நிதி நெருக்கடியில் தள்ளாடும் Unacademy.. 250 பேர் பணிநீக்கம்.. ஊழியர்கள் அதிர்ச்சி..!

எட்டெக் துறையில் முன்னணி நிறுவனங்களில் ஒன்றான Unacademy நிறுவனத்தில் மீண்டும் பணி நீக்கம் செய்யப்பட உள்ளதாக அறிவிக்கப்பட்டு உள்ளது. SoftBank நிறுவனத்தின் முதலீட்டில் இயங்கும் இந்நிறுவனம், தனது செயல்பாடுகளை மேம்படுத்துவதற்காகவும், செலவுகளைக் குறைப்பதற்காகவும் 250 ஊழியர்களைப் பணி நீக்கம் செய்துள்ளதாகத் தகவல் வெளியாகியுள்ளது.

Unacademy-ன் உயர்மட்ட நிர்வாகம் நிறுவனத்தின் வளர்ச்சி மற்றும் லாபத்தைக் கருத்தில் கொண்டு இந்த நடவடிக்கை எடுக்கப்பட்டுள்ளதாகத் தகவல் வெளியாகியுள்ளது. கடந்த 3 வருடமாகக் கூகுள் முதல் Unacademy வரையில் யார் பணிநீக்கம் செய்தாலும் இதே காரணத்தைத் தான் முன் வைக்கின்றனர்.

தற்போது பணி நீக்கம் செய்யப்பட்டுள்ளவர்களில், சுமார் 100 பேர் பிஸ்னஸ் டெவலப்மென்ட் மற்றும் மார்கெட்டிங் போன்ற முக்கிய துறைகளில் பணிபுரிந்து வந்தவர்கள். மீதமுள்ள பணியாளர்கள் சேல்ஸ் துறையைச் சார்ந்தவர்கள் ஆவார்கள்.

இந்த பணிநீக்கம், Unacademy நிறுவனத்தில் கடந்த சில மாதங்களாக நிலவி வரும் மோசமான நிதிநெருக்கடி சூழ்நிலையை உறுதிப்படுத்துகிறது. இந்த பணிநீக்கம் குறித்து Unacademy அதிகாரப்பூர்வ அறிவிப்பை வெளியிடவில்லை என்றாலும் அதன் முக்கிய முதலீட்டாளர்களான Peak XV Partners மற்றும் General Atlantic ஆகியவை இதை உறுதி செய்துள்ளது.

கடந்த மார்ச் மாதம் 2023 இல், 12% பணியாளர்களைக் குறைக்கும் வகையில் இரண்டாவது பெரிய பணி நீக்கத்தை இந்நிறுவனம் மேற்கொண்டது. இதற்கு முன்னதாக, 2022 ஆம் ஆண்டு ஏப்ரல் மாதத்தில், சுமார் 1000 ஒப்பந்த மற்றும் முழுநேர பணியாளர்களை Unacademy நிறுவனம் பணி நீக்கம் செய்தது குறிப்பிடத்தக்கது.

கடந்த மாதம், நிறுவனத்தின் இணை நிறுவனரும், தலைமை தொழில்நுட்ப அதிகாரியுமான ஹேமேஷ் சிங் பதவி விலகி, ஆலோசகர் பதவிக்கு மாற்றம் செய்யப்பட்டார்.

Unacademy நிறுவனத்தின் இந்த தொடர் பணிநீக்கங்கள், நிதி நெருக்கடி குறித்த தகவல்களைப் பார்க்கும் போது பைஜூஸ் நிறுவனத்தின் மோசமான நிலை நினைவுக்கு வருகிறது. எட்டெக் துறையில் நிலவும் கடுமையான போட்டி காரணமாகவும், தொடர் வர்த்தகம் மற்றும் வருவாய் இழப்பு காரணமாக ஒவ்வொரு நிறுவனமாக இதில் மாட்டிக்கொண்டு வருகிறது.