2022-23ம் நிதியாண்டில் நாட்டின் ஜிடிபி 8-8.5% வரை வளர்ச்சியடையும்: பொருளாதார ஆய்வறிக்கையில் தகவல்

2022-23 ஆம் நிதியாண்டுக்கான பட்ஜெட் அறிக்கை நாளை தாக்கல் செய்யப்பட உள்ள நிலையில், இன்று துவங்கிய பட்ஜெட் கூட்டத்தொடரில் மத்திய நிதியமைச்சர் நாடாளுமன்றத்தில் பொருளாதார ஆய்வறிக்கையைச் சமர்ப்பித்தார்.

ஜிடிபி வளர்ச்சி

இன்று தாக்கல் செய்யப்பட்டு உள்ள பொருளாதார ஆய்வறிக்கையில் நாட்டின் பொருளாதாரம் 2023ஆம் நிதியாண்டில் 8 முதல் 8.5 சதவீதம் வரையில் வளர்ச்சி அடையும் என மத்திய நிதியமைச்சர் நிர்மலா சீதாராமன் நாடாளுமன்றத்தில் தெரிவித்துள்ளார்.

2021-22ஆம் நிதியாண்டு

இதேபோல் 2021-22ஆம் நிதியாண்டில் நாட்டின் பொருளாதாரம் 9.2 சதவீதம் வரையில் வளர்ச்சி அடையும் என மத்திய அரசு தனது பொருளாதார ஆய்வறிக்கையில் தெரிவித்துள்ளது. ஆனால் ஐஎம்எப் வெளியிட்ட கணிப்பில் இந்தியாவின் பொருளாதாரம் 9 சதவீதம் மட்டுமே வளர்ச்சி அடையும் என தெரிவித்துள்ளது.

விவசாய துறை

கொரோனா தொற்று பாதிப்புகள் விவசாய துறையைப் பெரிய அளவில் பாதிக்காத நிலையில், 2021-22ஆம் நிதியாண்டில் விவசாயம் மற்றும் அதைச் சார்ந்த துறை சுமார் 3.9 சதவீத வளர்ச்சியைப் பதிவு செய்யும் என மத்திய நிதியமைச்சர் தெரிவித்துள்ளார். கடந்த ஆண்டு இதன் அளவு 3.6 சதவீதமாக இருந்தது.

தொழிற்துறை வளர்ச்சி

கொரோனா தொற்றில் இருந்து இந்திய வர்த்தக சந்தை மீண்டும் வரும் நிலையில், ஒமிக்ரான் நாட்டின் வளர்ச்சியிலும், வர்த்தகத்திலும் பெரிய அளவிலான பாதிப்பு ஏற்படுத்தாத நிலையில், 2021-22ஆம் நிதியாண்டில் நாட்டின் தொழிற்துறை வளர்ச்சி 11.8 சதவீதமாக இருக்கும் எனப் பொருளாதார ஆய்வறிக்கையில் கூறப்பட்டு உள்ளது.

சேவைத் துறை

இதேபோல் இந்தியாவின் சேவைத் துறை 2021-22ஆம் நிதியாண்டில் 8.2 சதவீதம் வளர்ச்சி அடையும் எனவும், மேக்ரோ எகோ இண்டிகேட்டர்ஸ் 2022-23ஆம் நிதியாண்டில் சவால்களை எதிர்கொள்ளத் தயாராக உள்ளது எனவும் பொருளாதார ஆய்வறிக்கையில் கூறப்பட்டு உள்ளது.