ்யூல் கார் மீது விருப்பம் கொண்டுள்ளனர் அந்தப் பட்டியலில் கோடீஸ்வரர்களான முகேஷ் அம்பானி, அதார் பூனவாலா, ரண்வீர் சிங், ஜூனியர் என்டிஆர், ரஜினிகாந்த், கார்த்திக் ஆர்யன், ரோஹித் ஷெட்டி ஆகியோரும் அடங்குவர். லம்போர்கினி உருஸ் காப்ஸ்யூல் காரின் விலை ரூ.3 கோடிக்கு அதிகமாகும்.